Read O‘zbek tilidagi Muqaddas Kitob, 2013 Havoriylar 10 Bible Online

Havoriylar 10 - O‘zbek tilidagi Muqaddas Kitob, 2013 bible

Havoriylar 10

¹Qaysariyada Korniliy degan bir odam bor edi. U Rim armiyasidagi “Italiya” nomli polkda yuzboshi edi.

²Korniliy taqvodor odam bo‘lib, uning o‘zi ham, oilasi ham Xudodan qo‘rqardi. U kambag‘al yahudiylarga ko‘p sadaqa berar, doimo Xudoga ibodat qilardi.

³Bir kuni soat uchlarda unga vahiy keldi. Xudoning farishtasi kirib kelayotganini u aniq ko‘rdi. Farishta: “Korniliy!” deb chaqirdi.

⁴Korniliy qo‘rquv ichida unga tikilib qarab: — Labbay, Hazrat! — dedi. Farishta unga shunday dedi: — Sening ibodatlaring va sadaqalaring Xudoga ma’qul bo‘ldi.

⁵Endi Yaffaga odam yuborib, Shimo‘n degan odamni chaqirtirib kel. Uning ikkinchi ismi Butrus.

⁶Butrus bir ko‘nchining uyida mehmon bo‘lib turibdi. U ko‘nchining ismi ham Shimo‘n. Ko‘nchi Shimo‘nning uyi dengiz bo‘yida.

⁷Korniliyga gapirgan farishta ketdi. Korniliy xizmatkorlaridan ikkitasini va unga xizmat qiladigan taqvodor, ishonchli bir askarini chaqirdi.

⁸Ro‘y bergan hodisani ularga aytib berib, ularni Yaffaga jo‘natdi.

⁹Keyingi kun tush paytida ular yo‘lda davom etib, shaharga yaqinlashganlarida, Butrus ibodat qilgani tomga chiqqan edi.

¹⁰U ochqab, biron narsa tanovul qilgisi keldi. Ovqat tayyorlanayotganda, Butrusga vahiy keldi.

¹¹U osmon ochilganini, katta dasturxonga o‘xshash bir narsa to‘rt burchagidan osilgan holda yerga tushib kelayotganini ko‘rdi.

¹²Uning ichida turli hayvonlar, sudralib yuruvchilar va qushlar bor edi.

¹³Shu payt u: “O‘rningdan tur, Butrus, so‘yib yegin”, degan ovozni eshitdi.

¹⁴Ammo Butrus dedi: — Aslo unday qilmayman, Egam! Men hech qachon xarom yoki nopok narsalarni yemaganman!

¹⁵O‘sha ovoz yana Butrusga: “Xudo halol deb aytgan narsalarni sen xarom demagin”, deya gapirdi.

¹⁶Bu suhbat uch marta takrorlandi. Shunda dasturxon birdan osmonga olindi.

¹⁷Butrus, bu vahiyning ma’nosi nima ekan, deb esankirab turganda, Korniliy yuborgan odamlar kelib qoldilar. Ular ko‘nchi Shimo‘nning uyi qayerdaligini bilib olib, darvoza oldida turgan edilar.

¹⁸Ular chaqirib: — Shimo‘n degan mehmon shu yerdami? — deb so‘radilar. — Uning ikkinchi ismi Butrus.

¹⁹Butrus hali ham vahiy haqida o‘ylab o‘tirgan edi. Shunda Muqaddas Ruh unga shunday dedi: — Qara, uchta odam seni izlab keldi.

²⁰Endi o‘rningdan tur, pastga tush, hech ikkilanmay ular bilan birga bor. Ularni Men jo‘natganman.

²¹Shunday qilib, Butrus pastga tushib, ularga dedi: — Sizlar izlayotgan odam menman. Nima sababdan keldingizlar?

²²— Bizni yuzboshi Korniliy jo‘natdi, — deb javob berdi ular. — U solih, Xudodan qo‘rqadigan odam, butun yahudiy xalqi orasida katta obro‘ga ega. Xudoning farishtasi unga: “Butrusni uyingga taklif qil, uning aytganlarini eshitgin”, deb aytibdi.

²³Shundan keyin Butrus ularni ichkariga taklif qilib, mehmon qildi. Keyingi kuni Butrus ular bilan birga yo‘lga otlandi. Yaffalik ba’zi imonlilar Butrus bilan birga ketdilar.

²⁴Ertasi kuni ular Qaysariyaga kirib keldilar. Korniliy ularni kutayotgan edi. U qarindoshlari va yaqin do‘stlarini taklif qilgan edi.

²⁵Butrus uyga kirib, Korniliyga ro‘para keldi. Shunda Korniliy Butrusning oyoqlariga bosh urib, unga ta’zim qildi.

