Read O‘zbek tilidagi Muqaddas Kitob, 2013 Luqo 3 Bible Online

Luqo 3 - O‘zbek tilidagi Muqaddas Kitob, 2013 bible

Luqo 3

¹Qaysar Tiberius hukmronligining o‘n beshinchi yili edi. Yahudiyada Po‘ntiy Pilat Rimlik hokim edi. Jalilada Hirod, Itureya bilan Traxonit viloyatlarida Hirodning ukasi Filip, Avilina viloyatida Lisaniy hukmronlik qilar,

²Hanan va Kayafa esa oliy ruhoniy edilar. O‘sha vaqtda sahroda yashayotgan Zakariyoning o‘g‘li Yahyoga Xudoning so‘zi keldi.

³U Iordan daryosi atrofidagi yerlarni kezib, odamlarga: “Gunohlaringizdan tavba qilib, suvga cho‘minglar, shunda Xudo gunohlaringizni kechiradi”, deb va’z qilardi.

⁴Shu tariqa Ishayo payg‘ambar o‘z kitobida yozgan quyidagicha bashorati amalga oshdi: “Sahroda bir ovoz yangramoqda: Egamizga yo‘l hozirlang, Unga to‘g‘ri yo‘l oching!”

⁵Har bir jarlik to‘ldiriladi, Har bir tog‘u tepalik pasayadi. Qing‘ir–qiyshiq yo‘llar rostlanadi, O‘nqir–cho‘nqir so‘qmoqlar tekis bo‘ladi.

⁶Butun jonzot Xudoning najotini ko‘radi!”

⁷Katta bir olomon suvga cho‘mdirilish uchun Yahyoning oldiga keldi. Yahyo ularga dedi: — Hoy, ilonlar zoti! Boshingizga kelayotgan Xudo g‘azabidan qochib qutulasiz, deb sizlarga kim aytdi?

⁸Bundan keyin tavbaga yarasha samara beringlar! O‘zingizcha: “Biz Ibrohim naslidanmiz”, deb aytishni xayolingizga ham keltirmanglar! Sizlarga shuni aytay: Xudo mana bu toshlardan Ibrohimga avlod tiklashga qodir.

⁹Hozirdanoq daraxtlar ildizida bolta yotibdi. Yaxshi meva bermagan har bir daraxt kesilib, olovga tashlanadi.

¹⁰Olomon Yahyodan so‘radi: — Unday bo‘lsa, biz nima qilishimiz kerak?

¹¹U javob berib, dedi: — Kimning ikkita ko‘ylagi bo‘lsa, birini ko‘ylagi bo‘lmagan odamga bersin. Kimning oziq–ovqati bo‘lsa, u ham ovqati yo‘qlar bilan bo‘lishsin.

¹²Soliqchilardan ba’zilari ham suvga cho‘mdirilish uchun kelib, Yahyodan: — Ustoz, biz nima qilishimiz kerak? — deb so‘rashdi.

¹³Yahyo ularga shunday javob berdi: — Belgilanganidan ortig‘ini odamlardan talab qilmanglar.

¹⁴Ba’zi bir askarlar ham undan: — Biz–chi?! Biz nima qilishimiz kerak? — deb so‘radilar. Yahyo ularga dedi: — Birovlarni nohaq ayblab, pul orttirmanglar, maoshingiz bilan qanoatlaninglar.

¹⁵Xalq Masihning kelishini orziqib kutardi. Ular: “Yahyo Masih emasmikin?” degan fikrni ko‘ngildan o‘tkazishardi.

¹⁶Yahyo ularning hammasiga shunday dedi: — Men sizlarni suvga cho‘mdiryapman. Lekin ortimdan mendan ham qudratliroq bo‘lgan bir Zot kelmoqda. Men Uning choriq iplarini yechishga ham arzimayman. U sizlarni Muqaddas Ruhga va olovga cho‘mdiradi.

¹⁷Uning panshaxasi qo‘lida tayyor turibdi. U O‘z xirmonini shopiradi: bug‘doyni O‘z omboriga to‘plab, somonni esa so‘nmas o‘tda yondirib yuboradi.

¹⁸Yahyo yana ko‘p boshqa nasihatlar berib, xalqqa Xushxabarni e’lon qilardi.

¹⁹Viloyat hukmdori Hirodning qilmishlarini esa fosh qildi. Chunki Hirod o‘z ukasining xotini Hirodiyaga uylangan va yana boshqa yomon ishlar ham qilgandi.

