Read O‘zbek tilidagi Muqaddas Kitob, 2013 Qonunlar 15 Bible Online

Qonunlar 15 - O‘zbek tilidagi Muqaddas Kitob, 2013 bible

Qonunlar 15

¹Har yettinchi yilning oxirida qarzlaringizdan kechinglar.

²Qarzdan kechish shundan iboratki, yaqiniga qarz bergan odam qarzidan kechsin. Isroil xalqidan bo‘lgan birodaridan o‘sha qarzini so‘ramasin, chunki Egamiz qarzdan kechishni e’lon qildi.

³Begonadan qarzingizni so‘rasangiz bo‘ladi. Isroil xalqidan bo‘lgan birodaringizdan esa qarzingizni so‘ramang.

⁴Sizlarning orangizda kambag‘al bo‘lmaydi. Egangiz Xudo mulk qilib berayotgan yurtda sizlarga baraka beradi.

⁵Faqat Egangiz Xudoga itoat etib, Men bugun sizlarga berayotgan mana shu amrlarni bitta qoldirmay bajarishingiz kerak.

⁶Egangiz Xudo O‘zi va’da qilganday, sizlarga baraka berganda, ko‘p xalqlarga qarz berasiz, o‘zingiz esa ulardan qarz olmaysiz. Ko‘p xalqlar ustidan hukmronlik qilasiz, ular esa sizlarning ustingizdan hukmronlik qilmaydi.

⁷Egangiz Xudo sizga beradigan yurtdagi shaharlaringizning birida Isroillik birodaringizdan birortasi kambag‘al bo‘lsa, kambag‘al birodaringizga bag‘ritoshlik qilmang, ziqna bo‘lmang.

⁸Ochiq qo‘l bo‘ling, unga kerakli narsani yetarlicha qarzga bering.

⁹Ehtiyot bo‘ling, ko‘nglingizda yomon niyat qilmang, yettinchi yil, qarzdan kechish yili kelyapti, deb kambag‘al birodaringizga nafrat bilan qaramang, unga yo‘q demang. Aks holda birodaringiz Egamizga sizdan noliydi, natijada siz gunoh orttirib olasiz.

¹⁰Unga saxiylik bilan qarz bering, buning uchun achinmang. Shunda Egangiz Xudo har bir ishingizga baraka beradi.

¹¹Yer yuzida har doim kambag‘allar bo‘ladi. Shuning uchun sizlarga amrim shuki, yurtingizdagi kambag‘al, muhtoj birodaringizga ochiq qo‘l bo‘ling.

¹²Birodaringizdan ibroniy erkagi yoki ayoli sizga o‘zini sotsa, olti yil xizmat qilsin, yettinchi yili uni ozod qilishingiz kerak.

¹³Uni ozod qilganingizda, quruq jo‘natmang.

¹⁴Unga saxiylik bilan mol–qo‘yingizdan, don, sharobingizdan bering, Egangiz Xudo sizlarga ato etgan barakadan bering.

¹⁵Yodingizda tuting: sizlar ham Misr yurtida qul bo‘lgansiz, Egangiz Xudo sizlarni ozod qilgan. Shuning uchun men bugun sizlarga o‘sha amrni berdim.

¹⁶Agar qulingiz, sizni, oilangizni yaxshi ko‘raman, sizning xonadoningizda o‘zimga to‘qman, siznikidan ketmayman, deb aytsa,

¹⁷uni uyingiz eshigi yoniga olib boring. Qulog‘ini eshikka qo‘yib, bigiz bilan teshing. Shunda u bir umr sizning qulingiz bo‘ladi, cho‘ringizni ham shunday qiling.

¹⁸Qulingizni ozod qilayotganingizda afsuslanmang, chunki u olti yil ichida mardikorning haqiga arziydigan mehnatni qildi. Uni ozod qilsangiz Egangiz Xudo qilgan har bir ishingizga baraka beradi.

¹⁹Mol–qo‘ylaringizning birinchi tug‘ilgan erkagini Egangiz Xudoga bag‘ishlang. Birinchi tug‘ilgan buqangizni ishlatmang, birinchi tug‘ilgan qo‘yingizning yungini olmang.

²⁰Bularning go‘shtini Egamiz tanlaydigan joyda, o‘zingiz oilalaringiz bilan birga har yili Uning huzurida yenglar.

²¹Agar o‘sha hayvon cho‘loq yoki ko‘r bo‘lsa yo uning boshqa bir nuqsoni bo‘lsa, uni Egangiz Xudoga qurbonlik qilmang.

²²Uni shaharlaringizda yeyaveringlar. Pok odam ham, harom odam ham, ohu va kiyikni yeganday, uning go‘shtini yesa bo‘ladi.

²³Faqat qonini iste’mol qilmang. Qonni suv singari yerga to‘kib tashlang.