Read O‘zbek tilidagi Muqaddas Kitob, 2013 Qonunlar 32 Bible Online

Qonunlar 32 - O‘zbek tilidagi Muqaddas Kitob, 2013 bible

Qonunlar 32

¹Ey samo, quloq sol, men gapiraman. Ey zamin, og‘zimdan chiqqan so‘zlarni eshit.

²Ta’limotim yomg‘ir kabi yog‘sin, So‘zlarim shudring kabi tushsin, Maysalarni siypalaydigan yomg‘ir tomchilariday, O‘tlar ustiga yog‘adigan mo‘l yomg‘irday bo‘lsin.

³Egamizning nomini ulug‘layman! Xudoyimizning buyukligiga hamdlar o‘qing!

⁴U suyangan Qoyam, Uning ishlari komil, Hamma yo‘llari adolatlidir. Xudo sadoqatlidir, Unda yolg‘on yo‘q, U haq va odildir.

⁵Ammo sizlar Unga sodiq qolmadingiz! Ey buzuq va egri nasl, Endi sizlar Uning farzandlari, deb atalmaysiz, Bu sizlarning isnodingizdir.

⁶Egamizga shunday qaytarasizmi, Ey ahmoq, nodon xalq?! U sizlarni yaratgan Otangiz–ku! Sizga shakl bergan Yaratuvchingiz–ku!

⁷Qadimgi kunlarni eslang, Uzoq o‘tmishni o‘ylang. Otalaringizdan so‘rang, u sizlarga aytib beradi, Oqsoqollardan so‘rang, sizlarga gapirib berishadi.

⁸Xudoyi Taolo xalqlarga yerni bo‘lib berganda, Odamzodni yer yuziga tarqatganda, Xalqlarning chegaralarini, Ilohiy zotlar soniga ko‘ra, belgilagandi.

⁹Yoqub naslini esa Egamiz O‘ziga ulush qilib oldi, Isroilni O‘z nasibasi qildi.

¹⁰Egamiz Isroilni sahrodan, Uvullaydigan dashtdan topib oldi. Uni O‘z bag‘riga oldi, Unga g‘amxo‘rlik qilib, Ko‘z qorachig‘iday saqladi.

¹¹Go‘yo burgut inidagilarni uyg‘otib, O‘z polaponlari uzra aylanganday, Qanotlarini yoyib, polaponlarini ko‘targanday, Qanotlari ustida ularni olib yurganday,

¹²Egamizning yolg‘iz O‘zi Isroilni olib yurdi, Yonida boshqa xudo yo‘q edi.

¹³Yerning cho‘qqilariga Isroilni hukmdor qildi, Dalaning hosili bilan uni to‘ydirdi. Toshdan chiqqan asal bilan, Toshloq yerda o‘sgan zaytunlarning moyi bilan boqdi.

¹⁴Sigir qatig‘iyu echki suti bilan, Qo‘zichoq va qo‘y dumbasi bilan, Bashan qo‘chqoriyu buzoqlari go‘shti, A’lo bug‘doy bilan boqdi. Uzumdan qilingan a’lo sharobdan ichirdi.

¹⁵Azizim Isroil semirib, o‘jar bo‘ldi. U semirib, shishib ketdi, oxiri bo‘kib qoldi. O‘zini yaratgan Xudodan yuz o‘girib, O‘z najot Qoyasini xor qildi.

¹⁶Boshqa xudolarga sajda qilib, Uning rashkini keltirdi. Jirkanchli butlar bilan Uning g‘azabini qo‘zg‘atdi.

¹⁷Xudoga emas, jinlarga qurbonlik keltirdi. Bu xudolarni o‘zlari bilmas edi, Bu xudolar yaqinda paydo bo‘lgan, Ota–bobolari ulardan qo‘rqmagan edi.

¹⁸Evoh, ey Isroil, seni tuqqan Xudoni eslamading, Seni dunyoga keltirgan Qoyani unutding.

¹⁹Egamiz bularni ko‘rib, ularni rad etdi, O‘z o‘g‘il–qizlari Uning g‘azabini keltirgandi.

²⁰U shunday dedi: “Bu xalqdan yuzimni o‘giraman, Ularning ahvoli nima bo‘lishini ko‘raman. Axir, ular egri nasl, sadoqatsiz farzandlardir.

²¹Ular Xudo bo‘lmagan butlar bilan rashkimni keltirdilar, Betayin xudolari bilan g‘azabimni qo‘zg‘atdilar. Men ham xalq bo‘lmaganlar bilan ularning rashkini keltiraman, Aqlsiz bir xalq bilan g‘azabini qo‘zg‘ataman.

²²G‘azabimdan olov chiqadi, O‘liklar diyorining eng chuqur joyigacha yondiradi, Yerni, hosilini kuydiradi, Tog‘ poydevorini kul qiladi.

²³Ularga kulfat ketidan kulfat keltiraman, O‘qlarimni bitta qo‘ymay ularga otaman:

²⁴Ochlik ularning sillasini quritadi, Isitma yondirib kuydiradi, Ofat jonlarini oladi. Yovvoyi hayvonlar ularni tilka–pora qiladi, Yerda sudraladigan ilonlar zahrini sochadi.

²⁵Ko‘chalarda yigitu qizlarni qilich halok qiladi, Uylarda esa chaqalog‘u oq sochli keksalarni vahima o‘ldiradi.

