Read O‘zbek tilidagi Muqaddas Kitob, 2013 Qonunlar 28 Bible Online

Qonunlar 28 - O‘zbek tilidagi Muqaddas Kitob, 2013 bible

Qonunlar 28

¹Agar Egangiz Xudoga itoat etib, men bugun aytayotgan Uning barcha amrlarini bitta qoldirmay bajarsangiz, U sizlarni yer yuzidagi hamma xalqlardan ustun qiladi.

²Egangiz Xudoga itoat etsangiz, U sizlarga baraka beradi, baraka sizdan arimaydi.

³Egangiz sizga shaharda ham, dalada ham baraka beradi.

⁴Uvali–juvali bo‘lasizlar, yeringiz hosildor, mol–qo‘yingiz barakali bo‘ladi, sigirlaringiz bolalaydi, qo‘ylaringiz qo‘zilaydi.

⁵Suprangiz va bug‘doy solingan savatlaringiz barakali bo‘ladi.

⁶Uyda bo‘lganingizda ham, yo‘lga chiqqaningizda ham Egamiz sizga baraka beradi.

⁷Sizlarga hujum qilgan dushmanlaringizni mag‘lub qiladi. Ular sizlarga bir tomondan hujum qilib keladi, ammo yetti tomonga tumtaraqay qochadi.

⁸Qilgan har bir ishingizni Egangiz Xudo barakali qiladi, omborlaringizni to‘ldiradi. U sizlarga berayotgan yurtda baraka beradi.

⁹Egangiz Xudoning amrlariga itoat etsangiz, Uning yo‘lidan yursangiz, Egamiz sizlarga qasam ichib va’da berganiday, sizlarni O‘zining muqaddas xalqi qiladi.

¹⁰Egamizga tegishli ekaningizni ko‘rib, yer yuzidagi barcha xalqlar sizlardan qo‘rqadigan bo‘ladi.

¹¹Egamiz ota–bobolaringizga qasam ichib, sizlarga beraman, deb va’da qilgan yurtda farovonlik ato qiladi. Uvali–juvali bo‘lasizlar, molingiz ko‘payadi, dalangizning hosili barakali bo‘ladi.

¹²Egamiz O‘zining osmondagi boy xazinasini ochib, vaqtida yeringizga yomg‘ir yog‘diradi, qiladigan har bir ishingizga baraka beradi. Ko‘p xalqlarga qarz berasiz–u, o‘zingiz qarz olmaysiz.

¹³Bugun Egangiz Xudoning men sizlarga aytayotgan amrlarini bitta qoldirmay bajarsangiz, Egamiz sizlarni dum emas, bosh qiladi. Sizlar pastda emas, balandda bo‘lasiz.

¹⁴Bugun men sizlarga aytayotgan amrlardan o‘ngga yoki chapga chiqmang, boshqa xudolarga ergashmang, ularga xizmat qilmang.

¹⁵Agar Egangiz Xudoga quloq solmasangiz, bugun men sizlarga aytayotgan Egamizning birorta amri yoki farmoniga rioya qilmasangiz, quyidagi la’natlar boshingizga keladi:

¹⁶Shaharda ham, dalada ham la’nati bo‘lasiz.

¹⁷Suprangiz va bug‘doy solingan savatlaringiz la’natlanadi.

¹⁸Farzandga zor bo‘lasiz, yeringiz hosil bermaydi, mol–qo‘yingiz ko‘paymaydi.

¹⁹Uyda bo‘lganingizda ham, yo‘lga chiqqaningizda ham la’nati bo‘lasiz.

²⁰Egamizni tark etib, qabihliklar qilganingiz uchun, qilgan har bir ishingizda U sizlarni la’natga, balo–qazoga duchor qiladi. Ishingiz o‘ngidan kelmaydi. Oxiri, Egamiz ustingizga kulfat yog‘dirib, bir lahzada yo‘q qiladi.

²¹Mulk qilib oladigan yurtingizga Egamiz o‘lat yuborib, sizlarni yo‘q qiladi.

²²U sizlarni isitma va yallig‘lanish bilan kechadigan tuzalmas kasallikka duchor qiladi. Jazirama issiq va qurg‘oqchilik yuborib, hosilingizni qovjiratadi, mog‘orlatadi. O‘lguningizcha bu kulfatlar orqangizdan quvadi.

²³Tepangizdagi osmon bronza kabi qattiq, ostingizdagi yer temir kabi zarang bo‘ladi.

²⁴Yo‘q bo‘lib ketguningizcha, Egamiz ustingizga yomg‘ir o‘rniga chang–to‘zon yog‘diradi.

²⁵Egamiz sizlarni dushmanlaringiz oldida tiz cho‘ktiradi. Ularga bir tomondan hujum qilasizlar, ammo yetti tomonga tumtaraqay qochasizlar. Yer yuzidagi barcha shohliklar ahvolingizni ko‘rib, dahshatga tushadi.

