Read O‘zbek tilidagi Muqaddas Kitob, 2013 Qonunlar 25 Bible Online

Qonunlar 25 - O‘zbek tilidagi Muqaddas Kitob, 2013 bible

Qonunlar 25

¹Ikki kishi janjallashganda, ular hakamlar oldiga kelsin. Hakamlar da’voga qarab, ulardan birini haq, ikkinchisini nohaq, deb e’lon qilsin.

²Agar nohaq deb topilgan kishi kaltaklanishga loyiq bo‘lsa, hakam aybdorni yotqizsin. O‘z oldida aybiga ko‘ra, unga darra urdirsin.

³Aybdorga qirq darradan ortig‘i urilmasin. Aks holda birodaringiz ko‘zingiz oldida xo‘rlanadi.

⁴G‘alla yanchayotgan ho‘kizning og‘zini to‘smang.

⁵Agar birga yashayotgan aka–ukalarning bittasi o‘lsayu uning o‘g‘li bo‘lmasa, marhumning xotini begonaga turmushga chiqmasin. Marhumning akasi yoki ukasi bevani o‘ziga xotin qilib olsin. Uning oldida qaynog‘alik vazifasini bajarsin.

⁶O‘sha ayol tuqqan to‘ng‘ich o‘g‘il marhum aka yoki ukaning nomini olib yuradi. Shunda marhumning nomi Isroildan o‘chib ketmaydi.

⁷Agar o‘sha odam marhum akasi yoki ukasining bevasiga uylanishni xohlamasa, beva ayol shahar darvozasiga borib, oqsoqollarga aytsin: “Qaynog‘am tug‘ishganining nomini Isroil xalqi orasida tiklashni rad qilyapti, men uchun qaynog‘alik vazifasini bajarishni istamayapti.”

⁸Shunda shahar oqsoqollari o‘sha odamni chaqirib, u bilan suhbatlashsin. Agar o‘sha odam: “Men bu ayolga uylanishni xohlamayman”, deb turib olsa,

⁹beva ayol qaynog‘asining yoniga borsin. Shahar oqsoqollari oldida uning chorig‘ini yechsin, so‘ng uning yuziga tupurib, aytsin: “Birodarining naslini tiklashni xohlamagan odamga shunday qilinadi.”

¹⁰Isroil xalqi orasida u odamning xonadoni “chorig‘i yechkizilgan” deb nom oladi.

¹¹Ikki kishi bir–biri bilan urishayotganda, ulardan birining xotini kelib, erini qutqarish maqsadida narigi erkakning nozik joyidan ushlasa,

¹²o‘sha ayolning qo‘li kesib tashlansin. Unga rahm qilmanglar.

¹³Qadoq toshlaringiz to‘g‘ri bo‘lsin, biri og‘ir, biri yengil bo‘lmasin.

¹⁴Uyingizdagi o‘lchov kosalarning hajmi to‘g‘ri bo‘lsin, biri katta, biri kichik bo‘lmasin.

¹⁵Toshlaringiz halol va to‘g‘ri bo‘lsin, o‘lchovlaringiz ham halol va to‘g‘ri bo‘lsin. Shunda Egangiz Xudo sizlarga beradigan yurtda umringiz uzoq bo‘ladi.

¹⁶G‘irromlik qiladiganlarning hammasidan Egangiz Xudo jirkanadi.

¹⁷Misrdan chiqayotganingizda yo‘lda Omolek xalqi sizlarga nima qilganini esingizdan chiqarmang.

¹⁸Sizlar charchab, holsizlanib qolganingizda, ular Xudodan qo‘rqmay sizlarga hujum qilgan edilar. Orqangizda kelayotgan hamma holdan toyganlarni o‘ldirgan edilar.

¹⁹Egangiz Xudo sizlarga yurtni mulk qilib berganda, dushmanlaringizni yengib, har tarafdan osoyishtalik ato qilganda, Omolek xalqini halok qilib, ularning nomini yer yuzidan o‘chiringlar. Bunday qilishni unutmanglar!