Read O‘zbek tilidagi Muqaddas Kitob, 2013 Qonunlar 11 Bible Online

Qonunlar 11 - O‘zbek tilidagi Muqaddas Kitob, 2013 bible

Qonunlar 11

¹Egangiz Xudoni sevinglar. Har doim Uning amrlariga, qonun–qoidalariga va farmonlariga rioya qilinglar, talablarini bajaringlar.

²Shuni unutmanglarki, bolalaringiz emas, sizlar Egangiz Xudoning tarbiyasini olgansizlar. Farzandlaringiz Egamizning buyukligini, qudrati va ajoyibotlarini ko‘rmagan.

³Egamiz Misr fir’avniga va uning butun yurtiga qilgan mo‘jizalaru ishlarini ular bilmaydi.

⁴Orqangizdan quvayotgan Misr lashkarini, ot–aravalarini Egamiz Qizil dengizga cho‘ktirib, tamomila yo‘q qilganini bolalaringiz ko‘rmagan.

⁵Shu yerga yetib kelguningizcha sahroda Egamiz sizlarga nimalar qilganini ular bilmaydilar.

⁶Ruben qabilasidan Eliyobning o‘g‘illari Datan va Aburamni Egamiz nimalar qilganini bilmaydilar. Butun Isroil xalqining ko‘z o‘ngida yer yorilib ularni, oilalarini, chodirlarini, ularga qarashli barcha jonivorlarni yutib yuborganini bolalaringiz ko‘rmagan.

⁷Egamizning qilgan barcha buyuk ishlarni bolalaringiz emas, sizlar o‘z ko‘zingiz bilan ko‘rdingiz.

⁸Shunday ekan, Men bugun sizlarga berayotgan amrlarning hammasiga rioya qilinglar. Shunda kuchli bo‘lasizlar. Iordan daryosidan kechib, mulk qilib oladigan yurtni qo‘lga kiritasizlar.

⁹Egamiz ota–bobolaringizga va ularning avlodiga qasam ichib, va’da bergan sut va asal oqib yotgan yurtda uzoq yashaysizlar.

¹⁰Sizlar kirib mulk qilib olayotgan bu yer o‘zlaringiz chiqqan Misr yurtiday emas. Misrda sabzavot urug‘ini o‘zlaringiz ekib, o‘zlaringiz sug‘orar edingizlar.

¹¹Sizlar Iordanni kechib o‘tib, mulk qilib oladigan yurtdagi qirlaru vodiylarni esa osmon yomg‘iri sug‘oradi.

¹²Egangiz Xudoning O‘zi uni parvarish qiladi. Yil boshidan oxirigacha Egangiz Xudoning ko‘zi doim o‘sha yurtdadir.

¹³Bugun men sizlarga berayotgan amrlarga quloq solinglar, Egangiz Xudoni sevinglar, Unga butun qalbingiz bilan, jonu dilingiz bilan xizmat qilinglar.

¹⁴Shunda U yeringizga kuz va bahor yomg‘irini o‘z vaqtida yog‘diradi. Doningizni, sharobingizni va zaytun moyingizni yig‘ib olasiz.

¹⁵Egamiz dalalaringizda chorvangiz uchun o‘t o‘stiradi, sizlarning rizqingiz ham but bo‘ladi.

¹⁶Ammo ehtiyot bo‘linglar! Yana vasvasaga tushib, yo‘ldan ozmanglar. Boshqa xudolarga xizmat qilib, sig‘inmanglar.

¹⁷Aks holda Egamiz sizlardan g‘azablanib, osmonni yopib qo‘yadi, yomg‘ir yog‘maydi, yer hosil bermaydi. Natijada Egamiz sizlarga mulk qilib berayotgan yaxshi yurtdan tez qirilib ketasizlar.

¹⁸Mening bu so‘zlarimni yuragingiz va qalbingizda saqlanglar. Bularni qo‘lingizga belgi qilib bog‘langlar, peshanangizga nishon qilib taqib olinglar.

¹⁹Bularni bolalaringizga o‘rgatinglar. Uyda o‘tirganda ham, yo‘lda yurganda ham, yotganingizda, turganingizda ham shular haqida gapiringlar.

²⁰Eshigingiz kesakisiga, darvozalaringizga yozib qo‘yinglar,

²¹toki Egamiz ota–bobolaringizga qasam ichib, mulk qilib beraman, deb va’da qilgan yurtda o‘zlaringiz ham, farzandlaringiz ham uzoq umr ko‘ringlar. Osmon yer ustida qancha tursa, o‘sha yurtda shuncha yashanglar.

²²Men bugun sizlarga aytayotgan amrlarni bitta qoldirmay bajarsangiz, Egangiz Xudoni sevsangiz, Uning yo‘lidan yursangiz, Unga sodiq bo‘lsangiz,

²³Egamiz bu yurtdagi xalqlarning hammasini sizlarning oldingizdan haydaydi. Sizlar o‘zingizdan ko‘proq va qudratliroq xalqlarning yurtlarini egallab olasiz.

²⁴Oyog‘ingiz tekkan har qanday yer sizniki bo‘ladi. Chegarangiz janubdagi sahrodan to shimoldagi Lubnongacha, sharqdagi Furot daryosidan to g‘arbdagi O‘rta yer dengizigacha cho‘ziladi.

²⁵Sizlarga hech kim bas kela olmaydi. Egangiz Xudo sizlarga va’da berganday, qadamingiz yetib borgan yerdagi hammani sizlardan qo‘rqadigan, vahimaga tushadigan qilib qo‘yadi.

²⁶Mana bugun men sizlarga barakani yoki la’natni tanlang, deyapman.

²⁷Men bugun sizlarga aytayotgan Egangiz Xudoning amrlarini bajarsangiz, baraka topasiz.

²⁸Bordi–yu, Uning amrlariga quloq solmasangiz, bugun sizlarga buyurayotgan yo‘ldan ozsangiz, oldin bilmagan xudolarga ergashsangiz, la’nati bo‘lasiz.

²⁹Egangiz Xudo o‘zlaringizga mulk qilib berayotgan yerga sizlarni olib kirganda, Garizim tog‘idan barakalarni aytinglar, Ebal tog‘idan la’natlarni aytinglar.

³⁰Bu ikkala tog‘ Iordanning kunbotar tomonida joylashgan. Ular Iordan vodiysida yashaydigan Kan’onliklar yurtida, Gilgal yaqinida, Mo‘redagi emanzor yonidadir.

³¹Iordandan kechib o‘tib, Egangiz Xudo sizlarga mulk qilib beradigan yurtni olasizlar. U yerni qo‘lga kiritib joylashib olganingizda,

³²men bugun sizlarga aytayotgan Uning hamma farmonlari va qonun–qoidalarini bitta qoldirmay bajaringlar.