Read O‘zbek tilidagi Muqaddas Kitob, 2013 Qonunlar 22 Bible Online

Qonunlar 22 - O‘zbek tilidagi Muqaddas Kitob, 2013 bible

Qonunlar 22

¹Birodaringizning adashib qolgan molini yoki qo‘yini ko‘rib qolganingizda, o‘zingizni ko‘rmaganga olmang, uni albatta egasiga qaytarib olib boring.

²Agar hayvonning egasi sizdan uzoqda yashasa yoki siz egasini tanimasangiz, uyingizga olib boring. Egasi kelib olib ketmaguncha unga qarab turing, keyin qaytarib bering.

³Birodaringizning eshagiga ham, kiyimiga ham, siz topib olgan har qanday narsasiga shunday munosabatda bo‘ling. O‘zingizni ko‘rmaganga olmang.

⁴Birodaringizning eshagi yoki ho‘kizi yo‘lda yotib qolganini ko‘rsangiz, o‘zingizni ko‘rmaganga olmang, ularni turg‘izishga yordam bering.

⁵Ayol erkakning kiyimini kiymasin, erkak esa ayolning libosini kiymasin. Bunday ish qiladiganlarning hammasidan Egangiz Xudo jirkanadi.

⁶Yo‘lda ketayotganingizda daraxtdagi yoki yerdagi qush iniga duch kelsangiz, qush tuxum bosgan yoki polaponlari bilan o‘tirgan bo‘lsa, onasini bolalari bilan olmang.

⁷O‘zingizga faqat polaponlarini olishingiz mumkin, onasini esa qo‘yib yuboring. Shunda baxtiyor bo‘lib, umringiz uzoq bo‘ladi.

⁸Yangi uy qursangiz, tomingiz atrofida to‘siq quring. Shunda birortasi tomingizdan yiqilib o‘lsa, oilangiz javobgar bo‘lmaydi.

⁹Uzumzoringiz egatlariga boshqa turdagi urug‘ ekmang. Aks holda uzumzoringizdan va ekkan urug‘ingizdan olgan jamiki hosilni Egamizga bag‘ishlashingizga to‘g‘ri keladi.

¹⁰Ho‘kiz bilan eshakni birga qo‘shga qo‘shmang.

¹¹Ustingizga jun va zig‘irpoyadan aralashtirib to‘qilgan kiyimni kiymang.

¹²To‘ningizning etagiga popuk qilib osib yuring.

¹³Birortasi uylanib, qiz bilan yotgandan so‘ng uni yoqtirmay qolsa,

¹⁴qizni yomon otliq qilib, men bu qizga uylandim, u esa qiz chiqmadi, deb bahona qilsa,

¹⁵qizning ota–onasi qizlik belgilarini oqsoqollarga ko‘rsatish uchun, shahar darvozasiga olib borsin.

¹⁶Qizning otasi oqsoqollarga shunday aytsin: “Qizimni mana bu kishiga uzatgan edim. Endi u qizimni yoqtirmay qolibdi.

¹⁷Qizingiz qiz chiqmadi, deb bahona qilyapti. Mana qizimning qizlik belgilari”, deb shahar oqsoqollari oldiga o‘sha matoni yoysin.

¹⁸Shahar oqsoqollari o‘sha kishini olib kelib, jazolasin.

¹⁹Oqsoqollar unga yuz bo‘lak kumush jarima solsinlar. U Isroil xalqining bokira qizini yomon otliqqa chiqargani uchun, kumushni qizning otasiga bersinlar. Qiz u odamning xotini bo‘lib qolaversin, u odam qizdan umri bo‘yi ajralishi mumkin emas.

²⁰Lekin u odamning aytganlari to‘g‘ri bo‘lib, qiz bokira bo‘lmasa,

²¹qizni otasining eshigi oldiga olib kelishsin. Shahar erkaklari u qizni toshbo‘ron qilib o‘ldirsin. U otasining uyida yashagan paytda fohishalik qilib, Isroil xalqi orasida sharmandalarcha ish qildi. Shu tariqa orangizdan yomonlikni yo‘q qiling.

²²Agar biror erkak oilali xotin bilan yotsa va bu ma’lum bo‘lib qolsa, ikkovi — xotin ham, xotin bilan yotgan erkak ham o‘ldirilsin. Shu tariqa Isroildan yomonlikni yo‘q qiling.

²³Agar biron qiz unashtirilgan bo‘lsa–yu, shaharda birortasi o‘sha qizni uchratib qolib, u bilan yotsa,

²⁴ikkovini ham o‘sha shaharning darvozasi oldiga olib kelishsin. Qiz shaharda bo‘la turib, baqirmagani uchun jazolansin. Erkak esa birovning xotinini sharmanda qilgani uchun jazolansin. Ikkovini ham toshbo‘ron qilib o‘ldiring. Shu tariqa orangizdan yomonlikni yo‘q qiling.

²⁵Agar birorta erkak unashtirilgan qizni dalada uchratib qolib, uni ushlab zo‘rlasa, o‘sha qiz bilan yotgan erkaknigina o‘ldirish kerak.

²⁶Qizga hech narsa qilmanglar. U qizning o‘limga loyiq aybi yo‘q, bu xuddi birorta odam boshqasiga hujum qilib o‘ldirgani kabidir.

²⁷Chunki o‘sha erkak qizni dalada ushlab olgan, qiz yordam so‘rab baqirgan bo‘lishi mumkin. Ammo uni qutqaradigan hech kim bo‘lmagan.

²⁸Agar birortasi unashtirilmagan qizni uchratib qolsa, qizni ushlab, u bilan yotsa, ammo ikkovini ushlab olishsa,

²⁹o‘sha qiz bilan yotgan kishi qizning otasiga ellik bo‘lak kumush berishi kerak. Qiz esa uning xotini bo‘lsin. O‘sha odam qizni sharmanda qilgani uchun, umri bo‘yi u qizdan ajralishi mumkin emas.

³⁰Hech kim otasining xotiniga uylanmasin, bunday qilib otasini sharmanda qilmasin.