Read O‘zbek tilidagi Muqaddas Kitob, 2013 Qonunlar 20 Bible Online

Qonunlar 20 - O‘zbek tilidagi Muqaddas Kitob, 2013 bible

Qonunlar 20

¹Dushmanlaringizga qarshi urushga borganingizda, otlarni, aravalarni, o‘zingiznikidan ko‘proq bo‘lgan lashkarni ko‘rsalaringiz, ulardan qo‘rqmanglar. Chunki sizlarni Misrdan olib chiqqan Egangiz Xudo sizlar bilandir.

²Jangga kirishingizdan oldin, ruhoniy lashkarning oldiga chiqsin,

³ularga shunday desin: “Quloq sol, ey Isroil xalqi! Bugun sizlar dushmanlaringizga qarshi jangga chiqyapsizlar. Dadil bo‘linglar, qo‘rqmanglar, dushman oldida vahimaga tushmanglar.

⁴Egamiz Xudoning O‘zi sizlar bilan urushga boradi! Sizlar uchun dushmanlaringizga qarshi jang qiladi, sizlarga g‘alaba beradi!”

⁵Nazoratchilar lashkarga shunday deb aytsin: “Orangizda yangi uy qurib, o‘sha uyini hali Xudoga bag‘ishlab ulgurmagan birorta odam bormi? Bor bo‘lsa, uyiga qaytsin. Agar u jangda halok bo‘lsa, boshqa odam uning uyini bag‘ishlaydi.

⁶Uzumzor ekib, hali mevasidan yemagan odam bormi? Agar bor bo‘lsa, uyiga qaytib ketsin. U jangda halok bo‘lsa, boshqa odam uning uzumzori mevasidan birinchi bo‘lib tatiydi.

⁷Biror qizga unashtirilib, hali uylanmagan yigit bormi? Agar bor bo‘lsa, uyiga qaytib ketsin. U jangda halok bo‘lsa, boshqa odam o‘sha qizga uylanadi.”

⁸Nazoratchilar yana shunday deyishsin: “Orangizda qo‘rquvdan yuragini oldirib qo‘ygan odam bormi? Bor bo‘lsa, uyiga qaytib ketsin. Bo‘lmasa birodarlari ham unga o‘xshab cho‘chib qoladi.”

⁹Nazoratchilar lashkarga shu gaplarni aytib bo‘lgandan keyin, lashkarboshilar bosh bo‘lsin.

¹⁰Biror shaharni olish uchun yaqinlashganingizda, shahar ahliga sulh taklif qiling.

¹¹Ular sulhga rozi bo‘lib, darvozalarini ochib bersa, shaharning butun aholisi sizlarga qarol bo‘lib xizmat qiladi.

¹²Agar shahar ahli sulhga rozi bo‘lmay, sizlar bilan jang qilsa, shaharni qamal qilinglar.

¹³Egangiz Xudo u shaharni sizning qo‘lingizga berganda, butun erkak zotini qilichdan o‘tkazinglar.

¹⁴Faqat ayollarni, bolalarni, mollarni va shaharda qolgan hamma narsani o‘lja qilib olsangiz bo‘ladi. Egangiz Xudo sizlarning qo‘lingizga bergan, dushmanlardan olgan o‘ljalarni ishlatishingiz mumkin.

¹⁵Sizlar egalik qiladigan yurtingizdan uzoqda joylashgan shaharlarni shunday qilinglar.

¹⁶Lekin Egangiz Xudo sizlarga mulk qilib berayotgan yurtdagi shaharlarni qo‘lga olganingizda bironta jonni tirik qoldirmanglar.

¹⁷Egangiz Xudo sizlarga amr etganiday, Xet, Amor, Kan’on, Pariz, Xiv, Yobus xalqlarini tamomila qirib bitiringlar.

¹⁸Toki ular o‘zlarining xudolariga qilgan jirkanch odatlarini sizlarga o‘rgatmasin. Aks holda sizlar Egangiz Xudoga qarshi gunoh qilgan bo‘lasizlar.

¹⁹Agar biror shaharni qo‘lga kiritish uchun uzoq vaqt qamal qilib tursalaringiz, u yerdagi mevali daraxtlarni kesmanglar. O‘sha daraxtlarning mevasini yeyishingiz mumkin, daraxtlarning o‘zini esa kesib tashlamanglar. Axir, daladagi daraxtlar odam emas–ku, qurshovdan qochib chiqsa!

²⁰Meva bermaydigan daraxtlarni esa kesishingiz mumkin. Shahar qulamagunicha qamal inshootlarni qurishda o‘sha daraxtlardan foydalansangiz bo‘ladi.