Read O‘zbek tilidagi Muqaddas Kitob, 2013 Yuhanno 10 Bible Online

Yuhanno 10 - O‘zbek tilidagi Muqaddas Kitob, 2013 bible

Yuhanno 10

¹“Sizlarga chinini aytayin: kim qo‘y qo‘rasiga eshikdan kirmay, boshqa yo‘ldan oshib tushsa, u o‘g‘ri va bosqinchidir.

²Eshikdan kirgan odam esa qo‘ylarning cho‘ponidir.

³Qorovul unga eshikni ochib beradi. Qo‘ylar uning ovoziga quloq soladi. U esa o‘z qo‘ylarini nomma–nom chaqirib tashqariga olib chiqadi.

⁴U o‘z qo‘ylarini qo‘radan olib chiqqanda, ularning oldida boraveradi. Qo‘ylar esa unga ergashadi, chunki ular cho‘ponning ovozini biladilar.

⁵Begona kishiga esa ergashmaydilar. Aksincha, begonaning ovozini tanimay, undan qochadilar.”

⁶Iso bu matalni aytib berganda, tinglovchilar U nima demoqchi ekanligini tushunmadilar.

⁷Shu sababdan Iso yana dedi: “Sizlarga chinini aytay: Men qo‘ylar uchun eshikman.

⁸Mendan oldin kelganlarning hammasi o‘g‘ri va bosqinchi edilar. Lekin qo‘ylar ularga quloq solmadilar.

⁹Men eshikman. Kim Men orqali kirsa, najot topadi. U kirib chiqib, yaylov ham topadi.

¹⁰O‘g‘ri faqat o‘g‘irlash, bo‘g‘izlash, barbod qilish uchun keladi. Men esa ularga hayot, farovon hayot berish uchun kelganman.

¹¹Men yaxshi Cho‘ponman. Yaxshi Cho‘pon qo‘ylari uchun jonini fido qiladi.

¹²Yollangan odam esa qo‘ylarning na cho‘poni, na egasidir. U bo‘rining kelganini ko‘rgach, qo‘ylarni tashlab qochadi. Bo‘ri esa qo‘ylarni talab, tumtaraqay qiladi.

¹³Yollangan odam shunchaki yollangan bo‘lgani uchun va qo‘ylar haqida qayg‘urmagani uchun qochadi.

¹⁴[14-15] Men yaxshi Cho‘ponman. Otam Meni va Men Otamni bilganimday, Men qo‘ylarimni bilaman, ular ham Meni biladilar. Men qo‘ylarim uchun jonimni fido qilaman.

¹⁶Bu qo‘rada bo‘lmagan boshqa qo‘ylarim ham bor. Ularni ham olib kelishim kerak. Ular ham Mening ovozimga quloq soladi, shunda bir suruv, bir cho‘pon bo‘ladi.

¹⁷Men jonimni qaytib olish uchun, uni fido qilaman, shu bois Otam Meni yaxshi ko‘radi.

¹⁸Hech kim jonimni Mendan olmayapti. Men O‘z ixtiyorim bilan uni fido qilaman. Jonimni berishga va uni qaytarib olishga hokimiyatim bor. Buni Menga Otam buyurgan.”

¹⁹Isoning bu so‘zlari tufayli, yahudiylar orasida yana kelishmovchilik bo‘ldi.

²⁰Oralaridan ko‘pchilik: — Uni jin uribdi, U aqldan ozgan! Nega Unga quloq solyapsizlar? — der edilar.

²¹Boshqalari esa: — Bu jin urganning so‘zlari emas. Jin ko‘r odamning ko‘zlarini ocha olarmidi?! — deb aytishardi.

²²O‘sha vaqtda Quddusda Ma’badni Bag‘ishlash bayrami nishonlanayotgan edi. Qish.

²³Iso Ma’badda Sulaymon ayvoni degan joyda aylanib yurar edi.

²⁴Yahudiylar Uning atrofini o‘rab oldilar. — Qachongacha bizni ikkilantirasiz? Agar Masih bo‘lsangiz, bizga ochig‘ini ayting, — deyishdi.

²⁵Iso ularga javob berdi: — Men sizlarga aytdim, ammo sizlar ishonmayapsizlar. Otam nomidan qilayotgan ishlarim kimligimni ko‘rsatib turibdi.

²⁶Sizlar esa ishonmayapsizlar, chunki sizlar Mening qo‘ylarimdan emassizlar.

²⁷Mening qo‘ylarim ovozimga quloq soladi. Men ularni taniyman, ular esa Menga ergashib yurishadi.

²⁸Men ularga abadiy hayot beraman, ular hech qachon halok bo‘lmaydilar. Hech kim ularni Mening qo‘limdan tortib ololmaydi.

²⁹Ularni Menga bergan Otam hammadan buyukdir. Otamning qo‘lidan ularni tortib olishga hech kimning kuchi yetmaydi.

³⁰Men va Otam — birmiz.

³¹Yahudiylar yana Isoni toshbo‘ron qilmoqchi bo‘ldilar.

³²— Men sizlarga Ota buyurgan ko‘p xayrli ishlarni ko‘rsatdim, ularning qaysi biri uchun Meni toshbo‘ron qilmoqchisizlar? — deb so‘radi Iso.

³³Yahudiylar Unga shunday deyishdi: — Xayrli ishingiz uchun emas, kufrligingiz uchun Sizni toshbo‘ron qilmoqchimiz. Siz odam bo‘la turib O‘zingizni Xudo deyapsiz!

³⁴Iso shunday javob qaytardi: — Sizlar o‘zlaringiz doim o‘qiydigan Tavrotda: “Aytdimki: Hammangiz xudodirsiz”, deb yozilgan emasmi?!

³⁵O‘zlaringiz bilasizlar: Muqaddas Bitiklarni o‘zgartirib bo‘lmaydi. Xudoning kalomini olgan odamlar “xudolar” deb atalgan–ku!

³⁶Meni esa Otam O‘zi uchun ajratib olib dunyoga yuborgan. Men “Xudoning O‘g‘liman” deganim uchun kufrlik qilgan bo‘lamanmi?!

³⁷Agar Men Otamning ishlarini qilmayotgan bo‘lsam, Menga ishonmay qo‘ya qolinglar.

³⁸Bordi–yu, Uning ishlarini qilayotgan bo‘lsam, Menga ishonmasangiz ham, qilayotgan ishlarimga ishoninglar. Shunda Ota Menda va Men Otada ekanimni bilib, anglab olasizlar.

³⁹Ular yana Isoni ushlab olishga harakat qildilar, ammo Iso ularning changalidan qutulib qoldi.

⁴⁰So‘ng Iso Iordan daryosining narigi tomoniga, ilgari Yahyo odamlarni cho‘mdirib yurgan joyga qaytib borib, u yerda qoldi.

⁴¹Uning oldiga ko‘p odamlar kelishardi. Ular shunday deb aytishardi: — Yahyo hech qanday alomat ko‘rsatmagan edi, lekin Yahyoning bu Odam haqida aytgan hamma gapi to‘g‘ri chiqdi.

⁴²Shunday qilib, o‘sha yerdagi ko‘p odamlar Isoga ishondilar.