Read O‘zbek tilidagi Muqaddas Kitob, 2013 Yuhanno 19 Bible Online

Yuhanno 19 - O‘zbek tilidagi Muqaddas Kitob, 2013 bible

Yuhanno 19

¹Shundan keyin Pilat Isoni olib ketishni va qamchilatishni buyurdi.

²Askarlar tikanlardan toj o‘rib, Isoning boshiga qo‘ydilar, ustiga safsar to‘n kiydirdilar.

³Isoning oldiga qayta–qayta kelib: — Yashavor–e, yahudiylarning Shohi! — deb, Uni tarsakilar edilar.

⁴Pilat yana tashqariga chiqib yahudiylarga xitob qildi: — Mana, Uni oldingizga chiqaryapman, bilib qo‘yinglar, men Undan hech qanday ayb topolmadim!

⁵Shu payt boshida tikanli toj, egnida safsar to‘n bilan Iso tashqariga chiqdi. — Mana, u Odam! — dedi Pilat ularga.

⁶Bosh ruhoniylar va mirshablar Isoni ko‘rib, baqirishdi: — Xochga mixlansin! Xochga mixlansin! — Uni sizlar olib xochga mixlanglar! Men Undan hech qanday ayb topolmadim, — dedi Pilat ularga.

⁷Yahudiylar unga javoban: — Bizda qonun bor, qonunimizga ko‘ra U o‘lishi kerak, chunki U O‘zini Xudoning O‘g‘li, deb aytyapti, — dedilar.

⁸Pilat buni eshitgach, yuragi orqaga tortib ketdi.

⁹Qaytadan hukumat saroyiga kirib, Isodan: — Sen qayerdansan? — deb so‘radi. Iso unga javob bermadi.

¹⁰— Menga javob bermaysanmi?! — dedi Pilat. — Seni ozod qilishga yoki xochga mixlashga menda hokimiyat borligini bilmaysanmi?!

¹¹Iso javob berdi: — Agar Xudo yo‘l qo‘ymaganda edi, siz Menga hech qanday hokimiyat o‘tkaza olmas edingiz. Shu sababdan Meni sizning qo‘lingizga tutib bergan odamning gunohi sizning gunohingizdan kattaroq.

¹²Shundan keyin Pilat Isoni qo‘yib yuborishga chora izlay boshladi. Ammo yahudiylar shunday deb qichqirishdi: — Agar Uni qo‘yib yuborsangiz, siz Qaysarning do‘sti emassiz. O‘zini shoh deydigan har bir kishi Qaysarga qarshi chiqqan bo‘ladi!

¹³Pilat bu so‘zni eshitgach, Isoni tashqariga olib chiqdi va Tosh supa deb nom olgan joydagi hukm kursisiga o‘tirdi (bu joyning oromiycha nomi Gabbata edi).

¹⁴O‘sha kuni Fisih bayrami arafasi, tush mahali edi. Pilat yahudiylarga xitob qildi: — Mana, Shohingiz!

¹⁵— Yo‘q qiling Uni, yo‘q qiling! Xochga mixlang! — deb baqirdi ular. — Sizlarning Shohingizni xochga mixlab qo‘yaymi? — deb so‘radi Pilat. — Qaysardan boshqa shohimiz yo‘q, — deyishdi bosh ruhoniylar.

¹⁶Oxiri Pilat Isoni xochga mixlash uchun askarlarga topshirdi. Ular esa Isoni olib ketdilar.

¹⁷Iso O‘z xochini ko‘tarib, shahar tashqarisidagi Bosh suyagi degan joyga keldi. (Bu joyning oromiycha nomi Go‘lgota edi.)

¹⁸U yerda Isoni xochga mixlab qo‘ydilar. U bilan birga yana ikkita odamni ham xochga mixladilar. Ularning biri Isoning bu tomonida, boshqasi u tomonida, Iso esa o‘rtada edi.

¹⁹Pilat bir lavhaga: “Yahudiylarning Shohi Nosiralik Iso”, degan so‘zlarni yozib, lavhani xochga ostirib qo‘ydi.

²⁰Iso xochga mixlangan joy shaharga yaqin bo‘lgani uchun, bu lavhani ko‘p yahudiylar o‘qidilar. Lavha oromiy, lotin va yunon tillarida yozilgan edi.

²¹Yahudiy bosh ruhoniylari esa Pilatga borib shunday dedilar: — “Yahudiylarning Shohi” deb yozmang, balki “Bu Odam yahudiylarning Shohi bo‘lishga da’vogarlik qilgan”, deb yozing.

