Read O‘zbek tilidagi Muqaddas Kitob, 2013 Havoriylar 2 Bible Online

Havoriylar 2 - O‘zbek tilidagi Muqaddas Kitob, 2013 bible

Havoriylar 2

¹Hosil bayrami kuni kelganda, hamma imonlilar bir joyda yig‘ildilar.

²Birdan osmondan shiddatli shamol esganga o‘xshash ovoz kelib, ular o‘tirgan uyning ichini to‘ldirdi.

³Ular til shaklidagi alangani ko‘rdilar. O‘sha alanga yoyilib, har birining ustiga tushdi.

⁴Shunda hammalari Muqaddas Ruhga to‘ldilar, Muqaddas Ruh bergan qobiliyatga ko‘ra, ular boshqa tillarda gapira boshladilar.

⁵O‘sha paytda Quddusda dunyodagi har bir yurtdan kelgan taqvodor yahudiylar yashar edi.

⁶Ular bu ovozni eshitganlarida, bir talay olomon yig‘ilib keldi. Har biri o‘z tilidagi gaplarni eshitib, dovdirab qoldi.

⁷Ular hayrat va hayajon ichida: — Qaranglar, gapirayotgan bu odamlar Jalilaliklar–ku! — deb xitob qildilar. —

⁸Qanday qilib har birimiz tug‘ilgan yurtimizning tillarini eshityapmiz?

⁹Oramizda Parfiyadan, Midiya, Elam, Mesopotamiya, Yahudiya, Kappadokiya, Pontus va Asiyadan kelganlar bor.

¹⁰Frigiya, Pamfiliya, Misr, Liviyaning Kirineyaga yaqin yerlaridan kelganlar ham bor. Ba’zilarimiz Rimdan kelganmiz, biz yahudiylarmiz, oramizda yahudiy diniga kirgan Rimliklar ham bor.

¹¹Ba’zilarimiz Krit va Arabistondan kelganmiz. Shunday bo‘lsa ham ular Xudo qilgan qudratli ishlar to‘g‘risida bizning tillarimizda gapirishayotganini hammamiz eshityapmiz.

¹²Ular hayratlanib, boshlari qotib, bir–birlaridan: “Bu nimadan darak beradi?” deb so‘rardilar.

¹³Boshqalar esa: “Iye, ular ichib mast bo‘lib qolibdilar–ku”, deb masxara qilishardi.

¹⁴Shunda Butrus o‘n bir havoriy bilan oldinga chiqdi–da, olomonga qarata shunday gapirdi: — Ey yahudiy birodarlar, Quddus aholisi! Gapimga quloq solib, shuni uqib olinglar!

¹⁵Bu odamlarni sizlar mast deb o‘ylayapsizlar, ammo unday emas. Axir, endigina ertalab soat to‘qqiz bo‘ldi–ku!

¹⁶Aksincha, Yo‘el payg‘ambarning aytganlari bajo bo‘lmoqda:

¹⁷“Xudo aytmoqda: ‘Oxirgi kunlarda, O‘z Ruhimni yog‘diraman har bir inson ustiga, Vahiylar keladi yigitlaringizga. Bashorat qilurlar sizning o‘g‘il–qizlaringiz. Karomatli tushlar ko‘rurlar qariyalaringiz.

¹⁸O‘z Ruhimni yog‘diraman o‘sha kunlarda Hattoki qulu cho‘rilaringiz ustiga. Ular bashorat qilurlar.

¹⁹[19-20] Mening buyuk va dahshatli kunim kelishidan oldin, Men osmonda mo‘jizalar yarataman, Yerda alomatlar ko‘rsataman: Qon, olov, qalin tuman hosil qilaman. Quyosh qorayadi, oy qon tusiga kiradi.’

²⁰

²¹Rabbimizga iltijo qilgan har bir inson qutqariladi.”

