Read O‘zbek tilidagi Muqaddas Kitob, 2013 Qonunlar 18 Bible Online

Qonunlar 18 - O‘zbek tilidagi Muqaddas Kitob, 2013 bible

Qonunlar 18

¹Levi ruhoniylari, butun Levi qabilasi qatorida, Isroilda ulush ham, mulk ham olmaydilar. Ular Egamizga keltirilgan nazr va qurbonliklardan yeydilar.

²Birodarlari orasida ularning ulushi bo‘lmaydi. Egamiz Levi qabilasiga: “Men O‘zim sizlarning ulushingiz bo‘laman”, deb va’da bergan edi.

³Qurbonlik qilingan mol yoki qo‘yning yelka, jag‘ va ichak–chovoqlari ruhoniylarga berilsin.

⁴G‘allangizning ilk hosilini, eng birinchi tayyorlagan sharobingizni va zaytun moyingizni, qo‘ylaringizning birinchi qirqilgan yungini ruhoniylarga beringlar.

⁵Chunki Egangiz Xudo, Levi qabilasi va ularning avlodlari har doim Menga xizmat qilishsin, deb ularni qabilalaringiz orasidan tanlab oldi.

⁶Agar biror levi Isroildagi o‘zi yashab turgan shahardan Egamiz tanlagan joyga o‘z xohishi bilan borsa,

⁷u yerda Egamizga xizmat qilgan levi birodarlari singari Egasi Xudo nomidan xizmat qila oladi.

⁸Oilasining mulkini sotishdan kelgan daromadi bo‘lsa ham, boshqa levilar qatori bir xil ulush yesin.

⁹Egangiz Xudo beradigan yurtga kirganingizda, u yerdagi xalqlarning jirkanch odatlarini o‘rganmanglar.

¹⁰O‘g‘li yoki qizini olovda qurbon qiladigan, folbin, bashoratgo‘y, romchi, sehrgar,

¹¹issiq–sovuq qiladigan, arvoh chaqiruvchi, o‘liklardan maslahat so‘raydiganlar orangizda bo‘lmasin.

¹²Egamiz bundaylardan jirkanadi. Mana shu jirkanch odatlari uchun Egangiz Xudo o‘sha xalqlarni sizning oldingizdan haydab chiqaryapti.

¹³Egangiz Xudoga butunlay sodiq qoling.

¹⁴Sizlar yurtini olayotgan o‘sha xalqlar bashoratgo‘ylar va folbinlarning gapiga quloq soladilar. Sizlarning bunday qilishingizga esa Egangiz Xudo ruxsat bermaydi.

¹⁵Egangiz Xudo sizlar uchun xalqingiz orasidan menga o‘xshagan bir payg‘ambar chiqaradi. Unga quloq solinglar.

¹⁶Siz Sinay tog‘ida yig‘ilgan kuningizda Egangiz Xudodan o‘zingiz uni tilab olgandingiz, zotan siz shunday degan edingiz: “Egamiz Xudoning ovozini ikkinchi eshitmaylik, mana shu buyuk olovni ham boshqa ko‘rmaylik, aks holda o‘lamiz.”

¹⁷O‘shanda Egamiz menga shunday dedi: “Ularning aytganlari to‘g‘ri.

¹⁸Ular uchun o‘z xalqi orasidan senga o‘xshagan bir payg‘ambar chiqaraman, Men unga nima aytishni o‘rgataman. O‘sha payg‘ambar bergan amrlarimning hammasini ularga aytadi.

¹⁹U Mening nomimdan gapiradi, unga quloq solmagan odamni Men O‘zim jazolayman.

²⁰Ammo biror payg‘ambar Men buyurmagan so‘zni Mening nomimdan gapirishga jur’at qilsa yoki boshqa xudolar nomidan gapirsa, u payg‘ambar o‘lishi kerak.”

²¹Ko‘nglingizda: “Bu so‘zlar Egamizdanmi yoki yo‘qmi, biz qanday qilib bilamiz?”, deb o‘ylashingiz mumkin.

²²Agar biror payg‘ambar Egamizning nomidan gapirsayu o‘sha voqea yuz bermasa, demak, bu so‘zni Egamiz aytmagan bo‘ladi. Payg‘ambar o‘zicha gapirgan, undan qo‘rqmanglar.