Read O‘zbek tilidagi Muqaddas Kitob, 2013 Qonunlar 5 Bible Online

Qonunlar 5 - O‘zbek tilidagi Muqaddas Kitob, 2013 bible

Qonunlar 5

¹Muso jamiki Isroil xalqini bir joyga yig‘ib, ularga aytgan nutqini dovom ettirdi. Ey Isroil xalqi, eshitinglar! Bugun men sizlarga aytayotgan farmonlar va qonun–qoidalarga quloq solinglar. Bularni yod olib, bitta qoldirmay bajaringlar.

²Egamiz Xudo biz bilan Sinay tog‘ida ahd qildi.

³U nafaqat ota–bobolarimiz bilan, balki shu yerda turgan har bir odam bilan ahd qildi.

⁴Egamiz o‘sha tog‘da olov ichidan sizlar bilan yuzma–yuz gaplashdi.

⁵Men o‘shanda Egamiz bilan sizlarning orangizda turib, Uning gapini sizlarga aytib turdim. Chunki sizlar olovdan qo‘rqib, toqqa chiqmadingizlar. Egamiz shunday deb aytdi:

⁶“Men sizlarni Misrdagi qullikdan olib chiqqan Egangiz Xudoman.

⁷Mendan boshqa xudolarga sajda qilmang.

⁸O‘zlaringizga hech qanday butni yasamang. Osmonda yo yerda yo yer ostidagi suvda mavjud bo‘lgan biror narsaning shaklini yasamang.

⁹O‘sha xudolar yoki butlarga sajda qilmang, xizmat qilmang. Men, Egangiz Xudo, sizlarning sevgingizni boshqa xudolar bilan baham ko‘rmaydigan Xudoman. Mendan nafratlanadiganlarni jazolayman, ularning gunohlari oqibatlarini bolalariga, nabiralariga va chevaralariga olib kelaman.

¹⁰Lekin Meni sevib, amrlarimga rioya qiladiganlarning ming–ming avlodlariga sodiq sevgimni ko‘rsataman.

¹¹Men, Egangiz Xudoning ismini suiiste’mol qilmang. Kim Mening ismimni suiiste’mol qilsa, o‘shani jazosiz qoldirmayman.

¹²Men, Egangiz Xudoning amriga ko‘ra, Shabbat kunini muqaddas deb biling, bu kunga rioya qilib yuring.

¹³Hamma ishlaringizni bajarishingiz uchun olti kun bor.

¹⁴Yettinchi kun esa Men, Egangiz Xudoga atalgan Shabbat kunidir. O‘sha kuni hech qanday ish qilmanglar. O‘g‘illaringiz, qizlaringiz, qullaringiz, cho‘rilaringiz, molingiz, eshagingiz, birorta hayvoningiz, shahringizdagi musofirlar ham hech qanday ish qilishmasin. Qulu cho‘rilaringiz sizday dam olsin.

¹⁵Yodingizda tuting: sizlar Misrda qul edingiz, Men qudratim va ajoyibotlarim bilan sizlarni u yerdan olib chiqdim. Shuning uchun, Shabbat kuniga rioya qilinglar, deb amr etdim.

¹⁶Men, Egangiz Xudo amr etganimdek, ota–onangizni hurmat qiling. O‘shanda Men sizlarga berayotgan yurtda umringiz uzoq bo‘lib, baxtiyor yashaysiz.

¹⁷Qotillik qilmang.

¹⁸Zino qilmang.

¹⁹O‘g‘irlik qilmang.

²⁰Qo‘shningizga qarshi yolg‘on guvohlik bermang.

²¹Qo‘shningizning xotiniga ko‘z olaytirmang. Qo‘shningizning uyi, dalasi, quli yoki cho‘risi, moli yoxud eshagi, unga qarashli biror narsasiga ko‘z olaytirmang.”

²²Egangiz bu amrlarni hammangizga o‘sha tog‘da olov, bulut va qorong‘ilik ichidan baland ovoz bilan aytdi, boshqa biron so‘z qo‘shmadi. So‘ngra U bu amrlarni ikkita tosh lavhaga yozib, menga berdi.

²³Tog‘ olov bo‘lib yonayotganda, qorong‘ilik ichidan ovoz eshitdingiz. Shunda qabilalaringiz boshliqlari va oqsoqollari mening oldimga kelib,

²⁴shunday deyishdi: “Mana, Egamiz Xudo ulug‘vorligini, buyukligini bizga ko‘rsatdi. Uning ovozini biz olov ichidan eshitdik. Bugun biz Xudoning inson zotiga gapirganini, ammo inson tirik qolganini ko‘rdik.

²⁵Nima qilamiz endi jonimizni xavf ostiga qo‘yib?! Mana bu buyuk olov bizni yondirib tashlaydi–ku. Agar biz Egamiz Xudoning ovozini yana eshitsak, aniq o‘lamiz.

²⁶Axir, olov ichidan gapiradigan barhayot Xudoning ovozini biz kabi eshitib, tirik qolgan inson bormi?!

²⁷Endi sen bor, Egamiz Xudoning hamma so‘zlarini eshit. Keyin Uning har bir so‘zini bizga ayt. Biz quloq solib, bajaramiz.”

²⁸Sizlar menga gapirganlaringizda, Egamiz so‘zlaringizni eshitib, shunday dedi: “Men bu xalqning senga aytgan so‘zlarini eshitdim, hamma aytganlari to‘g‘ri.

²⁹Qaniydi, ularning yuraklari har doim shunday bo‘lsa, Mendan qo‘rqib, amrlarimni bajarishsa! Shunda o‘zlari ham, farzandlari ham to abad baxtli bo‘lishardi.

³⁰Endi ularning oldiga borib: ‘Chodirlaringizga qaytinglar’, deb ayt.

³¹Sen esa shu yerda Mening yonimda qolasan. Men senga amrlar, farmonlar va qonun–qoidalar beraman. Sen bularni xalqqa o‘rgatasan. Men ularga mulk qilib beradigan yurtda hammasiga rioya qilishsin.”

³²Endi o‘ngga ham, chapga ham og‘may, Egangiz Xudo sizlarga buyurgan amrlarga bitta qoldirmay rioya qilinglar.

³³Egangiz Xudo amr etgan yo‘ldan yuringlar. Shunda yashaysizlar, baxtli bo‘lasizlar, mulk qilib oladigan yurtda uzoq umr ko‘rasizlar.