Read O‘zbek tilidagi Muqaddas Kitob, 2013 Qonunlar 4 Bible Online

Qonunlar 4 - O‘zbek tilidagi Muqaddas Kitob, 2013 bible

Qonunlar 4

¹Endi, ey Isroil, men sizlarga farmonlar va qonun–qoidalarni o‘rgataman. Ularga rioya qilinglar. Shunda yashaysizlar, ota–bobolaringizning Xudosi — Egamiz sizlarga berayotgan yerni mulk qilib olasizlar.

²Men sizlarga aytayotgan amrlarga hech narsa qo‘shmanglar, hech narsa olib ham tashlamanglar. Men sizlarga berayotgan Egangiz Xudoning amrlariga rioya qilinglar.

³Egamiz Piyor tog‘ida nimalar qilganini o‘z ko‘zlaringiz bilan ko‘rdingizlar. Piyordagi Baalga sajda qilgan hammani Egangiz Xudo yo‘q qilgan edi.

⁴Egamiz Xudoga sodiq bo‘lganlar esa bugun ham tirikdir.

⁵Egam Xudo amr qilganday, sizlarga farmonlarni va qonun–qoidalarni o‘rgatdim. Mulk qilib olayotgan o‘sha yurtda bularga rioya qilinglar.

⁶Mana shu farmonlar va qonun–qoidalarni bitta qoldirmay bajaringlar, toki sizlarning aql–idrokingizni boshqa xalqlar ko‘rsin. Ular bu qonunlar haqida eshitib: “Ha, haqiqatan bu buyuk xalq dono, aql–idroklidir”, deb aytsin.

⁷Egamiz Xudoga har safar iltijo qilganimizda U bizga yaqindir. Qaysi buyuk xalqning shunday xudosi bor?!

⁸Bugun men sizlarga farmonlar va qonun–qoidalar beryapman. Qaysi buyuk xalqning shunday adolatli qonun–qoidalari bor?!

⁹Faqat hushyor bo‘linglar. Ko‘zlaringiz bilan ko‘rganlaringizni unutmay, bir umr yuragingizda saqlanglar. Bularni o‘g‘illaringizga, nevara–chevaralaringizga ham aytib beringlar.

¹⁰Sizlar Sinay tog‘ida, Egangiz Xudo oldida turgan kuningizni eslanglar. O‘sha kuni Egamiz menga aytgandi: “Mening huzurimga xalqni yig‘. Ular so‘zlarimni eshitib, yer yuzida butun umrlari davomida Mendan qo‘rqishni o‘rgansinlar, bolalariga ham o‘rgatsinlar.”

¹¹Sizlar yaqin kelib, tog‘ning etagida turdingizlar. Tog‘ esa osmongacha ko‘tarilgan olovga burkanib, qop–qora bulutlar bilan qoplangan edi.

¹²Egamiz olov ichidan sizlarga gapirdi. Sizlar Uning so‘zlarini eshitdingizlar, qiyofasini esa ko‘rmadingizlar. Faqat Egamizning ovozi eshitilar edi, xolos.

¹³U O‘z ahdini sizlarga ayon qilib, bu ahdni — o‘nta amrni bajaringlar, deb farmon berdi. Egamiz ularni ikki tosh lavhaga yozdi.

¹⁴Iordanni kechib, mulk qilib oladigan yurtda bajarishingiz kerak bo‘lgan farmonlar va qonun–qoidalarni men sizlarga o‘rgatishimni buyurdi.

¹⁵Sinay tog‘ida Egamiz olov ichidan sizlarga gapirganda, sizlar biron qiyofa ko‘rmadingizlar. Shuning uchun ehtiyot bo‘linglar.

¹⁶Yana yo‘ldan ozib, o‘zingizga erkak yo ayol qiyofasidagi butni,

¹⁷yerda yashaydigan jonivor yo osmonda uchib yuruvchi qush qiyofasidagi butni,

¹⁸yerda sudralib yuruvchi jonivor yoki suvdagi baliq qiyofasidagi hech qanday butni yasamanglar.

¹⁹Shuningdek, osmonga qarab, quyosh, oy va yulduzlarni, jamiki samoviy jismlarni ko‘rib vasvasaga tushmanglar, ularga sig‘inmanglar, xizmat qilmanglar. Egamiz Xudo bularni, boshqa hamma xalqlar sig‘insin, deb bergan.

²⁰Sizlarni esa Egamiz Misrdan — temir o‘choq ichidan olib chiqdi. Sizlar bugungiday Uning xalqi bo‘lishingiz uchun sizlarni xalos qildi.

²¹Egamiz sizlarning dastingizdan mendan g‘azablandi: “Men Isroil xalqiga mulk qilib beradigan Iordanning narigi tomonidagi o‘sha hosildor yurtga sen kirmaysan”, — deb qasam ichdi.

²²Men Iordanning narigi tomoniga o‘tolmayman, mana shu yerda vafot etaman. Sizlar esa Iordandan o‘tib, o‘sha hosildor yurtni mulk qilib olasizlar.

²³Shunday ekan, ehtiyot bo‘linglar, Egangiz Xudo sizlar bilan qilgan ahdni esdan chiqarmanglar. U taqiqlagan qiyofadagi birorta butni o‘zlaringizga yasamanglar.

²⁴Axir, Egangiz Xudo yamlamay yutadigan olovdir, U rashkchi Xudodir.

²⁵O‘sha yurtda ko‘p yashaysizlar, bolalaringiz, nabiralaringiz tug‘iladi. Agar o‘shanda yo‘ldan ozsangiz, Egangiz Xudoning oldida qabihlik qilib, o‘zingizga turli qiyofadagi butlarni yasasangiz, U g‘azablanadi.

