Read O‘zbek tilidagi Muqaddas Kitob, 2013 Qonunlar 3 Bible Online

Qonunlar 3 - O‘zbek tilidagi Muqaddas Kitob, 2013 bible

Qonunlar 3

¹Keyin biz Bashan o‘lkasiga yo‘l oldik. Bashan shohi O‘g o‘zining hamma lashkarini boshlab, Edrey shahri yaqinida biz bilan jang qilgani chiqdi.

²Shunda Egamiz menga dedi: “O‘gdan qo‘rqma. Men uning o‘zini, lashkarini va butun yurtini sening qo‘lingga berganman. Amor xalqining Xashbonda yashagan shohi Sixo‘nni nima qilgan bo‘lsang, uni ham shunday qilasan.”

³Egamiz Xudo Bashan shohi O‘gni ham hamma lashkari bilan birga bizning qo‘limizga berdi. Biz birorta tirik jon qoldirmay hammasini halok qildik.

⁴Uning hamma shaharlarini — oltmishta shahrini oldik. Bashandagi O‘gning shohligiga kirgan butun Argob hududini qo‘lga kiritdik, biz olmagan birorta ham shahar qolmadi.

⁵Bu mustahkam shaharlarning hammasi baland devorlar bilan o‘ralgan, darvozalari tambalangan edi. Bulardan tashqari, devor bilan o‘ralmagan ko‘p qishloqlar ham bor edi.

⁶Biz Xashbon shohi Sixo‘nning shaharlarini qanday vayron qilgan bo‘lsak, O‘gning shaharlarini ham shunday vayron qildik. Bu shaharlarni erkagu ayollari va bolalari bilan birga yo‘q qildik.

⁷Hamma chorva va shaharlardagi o‘ljani o‘zimizga oldik.

⁸Shunday qilib, o‘shanda biz Iordan daryosining sharq tomonida hukmronlik qilgan ikkala Amor shohini mag‘lub qildik. Janubdagi Arnon soyligidan to shimoldagi Xermon tog‘igacha cho‘zilgan yerlarini qo‘lga kiritdik.

⁹(Xermon tog‘ini Sidonliklar — “Siriyon”, Amor xalqi — “Sanir” deb atashadi.)

¹⁰Biz Bashanda hukmronlik qilgan shoh O‘gning butun shohligini, yassi tepalikdagi hamma shaharlarini, sharqdagi Salko va Edreygacha bo‘lgan butun Gilad va Bashan o‘lkalarini qo‘lga kiritdik.

¹¹(Rafa xalqidan birgina Bashan shohi O‘g tirik qolgan edi. Uning yotadigan o‘rni temirdan yasalgan bo‘lib, odatdagi o‘lcham bo‘yicha uzunligi to‘qqiz tirsak, kengligi esa to‘rt tirsak edi. Uning o‘rni hozir ham Ommon yurtining Rabba shahridadir.)

¹²Biz o‘sha yerlarni qo‘lga kiritdik. Shunda men Ruben va Gad qabilalariga Arnon soyligi bo‘yidagi Aror shahrining shimolidagi hududni, Gilad qirlarining yarmisini va atrofdagi qishloqlarni berdim.

¹³Manashe qabilasining yarmiga esa Giladning qolgan qismini va O‘gning shohligi bo‘lgan butun Bashanni berdim. (Bashan o‘lkasidagi Argob hududi Rafa xalqining yurti hisoblanardi.

¹⁴Manashe qabilasidan bo‘lgan Yovir butun Argob hududini qo‘lga kiritdi. Bu hudud Gashur va Maxo yurtlarigacha cho‘zilgan edi. Yovir bu joyga o‘zining nomini berdi. O‘sha joylar bugungacha Yovir qishloqlari deb ataladi.)

¹⁵Manashe qabilasining Moxir urug‘iga Giladni berdim.

¹⁶Ruben va Gad qabilalariga Giladdan to Arnon soyligigacha cho‘zilgan yerlarni berdim. Arnon soyligining o‘rtasi ikkovining chegarasi edi. Ularning yeri Ommon yurtining chegarasini tashkil qilgan Yavoq daryosigacha cho‘zilgan edi.

¹⁷Ularning g‘arbdagi yerlari esa Iordan daryosi bo‘ylab, shimoldagi Jalila ko‘lidan to janubdagi O‘lik dengizgacha va sharqdagi Fisgax tog‘ tizmasining yon bag‘irlarigacha cho‘zilgan edi.

¹⁸O‘shanda sizlarga shunday buyurdim: “Egangiz Xudo bu yerni sizlarga mulk qilib berdi. Hamma sipohlaringiz qurollanib, daryodan kechib o‘tsin. Ular birodarlaringiz bo‘lgan Isroil xalqini boshlab borsin.

¹⁹Faqat xotinlaringiz va farzandlaringiz men sizlarga bergan shaharlarda qolsin. Bilaman, mollaringiz juda ko‘p, ular ham shaharlaringizda qolaversin.

²⁰Egamiz sizlarga tinchlik ato qilganday, birodarlaringizga ham tinchlik ato qilgandan keyin, ular Iordanning narigi tomonidagi, Egangiz Xudo berayotgan yerni egallab olgandan keyin, hammangiz men sizlarga bergan mana shu yerga qaytib kelsangiz bo‘ladi.”

²¹O‘shanda Yoshuaga aytdim: “Egang Xudo o‘sha ikkala shohni nima qilganini o‘z ko‘zing bilan ko‘rding. Sen bosib o‘tadigan barcha shohliklarni ham Egamiz xuddi shunday ahvolga soladi.

²²Ulardan qo‘rqma. Sizlar uchun jang qiladigan Egang Xudodir.”

²³Shundan keyin men Egamga yolvordim:

²⁴“Yo Egam Rabbiy! Men, qulingga, O‘z buyukliging va qudratingni endigina ko‘rsata boshlading. Sening ajoyibotlaringni, buyuk ishlaringni osmonda ham, yerda ham qila oladigan boshqa xudo yo‘q!

²⁵Ijozat ber, men Iordan daryosidan o‘tay. Daryoning narigi tomonidagi hosildor yurtni, o‘sha chiroyli qirlarni va Lubnonni ko‘ray.”

²⁶Lekin Egamiz sizlar tufayli mendan g‘azablangani uchun iltijolarimga quloq solmadi. U menga shunday dedi: “Bo‘ldi qil! Menga bu haqda boshqa gapirma.

²⁷Fisgax tog‘ tizmasining cho‘qqisiga chiq, g‘arbga, shimolga, janubga va sharqqa qara. Yaxshilab qarab ol, chunki sen mana shu Iordan daryosidan kechib o‘tmaysan.

²⁸Yoshuani xizmatga tayinla. Unga dalda berib, ruhlantir. Bu xalqni daryoning narigi tomoniga Yoshua boshlab boradi. Uning boshchiligida bu xalq sen ko‘radigan o‘sha yerni egallaydi.”

²⁹Shunday qilib, biz Bayt–Piyor qarshisidagi vodiyda to‘xtadik.