Read O‘zbek tilidagi Muqaddas Kitob, 2013 Luqo 6 Bible Online

Luqo 6 - O‘zbek tilidagi Muqaddas Kitob, 2013 bible

Luqo 6

¹Shabbat kunlarining birida Iso bug‘doyzordan o‘tib ketayotgan edi. Uning shogirdlari boshoqlardan uzib olib, kaftlarida uqalab, donlarini yeyayotgan edilar.

²Ba’zi farziylar esa ularga dedi: — Nega sizlar Shabbat kuni qonunga xilof ish qilyapsizlar?

³Iso ularga shunday javob berdi: — Dovud hamrohlari bilan och qolganda nimalar qilganini nahotki sizlar hech o‘qimagan bo‘lsangiz?!

⁴U Xudoning uyiga kirib, muqaddas nonlarni yegan. Hatto hamrohlariga ham bergan. Qonunga muvofiq esa bunday nonlarni faqat ruhoniylar yeyishga haqli edilar–ku!

⁵Iso yana dedi: — Inson O‘g‘li Shabbat kunining ham Hokimidir.

⁶Boshqa Shabbat kuni Iso sinagogaga kirib ta’lim berdi. U yerda o‘ng qo‘li qurib qolgan bir odam bor edi.

⁷Tavrot tafsirchilari bilan farziylar Isoni ayblash uchun biron sabab topish maqsadida: “Iso Shabbat kuni ham bu odamga shifo berarmikan”, deb Uni kuzatib turardilar.

⁸Iso ularning bu niyatini bila turib, qo‘li shol odamga: — O‘rningdan turib oldinga chiq! — deb buyurdi. U oldinga chiqdi.

⁹Iso yig‘ilganlarga dedi: — Sizlarga bir savolim bor. Qonunga muvofiq Shabbat kuni yaxshilik qilish kerakmi yoki yomonlikmi? Jonni xalos qilish kerakmi yoki nobud qilishmi?

¹⁰Iso ularning hammasiga nazar tashlab chiqdi–da, u odamga: — Qo‘lingni uzat! — dedi. U odam qo‘lini uzatishi bilanoq qo‘li soppa–sog‘ bo‘lib qoldi.

¹¹Tafsirchilar bilan farziylar g‘azabdan jazavasi tutib, Isoni nima qilsak ekan, deb muhokama qila boshladilar.

¹²O‘sha kunlarning birida Iso ibodat qilgani toqqa chiqdi. U tun bo‘yi Xudoga ibodat qildi.

¹³Tong otgach, shogirdlarini yoniga chaqirdi va oralaridan quyidagi o‘n ikkitasini tanlab olib, ularga havoriylar deb nom berdi:

¹⁴Shimo‘n (Iso unga Butrus deb ism berdi), uning ukasi Idris, Yoqub, Yuhanno, Filip, Bartolomey,

¹⁵Matto, To‘ma, Alfey o‘g‘li Yoqub, vatanparvar deb nom olgan Shimo‘n,

¹⁶Yoqub o‘g‘li Yahudo va keyinchalik xiyonat qilgan Yahudo Ishqariyot.

¹⁷Shundan so‘ng Iso ular bilan birga pastga tushib, tekis joyda to‘xtadi. Bu yerda Uning ko‘plab shogirdlari, shuningdek, butun Yahudiyadan, Quddusdan, Tir va Sidon sohillaridan kelgan bir talay olomon bor edi.

¹⁸Ular Isoni tinglagani va xastaliklaridan forig‘ bo‘lgani kelgan edilar. Yovuz ruhlardan azob chekayotgan odamlar ham shifo topdilar.

¹⁹Hamma odamlar qo‘llarini Isoga tekkizishga urinardi, chunki Undan bir kuch chiqib, hammaga shifo berardi.

²⁰Iso shogirdlariga qarab, dedi: “Ey kambag‘allar, sizlar baxtlisiz! Xudoning Shohligi sizlarnikidir.

²¹Ey hozir och bo‘lganlar, baxtlisiz! Sizlar to‘q bo‘lasizlar. Ey yig‘layotganlar, baxtlisiz! Sizlar quvonib kulasizlar.

²²Inson O‘g‘liga yon bosganingiz uchun Odamlar sizdan nafratlanganlarida, Jamiyatdan quvib, haqoratlaganlarida, Ismingizni qoralaganlarida, Sizlar baribir baxtlisizlar!

²³Shunday kunlar kelganda quvoning, shodlikdan sakrang. Sizlarni osmonda buyuk mukofot kutmoqda. Axir, sizlarga ozor yetkazayotgan odamlarning ota–bobolari ham payg‘ambarlarga shunday qilganlar.

²⁴Ey boylar, holingizga voy! Sizlar rohatingizni ko‘rib bo‘ldingizlar.

²⁵Ey qorni to‘qlar, holingizga voy! Sizlar och qolasizlar. Ey kulayotganlar, holingizga voy! Sizlar aza tutib, faryod qilasizlar.

²⁶Barcha odamlar sizni maqtaganda holingizga voy. Axir, ularning ota–bobolari Soxta payg‘ambarlarni ham xuddi shunday maqtaganlar.”

