Read O‘zbek tilidagi Muqaddas Kitob, 2013 Qonunlar 19 Bible Online

Qonunlar 19 - O‘zbek tilidagi Muqaddas Kitob, 2013 bible

Qonunlar 19

¹Egangiz Xudo sizlarga beradigan yurtning xalqlarini yo‘q qilganda, sizlar o‘sha yurtni mulk qilasizlar, shaharlariga, uylariga joylashasizlar.

²[2-3] O‘shanda yurtni uch qismga bo‘linglar. Har bir qismida bittadan panoh shahar ajratinglar. O‘sha shaharlarga boradigan yo‘llar quringlar, toki qotil o‘sha shaharlarning biriga qochib bora olsin.

⁴Birovni adovatsiz, bilmasdan o‘ldirib qo‘ygan odam o‘sha shaharlarning biriga qochib, tirik qoladi.

⁵Masalan, bir odam boshqasi bilan daraxt kesgani o‘rmonga bordi, deylik. U daraxt kesmoqchi bo‘lib boltani ko‘targanda, bolta sopidan chiqib ketib, sherigiga borib tegsayu, sherigi o‘lib qolsa, qotil o‘sha shaharlarning biriga qochib borib tirik qoladi.

⁶Aks holda marhumning xunini oladigan odam qotilning orqasidan quvishi mumkin, yo‘l uzoq bo‘lganidan unga yetib olib, o‘ldirishi mumkin. Lekin u o‘limga loyiq emas, chunki marhumga oldindan uning adovati yo‘q edi.

⁷Uchta shahar ajratinglar, deb sizlarga buyurganimning sababi shudir.

⁸[8-9] Egangiz Xudoni seving, har doim uning yo‘lidan yuring, deb sizlarga bugun amr qildim. Agar sizlar bu amrlarni bitta qoldirmay bajarsangiz, Egangiz Xudo ota–bobolaringizga qasam ichib, bergan va’dasiga ko‘ra, yerlaringizni kengaytiradi, va’da qilgan butun yurtni sizga beradi. Shunda sizlar ajratgan uchta shahringizga yana uchta panoh shahar qo‘shinglar,

¹⁰toki Egangiz Xudo sizlarga mulk qilib berayotgan yurtda aybsizning qoni to‘kilmasin. Sizlar qon uchun javobgar bo‘lib qolmanglar.

¹¹Lekin birorta odam boshqasini adovat bilan poylab turib, hujum qilib o‘ldirsa, so‘ng o‘sha shaharlarning birortasiga qochib borsa,

¹²qotilning ona shahridagi oqsoqollar qotil orqasidan odam yuborib, uni oldirib kelsin. Qotilni qasoskorning qo‘liga topshirsin. Qotil o‘ldirilishi kerak.

¹³Unga rahm qilmanglar, Isroilni aybsizning qonidan tozalanglar. Shunda baxtiyor bo‘lasiz.

¹⁴Egangiz Xudo sizlarga mulk qilib berayotgan yerda, ota–bobolaringiz ilgaridan belgilagan qo‘shningizning chegarasini surmanglar.

¹⁵Birovni gunoh yoki jinoyat qilishda ayblash uchun bitta guvoh yetarli emas. Ish ikkita yoki uchta guvohning so‘zlari asosida ko‘rib chiqiladi.

¹⁶Agar soxta guvoh yomon niyat bilan birortasini ayblasa,

¹⁷janjallashayotgan ikkala odam Egamizning huzuriga borsinlar. O‘sha kunlarda xizmatini o‘tayotgan ruhoniylarga va hakamlarga uchrashsinlar.

¹⁸Hakamlar ishni yaxshilab ko‘rib chiqishsin. Agar guvoh birodariga qarshi yolg‘on guvohlik berayotgan bo‘lsa,

¹⁹birodariga qarshi o‘ylagan niyatini o‘ziga qaytaringlar. Shu tariqa orangizdan yomonlikni yo‘q qilinglar.

²⁰Boshqalar bo‘lib o‘tgan voqealarni eshitib, qo‘rqadilar, orangizda bunday jinoyatni boshqa qilmaydilar.

²¹Bundaylarga rahm qilmanglar: jonga — jon, ko‘zga — ko‘z, tishga — tish, qo‘lga — qo‘l, oyoqqa — oyoq.