²⁰Shunisi yetmaganday, u Yahyoni ham zindonga qamatib qo‘ydi.

²¹Butun xalq suvga cho‘mdirilayotganda, Iso ham suvga cho‘mdirildi. U ibodat qilib turganda osmon ochilib ketdi

²²va Muqaddas Ruh kaptar shaklida Uning ustiga tushib keldi. Osmondan esa: “Sen Mening sevikli O‘g‘limsan, Sendan nihoyatda mamnunman”, — degan ovoz keldi.

²³Iso xizmatini boshlaganda o‘ttiz yoshlarda edi. Odamlar Uni Yusufning o‘g‘li deb hisoblardilar. Yusuf esa — Elining o‘g‘li,

²⁴Eli — Mattotning o‘g‘li, Mattot — Levining o‘g‘li, Levi — Malkiyning o‘g‘li, Malkiy — Yanayning o‘g‘li, Yanay — Yusufning o‘g‘li,

²⁵Yusuf — Mattatiyoning o‘g‘li, Mattatiyo — Amosning o‘g‘li, Amos — Noxumning o‘g‘li, Noxum — Heslining o‘g‘li, Hesli — Nagayning o‘g‘li,

²⁶Nagay — Mahatning o‘g‘li, Mahat — Mattatiyoning o‘g‘li, Mattatiyo — Shimeyning o‘g‘li, Shimey — Yo‘sehning o‘g‘li, Yo‘seh — Yo‘doning o‘g‘li,

²⁷Yo‘do — Yohananning o‘g‘li, Yohanan — Rezoning o‘g‘li, Rezo — Zarubabelning o‘g‘li, Zarubabel — Shaltiyolning o‘g‘li, Shaltiyol — Neriyning o‘g‘li,

²⁸Neriy — Malkiyning o‘g‘li, Malkiy — Addiyning o‘g‘li, Addiy — Qosamning o‘g‘li, Qosam — Elmodamning o‘g‘li, Elmodam — Gerning o‘g‘li,

²⁹Ger — Yoshuaning o‘g‘li, Yoshua — Eliazarning o‘g‘li, Eliazar — Yorimning o‘g‘li, Yorim — Mattotning o‘g‘li, Mattot — Levining o‘g‘li,

³⁰Levi — Shimo‘nning o‘g‘li, Shimo‘n — Yahudoning o‘g‘li, Yahudo — Yusufning o‘g‘li, Yusuf — Yunamning o‘g‘li, Yunam — Eliyaqimning o‘g‘li,

³¹Eliyaqim — Maliyoning o‘g‘li, Maliyo — Mannoning o‘g‘li, Manno — Mattatoning o‘g‘li, Mattato — Natanning o‘g‘li, Natan — Dovudning o‘g‘li,

³²Dovud — Essayning o‘g‘li, Essay — Obidning o‘g‘li, Obid — Bo‘azning o‘g‘li, Bo‘az — Salmo‘nning o‘g‘li, Salmo‘n — Nahsho‘nning o‘g‘li,

³³Nahsho‘n — Ominadovning o‘g‘li, Ominadov — Adminning o‘g‘li, Admin — Arniyning o‘g‘li, Arniy — Hasro‘nning o‘g‘li, Hasro‘n — Parasning o‘g‘li, Paras — Yahudoning o‘g‘li,

³⁴Yahudo — Yoqubning o‘g‘li, Yoqub — Is’hoqning o‘g‘li, Is’hoq — Ibrohimning o‘g‘li, Ibrohim — Terahning o‘g‘li, Terah — Naxo‘rning o‘g‘li,

³⁵Naxo‘r — Sarug‘ning o‘g‘li, Sarug‘ — Rag‘uning o‘g‘li, Rag‘u — Palaxning o‘g‘li, Palax — Ibirning o‘g‘li, Ibir — Shalahning o‘g‘li,

³⁶Shalah — Xenanning o‘g‘li, Xenan — Arpaxshodning o‘g‘li, Arpaxshod — Somning o‘g‘li, Som — Nuhning o‘g‘li, Nuh — Lamakning o‘g‘li,

³⁷Lamak — Matushalohning o‘g‘li, Matushaloh — Xano‘xning o‘g‘li, Xano‘x — Yoredning o‘g‘li, Yored — Maxaliyolning o‘g‘li, Maxaliyol — Xenanning o‘g‘li,

³⁸Xenan — Eno‘shning o‘g‘li, Eno‘sh — Shisning o‘g‘li, Shis — Odam Atoning o‘g‘li, Odam Ato — Xudoning o‘g‘li edi.