²⁷“Ey meni tinglayotganlar, sizlarga aytyapman: dushmanlaringizni sevinglar, sizdan nafratlanganlarga yaxshilik qilinglar.

²⁸Sizlarga la’nat aytganlarni duo qilinglar. Sizga ozor berganlar uchun ibodat qilinglar.

²⁹Bir chakkangizga ursalar, ikkinchisini ham tuting. Agar kimdir to‘ningizni tortib olsa, ko‘ylagingizni ham yechib bering.

³⁰Sizdan so‘raganlarning hammasiga bering. Agar kimdir narsangizni tortib olsa, “Qaytarib ber”, deb talab qilmang.

³¹Odamlar sizlarga nima qilishlarini istasangizlar, siz ham ularga o‘shani qilinglar.

³²Agar sizni sevganlarnigina yaxshi ko‘rsangiz, qanday savob qilgan bo‘lasizlar?! Hatto gunohkorlar ham o‘zlarini sevganlarni yaxshi ko‘radilar.

³³Agar o‘zingizga yaxshilik qilganlargagina yaxshilik qilsangiz, qanday savob qilgan bo‘lasiz?! Hatto gunohkorlar ham xuddi shunday qiladilar.

³⁴Agar siz qaytarib olishga umid qilib qarz bersangiz, qanday savob qilgan bo‘lasiz?! Hatto gunohkorlar ham qancha qarzlari bo‘lsa, hammasini qaytarib olish maqsadida gunohkorlarga qarz beradilar.

³⁵Lekin siz dushmanlaringizni seving, ularga yaxshilik qiling, qaytarib berishini o‘ylamay, qarz bering. Shunda buyuk mukofot olib, Xudoyi Taoloning farzandlari bo‘lasizlar. Axir, Uning O‘zi ham noshukurlarga va fosiqlarga mehribon–ku!

³⁶Otangiz rahmdil bo‘lgani kabi, sizlar ham rahmdil bo‘linglar.”

³⁷“Boshqalarni hukm qilmang, shunda Xudo ham sizlarni hukm qilmaydi. Boshqalarni ayblamang, shunda Xudo ham sizni ayblamaydi. Boshqalarni kechiring, shunda Xudo sizni kechiradi.

³⁸Boshqalarga bering, Xudo ham sizlarga beradi, mo‘l–ko‘l qilib beradi, bosib, silkitib to‘ldirilgan, toshib–to‘kilgan o‘lchov bilan qo‘yningizni to‘ldiradi. Sizlar qanday o‘lchov bilan o‘lchasangizlar, Xudo ham sizlarga xuddi shunday o‘lchov bilan o‘lchab beradi.”

³⁹Iso ularga quyidagi matalni ham aytib berdi: “Ko‘r odam ko‘rni yetaklab yura oladimi?! Ikkalasi ham chuqurga qulab tushadi–ku!

⁴⁰Shogird ustozidan ustun bo‘lmas. Ammo mukammal bilim egallagan shogird ustoziday bo‘lar.

⁴¹Nima uchun sen birodaringning ko‘zidagi zirapchani ko‘rasan–u, o‘z ko‘zingdagi xodani sezmaysan?

⁴²Ko‘zingdagi xodani ko‘rmay turib qanday qilib birodaringga: “Kel, ko‘zingdagi zirapchani olib tashlay”, deb aytasan? Hoy, ikkiyuzlamachi! Oldin ko‘zingdagi xodani chiqarib ol, shunda ko‘zing tiniq ko‘radi va birodaringning ko‘zidan zirapchani chiqara olasan.”

⁴³“Yaxshi daraxt yomon meva bermas, yomon daraxt esa yaxshi meva bermas.

⁴⁴Har bir daraxtning qandayligi o‘z mevasidan bilinadi. Tikanzordan anjir terilmaydi, butazordan uzum uzilmaydi.

⁴⁵Yaxshi odam yuragining ezgulik xazinasidan yaxshilik chiqaradi, yomon odam yuragining yomonlik xazinasidan yomonlik chiqaradi. Odamning dili nimaga to‘lib–toshsa, o‘sha tiliga chiqadi.”

⁴⁶“Nega sizlar Meni “Yo Rabbiy, yo Rabbiy!” deb chaqirasiz–u, ammo aytganlarimni qilmaysizlar?

⁴⁷Mening oldimga kelgan va so‘zlarimni eshitib, ularga rioya qilgan odam kimga o‘xshashini bilasizlarmi?

⁴⁸Uy qurayotganda, chuqur handaq qazib, tosh ustiga poydevor o‘rnatgan kishiga o‘xshaydi u. Sel toshib, o‘sha uyni suv bosadi, lekin uyni qo‘zg‘ata olmaydi. Chunki uy mahkam o‘rnatilgan.

⁴⁹Ammo Mening so‘zlarimni tinglab, ularga rioya qilmaydigan odam uyni tuproq ustiga, poydevorsiz qurgan kishiga o‘xshaydi. Uyni suv bosganda, uy o‘sha zahoti qulab tushadi. Uy butunlay vayron bo‘ladi.”