Read O‘zbek tilidagi Muqaddas Kitob, 2013 Qonunlar 33 Bible Online

Qonunlar 33 - O‘zbek tilidagi Muqaddas Kitob, 2013 bible

Qonunlar 33

¹Xudoning odami Muso o‘limidan oldin Isroil xalqini quyidagi so‘zlar bilan duo qildi:

²“Egamiz Sinay tog‘idan O‘z xalqiga keldi, Seir yurti uzra quyoshday porladi, Poron tog‘idan nur sochdi. O‘n minglarcha farishta U bilan keldi, O‘ng qo‘lida otashin olov bor edi.

³Darhaqiqat, Egamiz O‘z xalqini sevadi, Unga bag‘ishlangan odamlarni himoya qiladi. Ular Egamizga ta’zim qiladilar, Undan ko‘rsatmalar oladilar.

⁴Muso Isroil xalqiga bergan ushbu qonun Yoqub naslining bebaho mulkidir.

⁵Isroil qabilalari yig‘ilganda, Xalq yo‘lboshchilari to‘planganda, Egamiz aziz Isroilga shoh bo‘ldi.”

⁶Muso Ruben qabilasi haqida shunday dedi: “Ruben qabilasi yashasin, o‘lmasin, Soni kam bo‘lsa–da, omon bo‘lsin.”

⁷Yahudo qabilasi haqida shunday dedi: “Ey Egam, Yahudoning ovozini eshitgin, Uni boshqa qabilalar bilan birlashtirgin. U o‘z qo‘llari bilan o‘zini himoya qilmoqda, Dushmanlariga qarshi unga madad bergin.”

⁸Levi qabilasi haqida shunday dedi: “Ey Egam, Sen Urim bilan Tummimni Taqvodor Leviga berding. Uni Massaxda sinab ko‘rding, U bilan Mariva suvlarida bellashding.

⁹U ota–onasidan, aka–ukasidan, Bola–chaqasidan Seni ustun ko‘rdi. Sening amrlaringni bajardi, Ahdingga sodiq qoldi.

¹⁰Yoqub nasliga qoidalaringni, Isroil xalqiga qonuningni o‘rgatadi, Huzuringda tutatqilar tutatib, Qurbongohingda qurbonliklar kuydiradi.

¹¹Ey Egam, uning davlatiga baraka bergin, Qilgan ishlaridan mamnun bo‘lgin. Yovlarining belini sindirgin, Undan nafratlanganlar qaytib turolmasin.”

¹²Benyamin qabilasi haqida u shunday dedi: “Egamizning suyukligi bexatar yashaydi, Xudoyi Taolo doim uni asraydi, U Xudoning quchog‘ida orom oladi.”

¹³Yusuf qabilasi haqida shunday dedi: “Egamiz uning yeriga baraka bersin. Osmon yomg‘iri, yer osti suvi bilan barakalasin.

¹⁴Quyoshga to‘ygan a’lo hosillar bersin, O‘z mavsumida mo‘l mevalar yetishtirsin.

¹⁵Qadimiy tog‘larning asil unumini, Ko‘hna adirlarning serob barakasini bersin.

¹⁶Yerning a’lo in’omlari Yusufga nasib etsin, Yongan buta orasida zohir bo‘lgan Xudoning muruvvatiga muyassar qilsin, Aka–ukalari orasidan tanlangan Yusufga bular buyursin.

¹⁷Birinchi tug‘ilgan buqaday qudratlidir u! Uning shoxlari yovvoyi buqaning shoxlaridaydir. Bir shoxi Efrayimning tuman lashkaridir, Boshqa shoxi Manashening minglab jangchilaridir. Bu shoxlari bilan Yusuf xalqlarni quvadi, Yer yuzining chetigacha ularni haydab boradi.”

¹⁸Zabulun va Issaxor qabilasi haqida shunday dedi: “Zabulun safarga chiqqanda xursand bo‘lsin, Issaxor esa chodirlarida shodlansin.

¹⁹Ular butun xalqni toqqa chaqiradi, U yerda ma’qul qurbonliklar keltiradi, Dengizning boyligi bilan, Qumdagi xazina bilan oziqlanadi.”

²⁰Gad qabilasi haqida shunday dedi: “Gadning yerini kengaytirgan Xudoni olqishlang! Gad bir arslon kabi yashaydi, Qurbonining qo‘lu boshini uzib tashlaydi.

²¹U o‘zi uchun yerning a’losini oldi, Yo‘lboshchining ulushi unga berildi. Xalqning yo‘lboshchilari yig‘ilganda Gad Xudoning odil irodasini bajardi, Xudoning Isroil uchun chiqargan qarorini ado etdi.”

²²Dan qabilasi haqida shunday dedi: “Dan yosh sherga o‘xshar, U Bashandan sakrab chiqar.”

²³Naftali qabilasi haqida shunday dedi: “Egamizning muruvvati Naftaliga yor! Barakasi uni to‘ldirdi bisyor! G‘arbu janubga u egalik qilar.”

²⁴Osher qabilasi haqida shunday dedi: “O‘g‘illar orasida Osher eng barakalisidir, Aka–ukalari uni afzal ko‘rsin, Oyog‘i zaytun moyida bo‘lsin.

²⁵Tambalari temiru bronzadan bo‘lsin, Umri qancha uzoq bo‘lsa, kuchi shuncha ko‘p bo‘lsin.” Muso Isroil xalqiga shunday dedi:

²⁶“Ey azizim Isroil, Xudoyinga o‘xshagani yo‘q, U salobat bilan bulutlarni egarlaydi, Senga yordam bergani osmondan uchib keladi,

²⁷Qadimdan bor bo‘lgan Xudo sening panohingdir, Uning abadiy qo‘llari seni tutib turadi. U dushmanlaringni oldingdan haydaydi, Senga: ‘Ularni qirib tashla!’ deb aytadi.

²⁸Ey Isroil, xavf–xatarsiz yashaysan, Yoqub xonadoni, osoyishta bo‘lasan. Sening yering don va sharobga boydir, Yurtingga osmondan shudring tushadi.

²⁹Ey Isroil, sen baxtlisan! Kim senga o‘xshar?! Sen Egamiz qutqargan xalqsan. Seni asraydigan qalqoning, Shonli qiliching Egamizdir. Oldingda dushmanlaring tiz cho‘kadi, Sen esa ularning belini ezasan.”