Read O‘zbek tilidagi Muqaddas Kitob, 2013 Qonunlar 8 Bible Online

Qonunlar 8 - O‘zbek tilidagi Muqaddas Kitob, 2013 bible

Qonunlar 8

¹Bugun men sizlarga berayotgan amrlarni bitta qoldirmay bajaringlar, shunda yashaysizlar, ko‘payasizlar. Egamiz ota–bobolaringizga qasam ichib, beraman, deb va’da qilgan yurtga kirasizlar. O‘sha yurtni mulk qilib olasizlar.

²Egangiz Xudo qirq yil davomida sizni sahrodan olib yurdi, o‘sha uzoq safarni yodingizda tutinglar. Egamiz yuragingizda nima borligini, Uning amrlarini bajarishingizni yoki bajarmasligingizni bilishi uchun, sizlarni qiyinchiliklarga duchor qilib, sinadi.

³U sizlarni och qoldirdi, so‘ng o‘zlaringiz ko‘rmagan, ota–bobolaringiz ham ko‘rmagan manna bilan qorningizni to‘ydirdi. Egamiz sizlarga inson faqat non bilan emas, balki Xudoning og‘zidan chiqqan har bir so‘z bilan hayot ekanini o‘rgatish uchun shunday qildi.

⁴Mana shu qirq yil davomida kiyimlaringiz eskirib ketmadi, oyog‘ingiz ham shishmadi.

⁵Endi shuni bilinglarki, inson farzandini qanday tarbiyalasa, Egangiz Xudo ham sizlarni shunday tarbiyalaydi.

⁶Egangiz Xudoning amrlariga rioya qilinglar. U ko‘rsatgan yo‘ldan yuringlar. Undan qo‘rqinglar.

⁷U sizlarni hosildor yurtga olib boradi, u yerda irmoqlar, buloqlar, vodiy va qirlarda yer ostidan chiqadigan suvlar bor.

⁸Bug‘doy, arpa, uzum, anjir, anor, zaytun moyi va asal o‘sha yurtda mo‘ldir.

⁹U yerda to‘yib non yeysizlar, hech narsaga muhtoj bo‘lmaysizlar. U yer shunday bir yurtki, qoyalardan temir, qirlaridan mis chiqarasizlar.

¹⁰O‘sha yerda yeb to‘yganingizda, sizlarga bergan hosildor yurt uchun Egangiz Xudoni olqishlanglar.

¹¹Hushyor bo‘linglar, men bugun sizlarga aytayotgan Egamizning amrlarini, farmonlar va qonun–qoidalarini bajarmay qo‘ymanglar. Egangiz Xudoni esingizdan chiqarmanglar.

¹²Yeb, to‘yganingizda, chiroyli uylar qurib, joylashganingizda,

¹³mol, qo‘ylaringiz, oltin–kumushingiz va barcha mulkingiz ko‘payganda,

¹⁴gerdayib ketmanglar. Sizlarni Misrdagi qullikdan olib chiqqan Egangiz Xudoni esingizdan chiqarmanglar.

¹⁵U sizlarni zaharli ilonlar, chayonlarga to‘la o‘sha bahaybat va qo‘rqinchli sahrodan, suvsiz, taqir joylardan olib o‘tdi. U yerda sizlar uchun qoyadan suv chiqardi.

¹⁶Ota–bobolaringiz bilmagan manna bilan sahroda qorningizni to‘yg‘izdi. Oqibatda sizlarga yaxshilik keltirish uchun, sizlarni qiynchiliklarga duchor qilib, sinadi.

¹⁷Xayolingizda: “O‘z kuch–qudratim bilan mana shu boylikni topdim”, demanglar.

¹⁸Ammo Egangiz Xudoni doimo yodingizda tutinglar. Zero, boylikni topishga kuch bergan Egangizdir. Shunday qilib, U ota–bobolaringiz bilan qasam ichib, qilgan ahdini bugun bajarmoqda.

¹⁹Bugun men sizlarni jiddiy ogohlantiryapman. Agar Egangiz Xudoni unutib boshqa xudolarga ergashsangizlar, ularga xizmat qilib, sig‘insangizlar sizlar albatta yo‘q bo‘lasizlar.

²⁰Egangiz Xudo boshqa xalqlarni oldingizdan yo‘q qilgani kabi, Uning amrlariga quloq solmaganingiz uchun, sizlarni ham yo‘q qiladi.