Read O‘zbek tilidagi Muqaddas Kitob, 2013 Yuhanno 2 Bible Online

Yuhanno 2 - O‘zbek tilidagi Muqaddas Kitob, 2013 bible

Yuhanno 2

¹Ikki kundan keyin Jaliladagi Kana qishlog‘ida nikoh to‘yi bo‘ldi. Isoning onasi u yerda edi.

²Iso bilan shogirdlari ham to‘yga taklif qilingan edilar.

³Sharob tugay deb qolganda, onasi Isoga: — Ularda sharob qolmabdi, — dedi.

⁴Iso unga: — Buning menga nima daxli bor?! Mening vaqt–soatim hali kelgani yo‘q, — dedi.

⁵Shunda onasi xizmatchilarga: — U sizlarga nima desa, shuni qilinglar, — dedi.

⁶O‘sha yerda yahudiylarning poklanish marosimlarida ishlatiladigan oltita tosh xum bor edi. Har bir xum ichiga o‘n–o‘n ikki chelak suv sig‘ardi.

⁷Iso xizmatchilarga: — Xumlarni suvga to‘ldiringlar, — dedi. Ular xumlarni limmo–lim qilib suvga to‘ldirishdi.

⁸Iso ularga: — Endi xumdagi suvdan ozgina olib, to‘yboshiga olib boringlar, — dedi. Ular olib borishdi.

⁹To‘yboshi sharobga aylangan suvni tatib ko‘rdi. Bu sharobning qayerdan kelganligini u bilmas edi, faqat olib kelgan xizmatchilar bilishar edi. To‘yboshi kuyovni chaqirtirib,

¹⁰unga dedi: — Dasturxonga avval yaxshi sharob tortiladi. Mehmonlar ichib to‘yganlaridan keyin, yomonrog‘i tortiladi. Sen esa yaxshi sharobni shu paytgacha saqlab kelibsan!

¹¹Bu Isoning qilgan birinchi mo‘jizasi edi. Iso bu mo‘jizali alomatni Jaliladagi Kana qishlog‘ida namoyish etib, O‘zining ulug‘vorligini zohir qildi. Shogirdlari Unga ishondilar.

¹²Shundan keyin Iso, onasi, ukalari va shogirdlari Kafarnahum shahriga bordilar va u yerda bir necha kun turdilar.

¹³Yahudiylarning Fisih bayrami yaqinlashib qolgani uchun Iso Quddus shahriga bordi.

¹⁴Ma’bad hovlisiga kirganda, u yerda mol–qo‘y, kaptar sotayotganlarni va xontaxtalar yonida o‘tirgan sarroflarni ko‘rdi.

¹⁵Iso arqondan qamchi yasadi–da, Ma’baddan hammani mol–qo‘ylari bilan birga quvib chiqardi. Sarroflarning xontaxtalarini ag‘darib, pullarini sochib yubordi.

¹⁶Kaptar sotuvchilarga: — Bularni yo‘qotinglar bu yerdan! Otamning uyini bozor qilmanglar! — dedi.

¹⁷Shunda Uning shogirdlari Muqaddas Bitiklardagi: “Sening uyingga bo‘lgan sevgim ichimni yondirar”, degan so‘zlarni esladilar.

¹⁸— Bunday qilishga nima haqing bor?! Bordi–yu, haqing bo‘lsa, bironta alomat ko‘rsatib, buni isbot qil! — deb talab qila boshladi yahudiylar.

¹⁹Iso shunday javob berdi: — Mana bu Ma’badni buzinglar, Men uch kun ichida uni tiklayman.

²⁰Bunga javoban yahudiylar dedilar: — Bu Ma’bad qirq olti yilda qurilgan, Sen esa uni uch kunda tiklamoqchimisan–a?!

²¹Holbuki, Iso Ma’bad deb O‘zining badanini nazarda tutgan edi.

²²Iso o‘lib tirilgandan keyin, shogirdlari Uning bu gapini esladilar. Shunda Muqaddas Bitiklarga va Isoning so‘zlariga ishondilar.

²³Iso Quddusda Fisih bayramida bo‘lganda, ko‘p odamlar Uning qilayotgan mo‘jizali alomatlarini ko‘rib, Unga imon keltirdilar.

²⁴Ammo Iso odamlarning qanaqaligini bilgani uchun, O‘zini ularga ishonmas edi.

²⁵Inson haqida Unga biron gap aytishning hojati yo‘q edi. Chunki inson dilida nima borligini U bilar edi.