Read O‘zbek tilidagi Muqaddas Kitob, 2013 Yuhanno 13 Bible Online

Yuhanno 13 - O‘zbek tilidagi Muqaddas Kitob, 2013 bible

Yuhanno 13

¹Fisih bayramiga oz qolgan edi. Iso bu dunyoni tark etib, Otasi oldiga boradigan vaqt–soati kelganini bilar edi. U dunyodagi O‘zinikilarni yaxshi ko‘rar edi, ularni oxirigacha yaxshi ko‘rdi.

²Kechki ovqat payti edi. Shimo‘nning o‘g‘li Yahudo Ishqariyotning diliga iblis allaqachon Isoga xiyonat qilish niyatini solgan edi.

³Iso esa Otasi hamma narsani Uning qo‘liga berganini bilar edi, U Xudodan kelib, yana Xudoning oldiga qaytayotganini ham bilar edi.

⁴Shunday qilib, Iso dasturxondan turib, ustki kiyimini yechib tashladi. Sochiqni olib beliga bog‘ladi.

⁵Keyin tog‘oraga suv quyib, shogirdlarining oyoqlarini yuvishga tushdi. Beliga bog‘lagan sochiq bilan ularning oyoqlarini artib quritdi.

⁶Iso Shimo‘n Butrusning oldiga keldi. — Hazrat, nahot oyoqlarimni Siz yuvsangiz?! — dedi Butrus.

⁷— Hozir nima qilayotganimni sen bilmaysan, keyin tushunib olasan, — dedi Iso unga javoban.

⁸— Mening oyoqlarimni ikki dunyoda ham yuvmaysiz! — dedi Butrus. — Agar oyoqlaringni yuvmasam, Menga qarashli bo‘lmaysan, — dedi Iso.

⁹Shunda Shimo‘n Butrus dedi: — Hazrat, nafaqat oyoqlarimni, qo‘llarim bilan boshimni ham yuvib qo‘ying!

¹⁰Iso unga dedi: — Cho‘milgan odam faqat oyog‘ini yuvsa bas, u tamoman pokdir. Sizlar ham poksizlar, ammo hammangiz emas.

¹¹Iso O‘ziga xoinlik qiladigan odamni bilar edi, shuning uchun “Hammangiz ham pok emassizlar”, dedi.

¹²Shogirdlarining oyoqlarini yuvib bo‘lgach, Iso ustki kiyimini kiyib, yana dasturxon oldiga yonboshladi. So‘ng shogirdlaridan so‘radi: — Hozir nima qilganimni tushundilaringmi?

¹³Sizlar Meni “Ustoz”, “Hazrat” deb chaqirasizlar va to‘g‘ri qilasizlar, chunki Men xuddi shundayman.

¹⁴Agar Men Hazratingiz va Ustozingiz bo‘la turib oyoqlaringizni yuvgan bo‘lsam, sizlar ham bir–biringizning oyoqlaringizni yuvishingiz shart.

¹⁵Men sizlarga nima qilgan bo‘lsam, sizlar ham o‘shani qilishingiz kerak. Men sizlarga o‘rnak ko‘rsatdim.

¹⁶Sizlarga chinini aytayin: qul o‘zining xo‘jayinidan ustun emas, elchi ham uni yuborgandan ustun emas.

¹⁷Agar gapimni uqqan bo‘lsangiz, bunga amal qilinglar, shunda baxtli bo‘lasizlar!

¹⁸Iso gapida davom etib dedi: — Mening gaplarim hammangizga tegishli emas. Men kimlarni tanlaganimni bilaman. Muqaddas Bitiklarda: “Nonimni yegan kishi Menga qarshi bosh ko‘tardi”, — deb aytilgan. Bu so‘zlar bajo bo‘lishi kerak.

¹⁹Men buni sizlarga hozirdan, yuz bermasidan oldin aytib qo‘yyapman. Toki yuz berganda, Masih Men ekanligimga ishoninglar.

²⁰Sizlarga chinini aytay: Kim Men yuborgan odamni qabul qilsa, Meni qabul qilgan bo‘ladi. Meni qabul qilgan esa Meni Yuborganni qabul qilgan bo‘ladi.

²¹Iso qattiq iztirob chekib, dedi: — Sizlarga chinini aytayin, orangizdan bittangiz Menga xiyonat qiladi.

²²Shogirdlari esa U kimni nazarda tutayotganini bilmay, gangib bir–biriga qarab turar edilar.

²³Shogirdlaridan biri Isoning yonida yonboshlagan edi. U Isoning sevikli shogirdi edi.

²⁴Shimo‘n Butrus o‘sha shogirdga: “Iso kim haqida gapiryapti, so‘ra–chi”, deb imo–ishora qildi.

²⁵Shunda u engashib, Isodan: — Hazrat, u kim? — deb so‘radi.

²⁶Iso javob berdi: — Men bir burda nonni kosaga botirib kimga bersam, u o‘shadir, — dedi. So‘ng burda nonni botirib, Shimo‘n o‘g‘li Yahudo Ishqariyotga berdi.

²⁷Yahudo burdani olar–olmas, shayton uning ichiga kirib oldi. — Qiladiganingni tezroq qil, — dedi unga Iso.

²⁸Dasturxon atrofidagilardan hech kim nima uchun Iso bu so‘zlarni Yahudoga aytganini tushunmadi.

²⁹Pul qutisi Yahudoda bo‘lgani sababli, ba’zilari Iso unga: “Bayram uchun bizga kerak bo‘ladigan narsalarni sotib ol”, yoki “Kambag‘allarga bir nima ber”, deyapti deb o‘ylardilar.

³⁰Yahudo esa o‘sha burda nonni olgan zahoti tashqariga chiqib ketdi. Tun edi.

³¹Yahudo chiqib ketgach, Iso dedi: — Inson O‘g‘lining ulug‘lanadigan vaqti keldi. U orqali Xudo ulug‘lanadi.

³²Inson o‘g‘li orqali Xudo ulug‘lanar ekan, Uni ham O‘z ulug‘vorligiga sherik qiladi.

³³Bolalarim! Endi Men sizlar bilan uzoq bo‘lmayman. Meni qidirasizlar. Yahudiylarga aytgan edim, sizlarga ham aytyapman: Men boradigan joyga sizlar borolmaysizlar.

³⁴Sizlarga yangi amr beryapman: bir–biringizni sevinglar. Men sizlarni qanday sevgan bo‘lsam, sizlar ham bir–biringizni shunday sevinglar.

³⁵Agar bir–biringizni sevsangiz, sizlar Mening shogirdlarim ekaningizni hamma shundan bilib oladi.

³⁶Shimo‘n Butrus Isoga dedi: — Hazrat, Siz qayerga ketyapsiz? — Hozir Men boradigan joyga sen orqamdan borolmaysan, keyinchalik borasan, — dedi unga Iso.

³⁷Butrus so‘radi: — Hazrat, nega hozir orqangizdan borolmas ekanman? Men Siz uchun jonimni berishga tayyorman!

³⁸Iso javob berdi: — Sen rostdan ham Men uchun joningni berishga tayyormisan?! Senga chinini aytaman, xo‘roz qichqirmasdanoq, sen uch marta Mendan tonasan!