Read O‘zbek tilidagi Muqaddas Kitob, 2013 Havoriylar 14 Bible Online

Havoriylar 14 - O‘zbek tilidagi Muqaddas Kitob, 2013 bible

Havoriylar 14

¹Xuddi shunga o‘xshash voqea Ikoniya shahrida yuz berdi: Pavlus bilan Barnabo sinagogaga kirib, otashin va’z aytdilar. Natijada bir qancha yahudiylar bilan g‘ayriyahudiylar imonga keldilar.

²Ammo imonga kelmagan yahudiylar g‘ayriyahudiylarni qayrab, ularni imonlilarga qarshi qo‘zg‘atdilar.

³Havoriylar Pavlus bilan Barnabo bu yerda uzoq vaqt qolib, Rabbimiz Iso haqida jasorat bilan gapiraverdilar. Rabbimiz ham ularga mo‘jizalar va alomatlar ko‘rsatish qudratini berib, O‘zining marhamati haqidagi xabarni ular orqali tasdiqladi.

⁴Shahar aholisi esa ikkiga bo‘lindi: ba’zilari yahudiylar tomonga o‘tdi, boshqalari esa havoriylarga qo‘shildi.

⁵Shundan keyin yahudiylar va g‘ayriyahudiylar o‘z yo‘lboshchilari bilan birga havoriylarga hamla qilib, ularni toshbo‘ron qilmoqchi bo‘ldilar.

⁶Havoriylar bu to‘g‘rida bilib qolganlaridan keyin Likaoniyaning boshqa hududlariga qochib ketdilar. Ular Listra va Darba shaharlarida va ularning yon–atrofidagi joylarda

⁷ham Xushxabarni va’z qilishda davom etdilar.

⁸Listra shahrida bir odam bo‘lib, oyoqlarini qimirlata olmasdan o‘tirardi. U tug‘ma mayib bo‘lib, hech qachon yurmagan edi.

⁹Pavlus gapirayotganda, u quloq solib o‘tirgan edi. Pavlus unga tikilib qaradi. U odamning shifo topishiga ishonchi borligini ko‘rib,

¹⁰unga baland ovozda dedi: — O‘rningdan tur! U odam sakrab o‘rnidan turdi–da, yura boshladi.

¹¹Olomon Pavlusning qilgan ishini ko‘rgach, Likaoniya tilida: “Xudolar bizning oldimizga inson qiyofasida kelibdi!” deb shovqin soldilar.

¹²Ular Barnaboni Zevs, Pavlus notiq bo‘lgani uchun uni Hermes deb atashdi.

¹³Zevsning ma’badi shahar tashqarisida edi. Zevs ruhoniysi shahar darvozalariga buqalar va gulchambarlar olib keldi. Ruhoniy bilan olomon qurbonlik nazr qilmoqchi bo‘ldilar.

¹⁴Havoriylar — Barnabo bilan Pavlus buni eshitib, yoqalarini chok qilib, olomon orasiga yorib kirdilar. Ular shunday deb shovqin soldilar:

¹⁵— Do‘stlar! Nimaga bunday qilyapsizlar! Biz ham sizlar singari insonlarmiz! Biz sizlarga Xushxabar olib keldik, toki sizlar anavi behuda narsalardan yuz o‘giringlar, osmonni, yerni, dengizni, ulardagi hamma narsani yaratgan barhayot Xudoga yuz buringlar.

¹⁶O‘tmishda Xudo hamma xalqlarni o‘z holiga qo‘ydi.

¹⁷Ammo shunga qaramay, O‘z ezguligini ko‘rsatib, osmondan yomg‘ir yog‘dirib keldi, mavsumida hosil berdi, rizqingizni tugal qilib, yuraklaringizni shodlikka to‘ldirdi.

¹⁸Shu gaplari bilan havoriylar, biz uchun qurbonlik keltirmanglar, deb olomonni zo‘rg‘a to‘xtatib qoldilar.

¹⁹Ammo Antioxiya va Ikoniyadan yahudiylar kelib, xalqni o‘zlariga og‘dirib oldilar. Ular Pavlusni toshbo‘ron qildilar va “U o‘ldi, shekilli”, deb uni shahardan tashqariga sudrab chiqarib tashladilar.

²⁰Shogirdlar Pavlusning atrofiga yig‘ilganlaridan keyin esa, u o‘rnidan turib, shaharga qaytib kirdi. Ertasi kuni esa Barnabo bilan birga Darba shahriga ketdi.

²¹Ular Xushxabarni Darba shahrida va’z qilib, ko‘p shogirdlar orttirganlaridan keyin, Listra shahriga, so‘ngra Ikoniya va Antioxiya shaharlariga qaytib keldilar.

²²Ular shogirdlarni imonda sobit qolishga undab: “Biz Xudo Shohligiga kirishimiz uchun ko‘p mashaqqatlarni boshdan kechirishimiz kerak”, deb dalda berardilar.

²³Ular har bir imonlilar jamoatiga oqsoqollar tayin qildilar. So‘ng ibodat qilib va ro‘za tutib, oqsoqollarni o‘zlari ishongan Rabbimiz Isoning panohiga topshirdilar.

²⁴So‘ngra ular Pisidiyadan o‘tib, Pamfiliyaga keldilar.

²⁵Perga shahrida Iso haqidagi xabarni va’z qilganlaridan keyin, Attaliyaga ketdilar.

²⁶So‘ng kemada Antioxiyaga qaytib keldilar. Bu shahardagi jamoat ularni hozir tamomlagan ishlari uchun Xudoning marhamatiga topshirgan edi.

²⁷Havoriylar Antioxiyaga kelganlaridan keyin, jamoatni bir joyga yig‘dilar va Xudo ular orqali nimalar qilganini, g‘ayriyahudiylarning imonga kelishi uchun Xudo qanday yo‘l ochib berganini aytib berdilar.

²⁸Havoriylar bu yerda shogirdlar bilan birga ancha vaqt qoldilar.