²⁶Bugun sizlarga qarshi yeru osmonni guvoh qilaman: agar menga itoatsizlik qilsangiz, yurtdan tez orada butunlay qirilib ketasizlar. Iordanni kechib, mulk qilib oladigan yurtda uzoq yashamaysizlar. Bittangiz qolmay halok bo‘lasizlar.

²⁷Egamiz sizlarni boshqa xalqlarning orasiga tarqatib yuboradi. O‘sha xalqlar orasida ayrimlaringiz omon qolasizlar.

²⁸U yerda inson qo‘li bilan yasalgan yog‘och va tosh xudolarga xizmat qilasizlar. U xudolar ko‘rolmaydi, eshitolmaydi, ovqat yeya olmaydi, hid bilmaydi.

²⁹Ammo u yerda Egangiz Xudoga yuz bursangiz, butun qalbingiz bilan, jonu dilingiz bilan Uni izlasangiz, topasizlar.

³⁰Kulfatda qolganingizda, boshingizga ko‘rgiliklar tushganda, oxiri Egangiz Xudoga qaytasizlar, Uning so‘ziga quloq solasizlar.

³¹O‘shanda U sizlarni tark etmaydi, yo‘q qilmaydi, ota–bobolaringiz bilan qasam ichib qilgan ahdini unutmaydi. Egangiz Xudo rahmdil Xudodir.

³²Endi sizlar dunyoga kelmasdan oldingi uzoq o‘tmishni, Xudo yer yuzida odamni yaratgan davrdan shu kungacha bo‘lgan davrni surishtirib ko‘ringlar. Dunyoning bu chetidan u chetigacha so‘ranglar–chi, shu qadar muhim voqea bo‘lganmi yoki shunga o‘xshash narsa haqida birortasi eshitganmi?!

³³Sizlarga o‘xshab olov ichidan gapirgan Xudoning ovozini eshitib, tirik qolgan birorta xalq bormi?!

³⁴Egangiz Xudo sizlar uchun Misrda nimalar qilganini o‘z ko‘zingiz bilan ko‘rdingiz. Qaysi xudo sinovlar, alomatu mo‘jizalar orqali, urush, qudratiyu ajoyibotlari va dahshatli voqealar orqali bir xalqni o‘zi uchun boshqa xalq orasidan olib chiqqan?!

³⁵“Egamiz Xudodir, Undan boshqa Xudo yo‘q”, deb anglashingiz uchun bu voqealar sizlarga ayon qilingan.

³⁶U sizlarga yo‘l–yo‘riq ko‘rsatish uchun osmondan ovoz berdi. Yer yuzida olov ustuni orqali sizlarga zohir bo‘ldi. Sizlar o‘sha buyuk olov ichidan Uning ovozini eshitdingizlar.

³⁷Egamiz Xudo ota–bobolaringizni sevar edi. Shuning uchun o‘zlaridan keyin ularning avlodlarini tanladi. Egamiz zohir bo‘lib, O‘zining buyuk qudrati bilan sizlarni Misrdan olib chiqdi.

³⁸Egamiz sizlardan kattaroq va kuchliroq xalqlarni oldingizdan haydab, ularning yurtiga sizlarni kiritmoqchi edi, xuddi bugungiday, mulk qilib oladigan yerlaringizni sizlarga bermoqchi edi.

³⁹Egamiz yeru osmondagi Xudodir, Undan boshqa Xudo yo‘qdir. Shuni bugun tan olib, doimo yuragingizda saqlang.

⁴⁰Bugun men sizlarga Egamizning farmonlari va amrlarini aytyapman, shularga rioya qilinglar. Shunda o‘zlaringiz ham, naslingiz ham farovon hayot kechirasizlar. Egangiz Xudo abadiy qilib berayotgan o‘sha yurtda uzoq yashaysizlar.

⁴¹Shundan keyin Muso Iordan daryosining sharq tomonida uchta shaharni ajratdi.

⁴²Agar qotil odamni bilmasdan, adovatsiz o‘ldirgan bo‘lsa, o‘sha shaharlardan biriga qochib borib, jonini qutqarishi mumkin.

⁴³Bu shaharlar quyidagilar edi: Ruben qabilasi uchun yassi tepalikdagi Bazer shahri, Gad qabilasi uchun Giladdagi Ramo‘t shahri, Manashe qabilasi uchun Bashandagi Go‘lon shahri.

⁴⁴Muso Isroil xalqiga quyidagi qonunlarni berdi.

⁴⁵Isroil xalqi Misrdan chiqqandan keyin, Muso shu shartlar, farmonlar va qonun–qoidalarni aytdi.

⁴⁶Muso bularni Iordan daryosining sharqiy qirg‘og‘ida, Bayt–Piyor ro‘parasidagi vodiyda bayon qildi. Bu yer ilgari Xashbonda hukmronlik qilgan Amor xalqining shohi Sixo‘nga qarashli edi. Muso bilan Isroil xalqi Misrdan chiqqanlarida, Sixo‘nni mag‘lub qilgan edilar.

⁴⁷Isroil xalqi Iordan daryosining sharqida yashagan ikkala Amor shohining yurtlarini, ya’ni shoh Sixo‘nning va Bashan shohi O‘gning yurtini bosib olgan edi.

⁴⁸Bu joylar Arnon soyligi etagidagi Aror shahridan Siriyon tog‘igacha, ya’ni Xermon tog‘igacha cho‘zilgan edi.

⁴⁹Shuningdek, Fisgax tog‘ tizmasining etagidagi O‘lik dengizgacha cho‘zilib, Iordan daryosining sharq tomonidagi butun Iordan vodiysini ham o‘z ichiga olgan edi.