Read O‘zbek tilidagi Muqaddas Kitob, 2013 Qonunlar 17 Bible Online

Qonunlar 17 - O‘zbek tilidagi Muqaddas Kitob, 2013 bible

Qonunlar 17

¹Nuqsoni yoki kamchiligi bor mol–qo‘ylarni Egangiz Xudoga qurbonlik qilmanglar. Bu Egangiz Xudoga jirkanchdir.

²Egangiz Xudo sizga berayotgan shaharlarning birida orangizdan birorta erkak yoki ayol Egangiz oldida qabihlik qilib, Uning ahdini buzsa,

³begona xudolarga xizmat qilsa, o‘sha xudolarga yoki quyoshga, oyga va samoviy jismlarga topinsa, taqiqlangan bu ishlarni qilsa,

⁴bu voqeadan sizlar xabardor bo‘lsangiz, eshitganlaringizni yaxshilab tekshiringlar. Isroil xalqi orasida haqiqatan ham bunday jirkanch ish qilingan bo‘lsa,

⁵o‘sha gunohkor erkak yoki ayolni shahar darvozasidan tashqariga olib chiqib, toshbo‘ron qilib o‘ldiringlar.

⁶Odam faqat ikkita yoki uchta guvohning so‘zi bilan o‘limga hukm qilinishi mumkin, bitta guvohning so‘zi bilan o‘ldirilmasin.

⁷Gunohkorga birinchi bo‘lib guvohlar tosh otsin, keyin butun xalq uni toshbo‘ron qilsin. Shunday qilib, orangizdan yomonlikni yo‘q qilinglar.

⁸Agar shahringizda qon to‘kish, haq–huquq talashish va zo‘ravonlik kabi mojarolarni hukm qilish qiyin bo‘lsa, Egangiz Xudo tanlaydigan joyga boringlar.

⁹Levi ruhoniylarining va o‘sha vaqtda xizmatda bo‘lgan hakamning oldiga borib, ulardan so‘ranglar. Ular hukm chiqaradi.

¹⁰Ular chiqargan hukm bo‘yicha ish tutinglar, o‘rgatganlarini bitta qoldirmay bajaringlar.

¹¹Tushuntirgan qonunni va qonunga asosan chiqargan hukmni to‘liq bajaringlar. Ularning aytganlaridan chapga ham, o‘ngga ham og‘manglar.

¹²Egangiz Xudoning xizmatida turgan ruhoniy va hakamning gapiga quloq solmay, o‘zboshimcha ish tutgan odam o‘lishi kerak. Shunday qilsangiz, Isroil xalqi orasidan yomonlikni yo‘q qilgan bo‘lasizlar.

¹³Butun xalq bu voqeani eshitib qo‘rqadi, bundan keyin o‘zboshimcha ish qilmaydigan bo‘ladi.

¹⁴Egangiz Xudo sizlarga beradigan yurtga borib, u yerga joylashib, egalik qilasizlar. Shundan keyin, “Atrofimizdagi xalqlarga o‘xshab biz ham ustimizdan shoh qo‘yaylik”, deysiz.

¹⁵Ko‘taradigan shohingiz albatta Egangiz Xudo tomonidan tanlangan bo‘lsin. Shoh o‘z xalqingizdan bo‘lsin. Begona bo‘lgan musofirni ustingizdan shoh qilishingiz mumkin emas.

¹⁶Shoh o‘zi uchun ot ko‘paytirmasin, ot sotib olish uchun odamlarni Misrga jo‘natmasin. Chunki Egamiz sizlarga: “U yerga qaytib bormanglar”, degan.

¹⁷Tayinlangan shoh xotinlarni ko‘paytirmasin, aks holda Egamizdan yuragi soviydi. O‘zi uchun ko‘p miqdorda oltin va kumushni yig‘masin.

¹⁸U shohlik taxtiga o‘tirganda, levi ruhoniylari saqlagan Tavrotdan o‘zi uchun bir nusxa ko‘chirtirib olsin.

¹⁹Tavrotning o‘sha nusxasi doimo shohning yonida bo‘lsin. Shoh uni har kuni, umri davomida o‘qisin, toki o‘zining Egasi Xudodan qo‘rqishni o‘rgansin, Tavrot va farmonlarning so‘zlarini bitta qoldirmay bajarsin.

²⁰O‘zini birodarlaridan ustun qo‘ymasin, amrlardan chapga ham, o‘ngga ham og‘masin. Shunda o‘zi ham, o‘g‘illari ham Isroil ustidan uzoq yillar hukmronlik qiladilar.