Read O‘zbek tilidagi Muqaddas Kitob, 2013 Havoriylar 11 Bible Online

Havoriylar 11 - O‘zbek tilidagi Muqaddas Kitob, 2013 bible

Havoriylar 11

¹Havoriylar va Yahudiyadagi imonlilar: “G‘ayriyahudiylar ham Xudoning kalomini qabul qilibdilar”, degan xabarni eshitdilar.

²Butrus Quddusga borganda, yahudiy imonlilar unga ta’na qildilar:

³— Siz sunnatsiz odamlarnikida mehmon bo‘libsiz, ular bilan birga yeb–ichibsiz!

⁴Shunda Butrus ularga yuz bergan voqeani batafsil tushuntira boshladi:

⁵— Men Yaffa shahrida ibodat qilayotgan edim, bir payt hushimdan ketib, vahiy ko‘ribman. Osmondan katta dasturxonga o‘xshash bir narsa to‘rt burchagidan osilgan holda yerga tushib keldi. O‘sha narsa oldimga tushdi.

⁶Men o‘sha narsaning ichiga yaxshilab qaradim va unda turli xil chorva va yovvoyi hayvonlarni, sudralib yuruvchilar va qushlarni ko‘rdim.

⁷O‘shanda bir ovoz menga: “Tur, Butrus, so‘yib yegin”, deganini eshitdim.

⁸Men shunday javob berdim: “Aslo unday qilmayman, Egam! Men hech qachon xarom yoki nopok narsalarni og‘zimga olmaganman!”

⁹Ammo o‘sha ovoz ikkinchi marta eshitilib: “Xudo halol deb aytgan narsalarni sen xarom deb aytmasliging kerak”, deb osmondan gapirdi.

¹⁰Bu suhbat uch marta takrorlandi. Shunda dasturxonga o‘xshash o‘sha narsa yana osmonga olindi.

¹¹Xuddi shu paytda Qaysariyadan yuborilgan uchta odam men turgan uyga yetib kelgan edi.

¹²Muqaddas Ruh menga: “Hech ikkilanmay bu odamlar bilan birga bor”, deb aytdi. Bu oltita birodar men bilan birga borib, o‘sha odamning uyiga kirdi.

¹³U odam uyida farishta paydo bo‘lganini, uning o‘zi bu farishtani ko‘rganini bizga so‘zlab berdi. Farishta unga shunday debdi: “Yaffaga odam yuborib, Shimo‘n degan odamni chaqirtirib kel. Uning ikkinchi ismi Butrus.

¹⁴U senga aytadigan xabar orqali o‘zing va oilang najot topasizlar.”

¹⁵Men gapimni boshlashim bilanoq, Muqaddas Ruh oldin bizni qamrab olgani singari, ularni ham qamrab oldi.

¹⁶Shunda men Rabbimiz Isoning: “Yahyo suvga cho‘mdirgan edi, sizlar esa Muqaddas Ruhga cho‘mdirilasizlar”, degan so‘zlarini esladim.

¹⁷Biz Rabbimiz Iso Masihga imon keltirganimizda, Xudo bizga bergan in’omni ularga ham bergan bo‘lsa, men kim bo‘libmanki, Xudoga qarshilik qilsam?!

¹⁸Ular bu so‘zlarni eshitib, jim bo‘lib qoldilar. So‘ng Xudoga hamdu sano aytib: “Xudo hatto g‘ayriyahudiylarni ham hayotga eltadigan tavbaga olib boribdi”, dedilar.

¹⁹Stefan o‘ldirilgandan keyin boshlangan quvg‘inlar oqibatida imonlilar Finikiya, Kipr va Antioxiyaga tarqalib ketdilar. Ular Iso haqidagi xabarni yahudiylardan boshqa hech kimga aytmasdilar.

²⁰Ularning orasida Kipr va Kirineyadan Antioxiyaga kelgan ba’zi imonlilar bor edi. Ular Rabbimiz Iso to‘g‘risida u yerdagi g‘ayriyahudiylarga ham va’z qildilar.

²¹Egamizning qudrati ularda bor edi, shuning uchun ko‘pchilik imonga kelib, Rabbimizga yuz burdi.

²²Bu yangilik Quddusdagi imonlilar jamoatiga yetib keldi. Jamoatdagilar Barnaboni Antioxiyaga jo‘natdilar.

²³U kelib, Xudoning marhamatini ko‘rganidan xursand bo‘ldi. Hammaga: “Chin yurakdan Rabbimiz Isoga sadoqatingizni saqlab qolinglar”, deb nasihat qildi.

²⁴U Muqaddas Ruhga va imonga to‘la, olijanob odam edi. Juda ko‘p odamlar Isoni Rabbim deb imonga keldilar.

²⁵Shundan keyin Barnabo Shoulni izlab Tarshishga ketdi. U Shoulni topgandan keyin, uni Antioxiyaga olib keldi.

²⁶Shunday qilib, Barnabo bilan Shoul bir yil davomida u yerdagi jamoat bilan bir joyga yig‘ilib, bir qancha odamlarga ta’lim berdilar. Shogirdlarga birinchi marta Antioxiya shahrida “masihiylar” deb nom berildi.

²⁷O‘sha paytda Quddusdan Antioxiyaga payg‘ambarlar keldilar.

²⁸Ulardan biri — Agav degani o‘rtaga chiqib, butun olamda qattiq ocharchilik bo‘lishini Muqaddas Ruh orqali bashorat qildi (uning bashorati Qaysar Klavdiy hukmronligi davrida yuz berdi).

²⁹Shogirdlar, imkonimiz boricha Yahudiyada yashaydigan imonli birodarlarimizga yordam jo‘natamiz, deb qaror qildilar.

³⁰Ular aytganlarini qilib, Barnabo va Shoul orqali Quddusdagi jamoat oqsoqollariga hadyalar yubordilar.