Read O‘zbek tilidagi Muqaddas Kitob, 2013 Qonunlar 6 Bible Online

Qonunlar 6 - O‘zbek tilidagi Muqaddas Kitob, 2013 bible

Qonunlar 6

¹Egangiz Xudo, xalqqa o‘rgatgin, deb menga bergan amrlar, farmonlar va qonun–qoidalar shulardan iboratdir. Iordanni kechib o‘tib, mulk qilib oladigan yurtda bularga rioya qilinglar.

²Men sizlarga beradigan farmon va amrlarga o‘zlaringiz, farzandlaringiz va nabiralaringiz, hammangiz rioya qilinglar. Bir umr Egangiz Xudodan qo‘rqinglar, shunda umringiz uzoq bo‘ladi.

³Ey Isroil xalqi, quloq soling, bularni bitta qoldirmay bajaring. Shunda ota–bobolaringizning Xudosi — Egamiz bergan va’daga ko‘ra, sut va asal oqib yotgan yurtda ko‘payasizlar, baxtiyor bo‘lasizlar.

⁴Ey Isroil, quloq sol! Egamiz Xudo tanho Egadir.

⁵Egangiz Xudoni butun qalbingiz bilan, jonu dilingiz bilan, butun vujudingiz bilan sevinglar.

⁶Bugun men sizlarga bergan bu amrlarni yuragingizda saqlanglar.

⁷Bularni bolalaringizga ham o‘rgatinglar. Uyda o‘tirganda ham, yo‘lda yurganda ham, yotganingizda ham, turganingizda ham shular haqida gapiringlar.

⁸Bularni qo‘lingizga belgi qilib bog‘langlar, peshanangizga nishon qilib taqib olinglar.

⁹Eshigingiz kesakisiga, darvozalaringizga yozib qo‘yinglar.

¹⁰Egangiz Xudo ota–bobolaringiz Ibrohim, Is’hoq, Yoqubga qasam ichib, va’da qilgan yerga sizlarni olib kiradi. U sizlarga o‘zingiz qurmagan katta va chiroyli shaharlarni beradi.

¹¹O‘zingiz to‘ldirmagan, boyliklarga to‘la uylarni, o‘zingiz qazimagan sardobalarni, siz ekmagan toklar va zaytunzorlarni beradi. O‘shanda yeb to‘yganlaringizdan keyin

¹²ehtiyot bo‘linglar! Sizlarni Misrdagi qullikdan olib chiqqan Egamizni unutmanglar.

¹³Egangiz Xudodan qo‘rqinglar. Faqat Unga xizmat qilinglar. Yolg‘iz Uning nomi bilan qasam ichinglar.

¹⁴Begona xudolarga, atrofingizdagi xalqlarning xudolariga ergashmanglar.

¹⁵Axir, orangizdagi Egangiz Xudo rashkchi Xudodir. U g‘azablanib, sizlarni yer yuzidan yo‘qotib yuboradi.

¹⁶Massaxda qilganingizdek, Egangiz Xudoni sinamanglar.

¹⁷Uning amrlarini, farmon va shartlarini bitta qoldirmay bajaringlar.

¹⁸Egamiz to‘g‘ri va yaxshi deb bilgan ishlarni qilinglar. Shunda Egamiz ota–bobolaringizga qasam ichib, va’da qilgan hosildor yurtni sizlar mulk qilib olasizlar, baxtiyor bo‘lasizlar.

¹⁹Egamiz O‘zi aytganidek, yurtingizda yashagan barcha dushmanlaringizni haydab chiqaradi.

²⁰Kelajakda farzandlaringiz sizlardan: “Egamiz Xudo sizlarga bergan qonun–qoidalar, farmon va shartlarning ma’nosi nima?” deb so‘raydi.

²¹Ularga shunday deb javob beringlar: “Biz Misrda fir’avnning qullari edik. Egamiz O‘z qudrati bilan bizni Misrdan olib chiqdi.

²²U bizning ko‘z oldimizda Misrga, fir’avn va uning butun xonadoniga buyuk, qo‘rqinchli alomatu mo‘jizalarni ko‘rsatdi.

²³Ota–bobolarimizga ont ichib va’da qilgan yurtga bizni olib kirish uchun, o‘sha yurtni bizga berish uchun bizni Misrdan olib chiqdi.

²⁴Egamiz Xudo: ‘Mana shu farmonlarning hammasiga rioya qilinglar, Mendan qo‘rqinglar, shunda bugungiday tirik bo‘lasiz, baxtli hayot kechirasiz’, dedi.

²⁵Egamiz Xudoning oldida mana shu amrlarni bitta qoldirmay bajarsak, solih bo‘lamiz.”