Read O‘zbek tilidagi Muqaddas Kitob, 2013 Qonunlar 23 Bible Online

Qonunlar 23 - O‘zbek tilidagi Muqaddas Kitob, 2013 bible

Qonunlar 23

¹Jinsiy a’zosi kesib tashlangan yoki moyagi ezilgan odam Egamiz jamoasiga kirolmaydi.

²Noqonuniy tug‘ilgan bola Egamiz jamoasiga kirolmaydi, uning o‘ninchi avlodigacha birorta avlodi ham Egamiz jamoasiga kirolmaydi.

³Ommonliklar va Mo‘abliklar Egamiz jamoasiga kirolmaydi, ularning o‘ninchi avlodigacha birorta avlodi Egamiz jamoasiga aslo kirolmaydi.

⁴Chunki Misrdan chiqib kelayotganingizda ular yo‘lda sizlarni non va suv bilan kutib olmadilar. Ular Oram–Naxrayimdagi Pato‘r shahridan Bavo‘r o‘g‘li Balomni sizlarni la’natlash uchun yolladi.

⁵Lekin Egangiz Xudo Balomga quloq solishni xohlamadi. Egangiz Xudo sizlarni sevgani uchun, Balomning la’natini barakaga aylantirdi.

⁶Tirik ekansiz, ularning tinchligini, farovonligini hech qachon ko‘zlamanglar.

⁷Edomliklardan esa hazar qilmanglar, chunki ular sizlarning qarindoshlaringizdir. Misrliklardan ham hazar qilmanglar, chunki sizlar ularning yurtida musofir bo‘lgan edingizlar.

⁸Ulardan tug‘ilgan uchinchi avlod bolalari Egamiz jamoasiga kirsa bo‘ladi.

⁹Dushmanlaringiz bilan jang qilishga borganingizda, har qanday haromlikdan saqlaning.

¹⁰Agar orangizdan birortasi, kechasi maniy oqqani tufayli harom bo‘lib qolsa, u qarorgohdan chiqib ketsin. U qarorgohda qolishi mumkin emas.

¹¹Kech kirayotganda yuvinib, quyosh botgandan keyin qarorgohga kirishi mumkin.

¹²Qarorgohning tashqarisida hojat chiqarishingiz uchun joy bo‘lsin.

¹³Qurol–aslahangiz orasida kurakchangiz ham bo‘lsin, ehtiyojingizni qondirib bo‘lganingizdan keyin kurakchangiz bilan chuqurcha kovlab, ko‘mib qo‘ying.

¹⁴Qarorgohingizni pok saqlang, chunki Egangiz Xudo sizlarga najot berish va dushmanlaringiz ustidan g‘alaba qozonishingiz uchun sizlar bilan qarorgohdadir. Agar U orangizda uyatli ishlarni ko‘rsa, sizlardan yuz o‘giradi.

¹⁵Egasidan qochib, Isroildan panoh so‘rab kelgan qulni yana qaytarib egasiga berib yubormanglar.

¹⁶U sizlarning orangizda, o‘zi yoqtirgan joyda, tanlagan shaharlaringizning birida yashayversin. Unga zulm qilmanglar.

¹⁷Isroil ayollari orasida sajdagoh fohishalari bo‘lmasin. Isroil erkaklari orasida sajdagoh fahshbozlari bo‘lmasin.

¹⁸Egangiz buzuq ayolu erkaklardan jirkanadi. Ularning ish xaqini Egangiz Xudoning uyiga olib kirmanglar. O‘shani atalgan nazr sifatida keltirmanglar.

¹⁹Isroil xalqidan bo‘lgan birodaringizga kumushni, nonni yoki har qanday boshqa narsani qarzga berganingizda, foiz talab qilmanglar.

²⁰Boshqa xalqdan bo‘lgandan foiz talab qilsangiz bo‘ladi, lekin birodaringizdan foiz talab qilmanglar. Shunda Egangiz Xudo sizga mulk qilib beradigan yurtda har bir ishingizga baraka beradi.

²¹Egangiz Xudoga nazr atagan bo‘lsangiz, uni kechiktirmasdan keltiring. Egangiz Xudo va’dangizni bajarishni sizdan talab qiladi. Keltirmasangiz, o‘zingizga gunoh orttirib olasiz.

²²Nazr atamasangiz gunoh bo‘lmaydi.

²³Ammo o‘z xohishingiz bilan Egangiz Xudoga ont ichib nazr atasangiz, og‘zingizdan chiqqan va’dangizni albatta bajaring.

²⁴Birovning uzumzoriga kirganingizda, to‘yguningizcha uzumdan yesangiz bo‘ladi, lekin idishingizga terib olmang.

²⁵Birovning dalasiga kirganingizda qo‘lingiz bilan boshoq uzsangiz bo‘ladi, lekin ekiniga o‘roq solmang.