²⁶Murdalaringiz osmondagi qushlarga, yerdagi yirtqich hayvonlarga yem bo‘ladi, ularni haydaydigan kimsa bo‘lmaydi.

²⁷Egamiz sizlarni Misrliklarga toshtirgan chipqonga, yiring bog‘laydigan yaralarga, qo‘tir va qichimalarga mubtalo qiladi. Bu xastaliklarga davo topolmaysiz.

²⁸Egamiz sizlarni jinni, ko‘r va ovsar qilib qo‘yadi.

²⁹Ko‘r odam qorong‘ida paypaslanib yurganday, sizlar kuppa–kunduzi paypaslanib yurasizlar. Ishlaringiz yurishmaydi, xor bo‘lasizlar, sizlarni talon–taroj qiladilar, hech kim sizlarni qutqarmaydi.

³⁰Bir qiz bilan unashtirilasiz, ammo u bilan boshqasi yotadi. Uy qurasiz–u, uyingizda yashamaysiz, uzumzor ekasiz–u, mevasidan yemaysiz.

³¹Molingizni ko‘z oldingizda so‘yishadi, lekin go‘shtini yemaysiz. Eshagingizni ko‘z oldingizdan o‘g‘irlab ketishadi, qaytib berishmaydi. Qo‘ylaringiz dushmanlaringizga beriladi. Sizlarga hech kim yordam bermaydi.

³²O‘g‘illaringiz, qizlaringiz ko‘z oldingizda boshqa xalqlarga beriladi. Ular tomon talpinasiz–u, biror narsa qilishga ojiz bo‘lasiz.

³³Yeringiz hosilidan, mehnatingiz samarasidan begona xalqlar bahramand bo‘ladi. Sizni esa har kuni ezishadi, xor qilishadi.

³⁴Ko‘zlaringiz bilan ko‘rgan voqealardan jinni bo‘lib qolasiz.

³⁵Egamiz oyoqlaringizga tuzalmas yaralar toshtiradi. Butun badaningizga boshdan–oyoq chipqon chiqadi.

³⁶Egamiz sizlarni va ustingizdan qo‘ygan shohni o‘zlaringiz ham, ota–bobolaringiz ham bilmagan xalq oldiga haydab boradi. U yerda yog‘och va toshdan yasalgan boshqa xudolarga xizmat qilasiz.

³⁷Egamiz sizlarni o‘sha begona xalqlarga olib borganda, ular ahvolingizdan dahshatga tushadi. Sizlar ularga masxara, kulgi bo‘lasiz.

³⁸Dalaga ko‘p urug‘ ekasiz, lekin kam hosil olasiz. Hosilingizni chigirtkalar yeb bitiradi.

³⁹Uzumzorlar barpo qilasiz, parvarishlaysiz, lekin sharobidan ichmaysiz, uzumini termaysiz. Ularga qurt tushadi.

⁴⁰Yerlaringizda zaytun daraxtlari o‘sadi, lekin ustingizga zaytun moyi surtmaysiz. Zaytun mevalari to‘kilib ketadi.

⁴¹O‘g‘il–qizlar ko‘rasiz, lekin ular o‘zingizga buyurmaydi, ularni asir qilib olib ketishadi.

⁴²Hamma daraxtlaringizdagi mevalarni va yeringiz hosilini chigirtkalar yeb, nobud qiladi.

⁴³Orangizdagi musofirlar yanada ko‘tariladi, sizlar esa yanada pasayasiz.

⁴⁴Ular sizlarga qarz beradi, sizlar esa ularga qarz berolmaysiz. Ular bosh bo‘ladi, sizlar esa dum bo‘lasiz.

⁴⁵Egangiz Xudoga itoat etmaganingiz uchun, U sizlarga aytgan amrlarni va farmonlarni bajarmaganingiz uchun, mana shu la’natlar boshingizga keladi, orqangizdan quvib, sizlarga yetib olib halok qiladi.

⁴⁶Bu la’natlar to abad sizlar va avlodlaringiz uchun Xudo bergan jazoning isboti bo‘ladi.

⁴⁷Hamma narsa mo‘l–ko‘l bo‘lganda, sizlar Egangiz Xudoga xursandchiligu quvonch bilan xizmat qilmadingiz.

⁴⁸Shuning uchun Egamiz yuborgan dushmanlarga xizmat qilasiz, och, tashna, yalang‘och, muhtoj bo‘lib qolasiz. Dushmanlaringiz sizlarga temir bo‘yinturuq soladi, hammangizni nobud qiladi.

⁴⁹Egamiz boshingizga uzoqdan, yer yuzining u chetidan burgutday bir xalqni yuboradi. Sizlar bu xalqning tilini tushunmaysiz.