²⁶Ammo Butrus unga: — O‘rningdan tur, men ham bir bandaman, — deb uni turg‘izib qo‘ydi.

²⁷Butrus u bilan gaplasharkan, ichkariga kirdi va u yerda bir talay odam to‘planganini ko‘rdi.

²⁸Butrus ularga shunday dedi: — O‘zlaringiz bilasizlarki, yahudiy odam boshqa xalqdan bo‘lgan odam bilan aloqa bog‘lashi, unikiga borishi qonunimizga xilofdir. Ammo Xudo endi menga hech bir kimsani xarom yoki nopok deb hisoblamaslikni ayon qildi.

²⁹Shuning uchun menga odam yuborganlaringizda, hech qanday e’tiroz bildirmay keldim. Endi bilsam bo‘ladimi, nima uchun meni chaqirtirdingizlar?

³⁰Korniliy shunday javob berdi: — To‘rt kun ilgari xuddi shu paytda — soat uchlarda uyimda ibodat qilayotgan edim. Birdan ro‘paramda oppoq kiyim kiygan bir odam paydo bo‘ldi.

³¹U menga shunday dedi: “Korniliy, sening ibodating Xudoga yetib bordi, sadaqalaringni U ma’qul ko‘rdi.

³²Endi Yaffaga odam yuborib, Shimo‘n degan odamni chaqirtirib kel. Uning ikkinchi ismi Butrus. Butrus bir ko‘nchining uyida mehmon bo‘lib turibdi. U ko‘nchining ismi ham Shimo‘n. Ko‘nchi Shimo‘nning uyi dengiz bo‘yida.”

³³Shuning uchun darhol sizga odam yubordim, siz ham olijanoblik qilib, keldingiz. Egamiz sizga aytishni buyurgan hamma narsani eshitish uchun endi hammamiz Xudoning huzurida to‘plandik.

³⁴Butrus ularga gapira boshladi: — Haqiqatan ham, Xudo tarafkashlik qilmasligini bilaman.

³⁵Har bir elatda Xudodan qo‘rqadigan va to‘g‘ri ishlarni qiladigan har bir odam Unga ma’quldir.

³⁶U Isroil xalqiga yuborgan xabarni bilasizlar. Tinchlik keltiradigan bu Xushxabarni Xudo Iso Masih orqali e’lon qildi. Iso Masih hammaning Rabbiysidir.

³⁷Yahudiya bo‘ylab nimalar yuz berganini bilasizlar. Bu hodisalarning hammasi Yahyoning cho‘mdirilish to‘g‘risidagi xabaridan keyin Jalilada boshlangan edi.

³⁸Xudo Nosiralik Isoni Muqaddas Ruh va kuch–qudrat bilan qanday to‘ldirganini bilasizlar. Iso hamma yoqqa borib, yaxshi ishlar qildi, iblisning hukmronligidan azob chekkanlarni shifoladi, chunki Xudo U bilan edi.

³⁹U Yahudiya va Quddusda qilgan ishlarining hammasiga biz guvohmiz. Shundan keyin Isoni xochga mixlab, o‘ldirdilar.

⁴⁰Ammo Xudo Uni uchinchi kuni tiriltirib, zohir qildi.

⁴¹Iso hammaga emas, faqat bizga zohir bo‘ldi. Chunki Xudo bizni Iso haqida guvohlik berishimiz uchun tanlagandi. Iso tirilgandan keyin biz U bilan yeb–ichdik.

⁴²U bizga: “Xalqlarga va’z qilib, guvohlik beringlar. O‘liklar va tiriklarni hukm qilish uchun Xudo Meni tayinlaganini ularga aytinglar.” — deb buyurdi.

⁴³Barcha payg‘ambarlar ham Iso to‘g‘risida guvohlik bergan edilar. Isoga ishongan har bir odamning gunohlari Uning nomi tufayli kechiriladi, deb aytgan edilar.

⁴⁴Butrus hamon gapirar ekan, uning so‘zlarini eshitayotganlarni Muqaddas Ruh qamrab oldi.

⁴⁵Xudo g‘ayriyahudiylarga ham Muqaddas Ruhni in’om qilib berganini Butrus bilan birga kelgan yahudiy imonlilar ko‘rib hayratda qoldilar.

⁴⁶Chunki g‘ayriyahudiylar noma’lum tilda gaplashib, Xudoni ulug‘layotganlarini ular eshitib turardilar. Shunda Butrus dedi:

⁴⁷— Bu odamlar, xuddi biz singari, Muqaddas Ruhni qabul qildilar. Shunday ekan, ularning suvga cho‘mdirilishiga kim to‘sqinlik qila oladi?!

⁴⁸Shunday qilib, Butrus ularga, Iso Masih nomi bilan suvga cho‘minglar, deb buyruq berdi. So‘ng ular Butrusdan bir necha kun qolishini iltimos qildilar.