²⁶Ha, Men ularni sochib tashlagan bo‘lardim, Odamlar orasidan ularning xotirasini o‘chirib yuborgan bo‘lardim,

²⁷Ammo dushmanning mazaxidan hayiqdim, G‘animlar noto‘g‘ri tushunmasin, dedim. ‘Isroilni Egasi emas, biz mag‘lub qildik’, deb O‘ylamasin dedim.”

²⁸Isroil aqlini yo‘qotgan, idroksiz xalqdir.

²⁹Agar ularda aql bo‘lsa edi, tushunardi, Oqibati nima bo‘lishini bilardi.

³⁰Ana, Egasi Isroilni tark etdi, Suyangan Qoyasi ularni dushmanga berib qo‘ydi. Aks holda bir kishi Isroilning mingtasini ta’qib qila olarmidi?! Ikki kishi Isroilning o‘n mingtasini hayday olarmidi?!

³¹Hatto dushmanlari tan oladi, Isroil Xudosi qudratli Qoya ekanligini.

³²Isroilning dushmanlari uzum tokiga o‘xshar, Sado‘m va G‘amo‘ra dalalarida o‘sar, Uzumzorlarining mevasi zaharli, Uzumlari og‘u singari achchiqdir.

³³Ularning sharobi ajdarho zahri, Ilonlarning qo‘rqinchli og‘usidir.

³⁴Egamiz shunday deydi: “Men Isroil dushmanlarini Nimalar qilishni dilimda tutaman, O‘shalarni xazinamda saqlayman.

³⁵Ularning oyoqlari chalishganda Men qasos olaman, jazosini beraman. Ularning halokat kuni yaqindir, Ularning qismati hal bo‘ladi.”

³⁶Egamizning xalqi kuchdan qolganda, Erkinu erksizlar nobud bo‘lganda, Egamiz O‘z xalqini oqlaydi, O‘z qullariga rahm–shafqat qiladi.

³⁷Shunda Egamiz O‘z xalqidan so‘raydi: “Ishongan xudolaringiz qani?! Siz panoh olgan qoyangiz qani?!

³⁸Sizlar o‘shalarga qurbonlik yog‘idan yedirdingiz, Nazr sharobidan ichirdingiz. Endi ular kelib, sizlarga yordam bersin! O‘shalar sizga qalqon bo‘lib ko‘rsin!

³⁹Bilib qo‘ying, Men yagonaman! Mendan boshqa Xudo yo‘qdir. O‘ldiradigan Menman, Hayot beradigan ham Menman, Jarohat yetkazadigan Menman, Shifo beradigan ham Menman. Mening qo‘limdan hech kim qutula olmaydi.

⁴⁰Men barhayot Xudo bo‘lganim haqi, Qo‘limni osmonga ko‘tarib, ont ichib aytamanki:

⁴¹Men yaltiroq qilichimni charxlayman, Adolat o‘rnata boshlayman. Dushmanlarimdan qasos olaman, Mendan nafratlanganlarga qaytaraman.

⁴²Halok bo‘lganlar va asirlarning qoni bilan O‘qlarimni mast qilaman, Yov lashkarboshilarning kallalari bilan Qilichimni etga to‘ydiraman.”

⁴³Ey ellar, Uning xalqi bilan shodlaning, U qullarining o‘limi uchun o‘ch oladi. Dushmanlaridan qasos olib, Yurti va xalqini gunohdan poklaydi.

⁴⁴Muso Nun o‘g‘li Yoshua bilan birga bu qo‘shiqning barcha so‘zlarini ovoz chiqarib, xalqqa aytib berdi.

⁴⁵Muso mana shu so‘zlarning hammasini butun Isroil xalqiga aytib bergandan keyin,

⁴⁶ularga shunday dedi: — Bugun men sizlarni ogohlantirib, aytgan so‘zlarning hammasini yuragingizda saqlang. Bolalaringizga ham buyuring, mana shu qonunning so‘zlarini bitta qoldirmay bajarishsin.

⁴⁷Bu shunchaki quruq so‘zlar emas, balki sizlarning hayotingizdir. Mana shu so‘zlar tufayli sizlar mulk qilib oladigan Iordanning narigi tomonidagi yurtda uzoq yashaysizlar.

⁴⁸Egamiz o‘sha kuni Musoga shunday dedi:

⁴⁹— Aborim tizmasidagi Navo tog‘iga chiq. Bu tog‘ Yerixo shahri ro‘parasidagi Mo‘ab yurtida joylashgan. U yerdan Men Isroil xalqiga mulk qilib berayotgan Kan’on yurtiga qara.

⁵⁰Akang Horun Xo‘r tog‘ida olamdan o‘tganday, sen ham o‘zing chiqadigan tog‘da olamdan o‘tasan.

⁵¹Ikkovingiz Isroil xalqining oldida Menga sadoqatsizlik qilgan edingiz. Sizlar Zin cho‘lida, Mariva suvlari bo‘yidagi Kadesh yonida Isroil xalqiga muqaddasligimni namoyon qilmagan edingiz.

⁵²Shuning uchun sen o‘sha yurtni uzoqdan ko‘rasan. Men Isroil xalqiga berayotgan o‘sha yerga sen kirmaysan.