⁵⁰Bu xalq qo‘rqinchli, kattalarni hurmat qilmaydi, kichiklarga rahm–shafqat ko‘rsatmaydi.

⁵¹Sizlarni xonavayron qilmaguncha, mollaringizni, yeringizning hosilini yeyishadi. Sizlarga na donni, na sharobni, na zaytun moyini, na podangizdagi buzoqlarni, na suruvingizdagi qo‘zilarni qoldirishadi. Shunda sizlar yo‘q bo‘lib ketasizlar.

⁵²Egangiz Xudo sizlarga berayotgan yurtdagi hamma shaharlarni ular qamal qilishadi. Siz suyangan baland va mustahkam devorlarni vayron qilishadi.

⁵³Qamal paytida dushmanlaringiz boshingizga solgan kulfat tufayli o‘z farzandlaringizni, Egangiz Xudo sizlarga bergan o‘g‘il–qizlaringizning etini yeysizlar.

⁵⁴Oralaringizdagi eng muloyim, eng diyonatli erkak ham tug‘ishgan akasidan, suyukli xotinidan, sog‘ qolgan bolalaridan etni qizg‘anadi.

⁵⁵O‘zi yeyayotgan bolalarining etidan hech kimga bermaydi, bundan boshqa chorasi ham bo‘lmaydi. Chunki dushmanning qurshovi hamma shaharlaringizda sizni shu qadar tang ahvolga solib qo‘yadi.

⁵⁶Oralaringizdagi eng muloyim, eng nozik ayol, nozikligidan oyog‘ini yerga qo‘yishni ham istamaydigan ayol, sevikli eridan, o‘g‘li va qizidan etni qizg‘anadi.

⁵⁷Ochlikdan u, hatto, oyoqlari orasidan chiqqan yo‘ldoshni va o‘zi tuqqan bolalarni yashirincha yeydi. Dushmanning qurshovi hamma shaharlaringizda sizni shu qadar tang ahvolga solib qo‘yadi.

⁵⁸Egangiz Xudoning buyuk va haybatli nomidan qo‘rqmasangiz, shu kitobda yozilgan qonunning hamma so‘zlarini bajarmasangiz,

⁵⁹Egamiz o‘zlaringizni va avlodlaringizni og‘ir va doimiy kulfatlarga, yomon, tuzalmaydigan xastaliklarga giriftor qiladi.

⁶⁰Sizlarni vahimaga tushiradigan barcha Misr xastaliklarini boshingizga soladi, ulardan hech qachon shifo topmaysiz.

⁶¹Sizlar yo‘q bo‘lguningizcha, Egamiz mana shu qonun kitobida yozilmagan boshqa xastaligu ofatlarni ham boshingizga keltiraveradi.

⁶²Sizlar osmondagi yulduzlar kabi ko‘p edingizlar, ammo Egangiz Xudoga quloq solmaganingiz uchun sanoqli bo‘lib qolasizlar.

⁶³Egamiz sizlarga yaxshilik qilib, sizlarni ko‘paytirgandan qanchalik mamnun bo‘lgan bo‘lsa, sizlarni halok qilib yo‘q qilgandan ham shunchalik mamnun bo‘ladi. Mulk qilib oladigan yurtingizdan sizlarni sug‘urib, uloqtirib tashlaydi.

⁶⁴Egamiz sizlarni dunyoning u chetidan bu chetigacha hamma xalqlar orasiga tarqatib yuboradi. U yerda o‘zlaringiz ham, ota–bobolaringiz ham bilmagan, tosh va yog‘ochdan yasalgan boshqa xudolarga xizmat qilasizlar.

⁶⁵Lekin bu xalqlar orasida orom topolmaysizlar, oyoq uzatib dam olishingiz uchun joy bo‘lmaydi. Egamiz sizlarga titroq yurak, xira ko‘z, umidsiz ruh beradi.

⁶⁶Hayotingiz qil ustida turgandek bo‘ladi, kechasiyu kunduzi o‘limdan qo‘rqib yashaysiz.

⁶⁷Yuragingizdagi qo‘rquv va ko‘zlaringiz ko‘rayotgan voqealar tufayli ertalab: “Qaniydi, kechqurun bo‘lsa”, kechqurun esa: “Qaniydi, ertalab bo‘lsa”, deysizlar.

⁶⁸Egamiz sizlarga, Misrga qaytib bormaysizlar, deb aytgan bo‘lsa–da, U sizlarni kemalarda Misrga qaytarib jo‘natib yuboradi. O‘sha yerda, dushmanlarimizga qul va cho‘ri bo‘lib sotilsaydik, deb harakat qilasizlar, lekin sizlarni sotib oladigan xaridorlar bo‘lmaydi.