Read O‘zbek tilidagi Muqaddas Kitob, 2013 Yuhanno 15 Bible Online

Yuhanno 15 - O‘zbek tilidagi Muqaddas Kitob, 2013 bible

Yuhanno 15

¹“Men haqiqiy tokman, Otam esa bog‘bondir.

²Hosil bermaydigan har bir novdamni U kesib tashlaydi. Hosil beradigan har bir novdani esa, yana ko‘proq hosil bersin deb, xomtok qilib tozalaydi.

³Men sizga aytgan so‘zim orqali sizlar allaqachon tozalanib bo‘lgansizlar.

⁴Men bilan aloqada bo‘linglar, shunda Men sizlar bilan aloqada bo‘laman. Tokka ulanmagan novda o‘z–o‘zidan hosil berolmaydi. Shu singari sizlar ham Men bilan aloqada bo‘lmasangizlar, hosil berolmaysizlar.

⁵Men — tok, sizlar — novdasizlar. Agar Menda bo‘lsangizlar va Men sizlarda bo‘lsam, ko‘p hosil berasizlar. Mensiz hech narsa qilolmaysizlar.

⁶Kim Men bilan aloqani uzsa, novda kabi tashlab yuboriladi va quriydi. Bunday novdalarni esa yig‘ib, o‘tga tashlab yondirishadi.

⁷Agar siz Men bilan aloqada bo‘lib, so‘zlarimni qalbingizga jo qilsangizlar, istaganingizni so‘ranglar, sizga beriladi.

⁸Sizlar ko‘p hosil berib, Mening shogirdlarim ekanligingizni isbotlaysiz. Bu orqali Otam ulug‘lanadi.”

⁹“Ota Meni qanday sevgan bo‘lsa, Men ham sizlarni shunday sevdim. Sevgimga sodiq qolinglar.

¹⁰Men Otamning amrlariga amal qilib, Uning sevgisiga sodiq qolganman. Xuddi shu singari sizlar ham, Mening amrlarimga amal qilsangizlar, sevgimga sodiq qolasizlar.

¹¹Mening shodligim qalbingizni to‘ldirsin, deb sizlarga bu so‘zlarni aytdim.

¹²Mening amrim shu: Men sizlarni qanday sevgan bo‘lsam, sizlar ham bir–biringizni shunday sevinglar.

¹³Kim o‘z jonini do‘stlari uchun fido qilsa, bundan ortiq sevgi yo‘q.

¹⁴Agar sizlar amrlarimni bajo keltirsangizlar, Mening do‘stlarim bo‘lasizlar.

¹⁵Men sizlarni endi qul deb atamayman. Qul xo‘jayini nima qilishini bilmaydi. Sizlarni do‘stlarim deyman, chunki Otamdan eshitgan hamma narsani sizlarga aytdim.

¹⁶Sizlar Meni emas, Men sizlarni tanladim. Men sizlarni: “Borib hosil bersin, hosili boqiy bo‘lsin”, deb tanladim. Shunda Mening nomimdan Otadan nima so‘rasangizlar, U sizlarga beradi.

¹⁷Xullas, sizlarga amrim shu: bir–biringizni sevinglar!”

¹⁸“Agar dunyo sizlardan nafratlanayotgan bo‘lsa, bilingki, sizlardan ilgari Mendan nafratlangan.

¹⁹Sizlar bu dunyoga tegishli bo‘lganingizda edi, dunyo sizlarni o‘ziniki kabi sevar edi. Sizlar esa bu dunyoga tegishli emassizlar. Men sizlarni bu dunyodan tanlab oldim. Ana shu sababdan dunyo sizlardan nafratlanadi.

²⁰Qul o‘z xo‘jayinidan ustun emas, degan so‘zimni eslanglar. Agar Meni quvg‘in qilgan bo‘lsalar, sizlarni ham quvg‘in qiladilar. Agar Mening so‘zlarimga rioya qilgan bo‘lsalar, sizlarnikiga ham rioya qiladilar.

²¹Odamlar bularni sizlarga Mening nomim tufayli qiladilar. Axir, ular Meni Yuborganni tanimaydilar.

²²Agar Men kelib, ularga gapirmaganimda edi, ular Menga ishonmaganlari uchun gunohda ayblanmas edi. Endi bo‘lsa gunohlarini oqlash uchun bahona topa olmaydilar.

²³Mendan nafratlangan odam Otamdan ham nafratlanadi.

²⁴Agar Men ular orasida boshqa hech kim qilmagan mo‘jizalarni qilmaganimda edi, ular gunohda ayblanmas edi. Endi bo‘lsa mo‘jizalarimni ko‘rdilar–u, Mendan ham, Otamdan ham nafratlandilar.

²⁵Bu esa Tavrotdagi: “Mendan sababsiz nafrat etganlar”, degan so‘zlar bajo bo‘lishi uchun sodir bo‘ldi.

²⁶Men sizlarga Otamdan yuboradigan Homiy, ya’ni Otamdan chiqqan Haqiqat Ruhi kelganda Men to‘g‘rimda guvohlik beradi.

²⁷Sizlar ham guvohlik berasizlar, chunki boshdanoq Men bilan birga bo‘lgansizlar.”