Read O‘zbek tilidagi Muqaddas Kitob, 2013 Qonunlar 34 Bible Online

Qonunlar 34 - O‘zbek tilidagi Muqaddas Kitob, 2013 bible

Qonunlar 34

¹Muso Mo‘ab tekisligidan Navo tog‘ining cho‘qqisiga chiqdi. Navo tog‘i Yerixo shahrining sharqida joylashgan Fisgax tog‘ chizmasining eng baland joyi edi. U yerdan Musoga Egamiz butun o‘lkani ko‘rsatdi: shimoldagi Dan shahrigacha cho‘zilgan butun Gilad yerini,

²hamma Naftali yerlarini, Efrayim va Manashe yerlarini, O‘rta yer dengizigacha cho‘zilgan butun Yahudo yerlarini,

³Nagav cho‘li va tekislikni. Bu tekislik Zo‘var shahridan to palmalar shahri bo‘lmish Yerixogacha cho‘zilgan edi.

⁴Egamiz Musoga dedi: — Men Ibrohim, Is’hoq, Yoqubga, sening avlodingga beraman, deb qasam ichib aytgan yurt mana shudir. Mana, bu yurtni o‘z ko‘zing bilan ko‘rding, lekin u yurtga kirmaysan.

⁵Egamiz aytganiday, Uning quli Muso o‘sha yerda, Mo‘ab yurtida vafot etdi.

⁶Egamiz uni Mo‘abda, Bayt–Piyor shahrining yaqinidagi bir vodiyda dafn qildi. Muso dafn qilingan joyni hozirgacha hech kim bilmaydi.

⁷Muso vafot etganda 120 yoshda edi. Lekin ko‘zlarining nuri hali so‘nmagan edi, g‘ayrati yo‘qolmagan edi.

⁸Isroil xalqi Mo‘ab tekisliklarida Muso uchun o‘ttiz kun aza tutdi. Muso uchun aza kunlari tamom bo‘ldi.

⁹Muso o‘limidan oldin Yoshuaga qo‘l qo‘yib, uni yo‘lboshchi qilib tayinlagan edi. Nun o‘g‘li Yoshuani Xudo donolik ruhi bilan to‘ldirdi. Isroil xalqi Yoshuaga bo‘ysundi, Egamiz Musoga buyurganlarning hammasini ular qildi.

¹⁰Isroilda Musoga o‘xshagan payg‘ambar boshqa chiqmadi. Egamiz Muso bilan yuzma–yuz gaplashar edi.

¹¹Egamiz uni Misr yurtida fir’avnga, uning a’yonlari va butun xalqiga alomatu mo‘jizalar ko‘rsatish uchun yuborgan edi.

¹²Muso butun Isroil xalqi oldida buyuk qudratu haybatli ishlarni namoyon qilgandi.