Read O‘zbek tilidagi Muqaddas Kitob, 2013 Qonunlar 10 Bible Online

Qonunlar 10 - O‘zbek tilidagi Muqaddas Kitob, 2013 bible

Qonunlar 10

¹Shundan keyin Egamiz menga dedi: “Ikkita tosh lavhani kesib ol. Ular oldingilariga o‘xshagan bo‘lsin. Keyin toqqa Mening oldimga chiq. Yana yog‘ochdan bir sandiq yasa.

²Men o‘sha tosh lavhalarga sen sindirgan lavhalardagi amrlarni yozaman. Sen lavhalarni sandiqqa solib qo‘yasan.”

³Shunday qilib, men akas yog‘ochidan sandiq yasadim, oldingisiga o‘xshagan ikkita tosh lavhani kesib oldim. Keyin ikkala toshni ko‘tarib, toqqa chiqdim.

⁴Egamiz tosh lavhalarga oldingiday o‘nta amrni yozdi. Sizlar tog‘da yig‘ilganingizda o‘sha amrlar Egamiz olov ichidan sizga aytgan so‘zlarning o‘zginasi edi. Egamiz o‘sha lavhalarni menga berdi.

⁵Men tog‘dan qaytib tushdim. Egamizning amriga ko‘ra, lavhalarni sandiqqa soldim. Lavhalar hali ham o‘sha sandiqda turibdi.

⁶(Isroil xalqi Yaqon urug‘iga qarashli quduqlardan Mosaraxga yo‘l oldi. Horun o‘sha yerda vafot etib, dafn qilindi. O‘rniga o‘g‘li Elazar ruhoniy bo‘ldi.

⁷Isroil xalqi u yerdan Gudgodaxga, Gudgodaxdan oqar suvlar o‘lkasi Yotbotoga borishdi.

⁸Egamiz: “Mening ahd sandig‘imni ko‘tarib yursin, Mening huzurimda xizmat qilsin, Mening ismim bilan odamlarni duo qilsin”, deb o‘shanda Levi qabilasini tanlab olgan edi. Ular bugungacha ham shu xizmatni ado etib kelmoqdalar.

⁹Shuning uchun Levi qabilasiga birodarlari orasidan ulush ham, mulk ham berilmagan. Zotan Levi qabilasining ulushi Egamizning O‘zidir. Bu gapni Egangiz Xudoning O‘zi aytdi.)

¹⁰Men yana oldingiday tog‘da qirq kechayu qirq kunduz qoldim. Egamiz bu safar ham mening iltijoimni eshitib, sizlarni halok qilmaydigan bo‘ldi.

¹¹U menga shunday dedi: “Qani, xalqni boshla. Ularni Men ota–bobolariga qasam ichib va’da bergan yurtga olib bor. Ular o‘sha yurtga borib, uni qo‘lga kiritishsin.”

¹²Ey Isroil xalqi! Egangiz Xudo sizlardan bitta narsani talab qiladi: Egangiz Xudodan qo‘rqing, Uning yo‘lidan yuring, Egangiz Xudoni seving, butun qalbingiz bilan, jonu dilingiz bilan Unga xizmat qiling.

¹³Men bugun sizlarga berayotgan Egamizning amru farmonlariga rioya qiling, shunda baxtiyor bo‘lasiz.

¹⁴Osmon va falak toqi, yer yuzi va undagi hamma narsa Egangiz Xudonikidir.

¹⁵Ammo Egamiz faqatgina ota–bobolaringizga qattiq muhabbat qo‘ydi. Mana bugun ko‘rib turganingizday, ularning avlodini, sizlarni barcha xalqlar orasidan tanlab oldi.

¹⁶Yuraklaringizni sunnat qilinglar, bundan keyin o‘jar bo‘lmanglar.

¹⁷Egangiz Xudo xudolarning Xudosidir, egalarning Egasidir, buyuk qudratli, qo‘rqinchli Xudodir. U tarafkashlik qilmaydi, pora olmaydi.

¹⁸Yetim va bevalarga adolat qiladi, musofirga mehribonlik qiladi, ularga non va kiyim beradi.

¹⁹Sizlar ham musofirlarga mehribon bo‘linglar, o‘zlaringiz ham Misrda musofir edingizlar.

²⁰Egangiz Xudodan qo‘rqinglar. Yolg‘iz Unga sajda qilinglar, Unga sodiq bo‘lib, Uning nomi bilan qasam ichinglar.

²¹Faqat Unga hamdlar aytinglar, chunki U sizlarning Xudoyingizdir. Sizlar o‘z ko‘zingiz bilan Uning buyuk va qo‘rqinchli alomatlarini ko‘rdingiz.

²²Misrga borgan ota–bobolaringiz yetmish kishi edi, xolos. Endi esa Egangiz Xudo sizlarni osmondagi yulduzlar kabi son–sanoqsiz qildi.