²²— Men qanday yozgan bo‘lsam, shundayligicha qolsin, — dedi Pilat.

²³Askarlar Isoni xochga mixlab bo‘lib, Uning kiyimlarini oldilar. Kiyimlarini to‘rt bo‘lakka bo‘lib, har bir askarga berdilar. Ichki ko‘ylagini ham oldilar. Ichki ko‘ylak boshdan–oyoq choksiz bir to‘qima edi.

²⁴Askarlar bir–biriga: — Buni yirtmaylik, bu uchun qur’a tashlaymiz, kimga tushsa, o‘shaniki bo‘lsin, — deyishdi. Shu tariqa Muqaddas Bitiklardagi quyidagi so‘zlar bajo bo‘ldi: “Kiyimlarimni o‘zaro ular bo‘lishgan, Libosim uchun qur’a tashlashgan.” Askarlar xuddi shunday qildilar.

²⁵Isoning xochi yonida Uning onasi va xolasi, Klopaning xotini Maryam hamda Magdalalik Maryam turar edilar.

²⁶Iso onasini va onasi yonida turgan sevikli shogirdini ko‘rdi. Iso onasiga: — Ona, mana bu sizning o‘g‘lingiz! — dedi.

²⁷Keyin shogirdiga qarab: — Mana bu sening onang! — dedi. O‘sha vaqtdan boshlab u shogird Maryamni o‘z uyiga oldi.

²⁸Iso hamma ishlarini tugatganini bilardi. Muqaddas Bitiklar bajo bo‘lsin deb, U: — Chanqadim! — dedi.

²⁹Bu yerda arzon sharobga to‘la bir idish turgan edi. Askarlar sharobga shimgichni botirdilar–da, tayoqning uchiga ilib, Isoning og‘ziga olib bordilar.

³⁰Iso sharobni tatib ko‘rgach: — Amalga oshdi! — dedi–yu, boshini egib jon berdi.

³¹O‘sha kuni Shabbat arafasi edi. Ertangi Shabbat kuni nihoyatda tabarruk kun hisoblangani uchun, yahudiylar jasadlarni xochda qoldirishni istamadilar. Ular Pilatning oldiga borib, xochga mixlangan odamlarning boldirlarini sindirib tashlab, xochdan tushirishni so‘radilar.

³²Shunda askarlar borib, Iso bilan birga xochga mixlangan birinchi, so‘ngra ikkinchi odamning boldirlarini sindirib tashladilar.

³³Isoning oldiga kelib, Uning o‘lib bo‘lganini ko‘rdilar. Shuning uchun boldirlarini sindirmadilar.

³⁴Lekin askarlardan biri Isoning biqinini nayza bilan teshdi, shu zahoti Uning biqinidan qon bilan suv oqib chiqdi.

³⁵Bu hodisani ko‘rgan kishi, sizlar ham ishoninglar deb, guvohlik berib kelmoqda. Uning guvohligi haqiqatdir, u haqiqat aytayotganini biladi.

³⁶Bu hodisa Muqaddas Bitiklardagi: “Bironta ham suyagi sindirilmaydi”, degan so‘zlar amalga oshishi uchun ro‘y berdi.

³⁷Muqaddas Bitiklarning boshqa bir joyda shunday deyilgan: “Ular nayzani o‘zlari sanchigan Odamga qaraydilar.”

³⁸Arimateyalik Yusuf Isoning shogirdi edi, lekin yahudiylardan qo‘rqqani uchun buni yashirib yurar edi. Iso o‘lganidan keyin Yusuf Pilatdan Isoning jasadini xochdan tushirib olishni iltimos qildi. Pilat ijozat berdi. Shunda Yusuf borib, Isoning jasadini xochdan tushirib oldi.

³⁹Ilgari kechasi Isoning oldiga borgan Nikodim ham Yusuf bilan birga edi. Nikodim ikki pud mirra bilan sabur qorishmasini olib kelgandi.

⁴⁰Ular ikkovi Isoning jasadini olib, yahudiylarning dafn odatlariga ko‘ra, bu muattar moddalarni surtib, Uni kafanladilar.

⁴¹Iso xochga mixlangan joyning yaqinida bir bog‘ bor edi. U bog‘da hali hech kim dafn qilinmagan yangi bir qabr bor edi.

⁴²O‘sha kun yahudiylarning Shabbat arafasi bo‘lgani uchun ular, bu joy yaqinroq, deb Isoning jasadini o‘sha qabrga qo‘ydilar.