²²Ey Isroil xalqi, bu gaplarimni eshitib olinglar: Nosiralik Iso orqali Xudo sizlarning orangizda mo‘jizalar va alomatlar ko‘rsatdi. Shu yo‘l bilan Isoda ilohiy hokimiyat borligini Xudo tasdiqladi. Buni o‘zlaringiz bilasizlar.

²³Xudo O‘zining rejasi bo‘yicha Isoni sizlarning qo‘lingizga topshirishni azaldan qaror qilgan edi. Sizlar esa g‘ayriyahudiylarning qo‘llari bilan Uni xochga mixlatib o‘ldirdingizlar.

²⁴Ammo Xudo Uni tiriltirib, o‘lim azoblaridan ozod qildi. O‘lim o‘z kuchi bilan Isoni ushlab turishga qodir emasdi.

²⁵Dovud U haqda shunday degan edi: Men doim Egamni birinchi o‘ringa qo‘yaman, U o‘ng tomonimda bo‘lgani uchun Meni hech narsa qo‘zg‘ata olmas.

²⁶Shu bois, ey Egam, yuragim quvonchga to‘la, Tilim ham shod–xurramdir. Tanam umid bilan yashaydi.

²⁷Meni o‘liklar diyoriga tashlab ketmaysan, Taqvodoringni qabrda chiritmaysan.

²⁸Menga hayot so‘qmoqlarini O‘zing ko‘rsatasan, Huzuringda shodlik Meni qamrab oladi.

²⁹Birodarlarim! Bobomiz Dovud to‘g‘risida sizlarga ochiq–oydin gapirishim kerak. U o‘ldi, dafn qilindi, uning qabri bugungacha shu yerdadir.

³⁰U payg‘ambar bo‘lgani bois, Xudo unga: “O‘z naslingdan bo‘lgan bittasini taxtingga o‘tqazaman”, deb ichgan ontini yodida tutardi.

³¹Dovud kelajakni oldindan ko‘rib, Masihning tirilishi to‘g‘risida shunday degan edi: “Xudo Uni o‘liklar diyorida qoldirmadi, Uning tanasi qabrda chirimadi.”

³²Ana shu Isoni Xudo tiriltirdi, bunga hammamiz guvohmiz.

³³Xudo Isoni o‘ng qo‘li bilan yuksaltirdi. Iso Otadan va’da qilingan Muqaddas Ruhni qabul qilib, bizning ustimizga yog‘dirdi. Buni o‘zlaringiz ko‘rib va eshitib turibsizlar.

³⁴[34-35] Dovud osmonga chiqmagan bo‘lsa–da, shunday degan edi: “Egamiz aytmoqda Rabbimga: ‘Dushmanlaringni oyoqlaring ostiga poyandoz qilmagunimcha, Sen Mening o‘ng tomonimda o‘tirgin.’”

³⁵

³⁶Butun Isroil xalqi shuni aniq bilib qo‘ysin: sizlar mixlagan Isoni Xudoning O‘zi jamiki borliq ustidan hukmdor qildi. Iso ham Masih, ham Rabbiydir.

³⁷Xaloyiq bu gaplarni eshitdi–yu, yuraklari tilka–pora bo‘ldi. Ular Butrusdan va qolgan havoriylardan: — Birodarlar, endi biz nima qilaylik? — deb so‘radilar.

³⁸Butrus ularga dedi: — Tavba qilinglar, har biringiz Iso Masihning nomi bilan suvga cho‘minglar, toki gunohlaringiz kechirilsin. Shunda sizlar Muqaddas Ruhni in’om qilib olasizlar.

³⁹Xudo sizlarga va bolalaringizga, uzoqdagilarga, Egamiz Xudo O‘ziga da’vat etganlarning har biriga va’dasini bergan.

⁴⁰Butrus boshqa ko‘p dalillar bilan ularga guvohlik berib: “O‘zlaringizni bu buzuq nasl ustiga kelayotgan jazodan saqlanglar”, deya o‘tindi.

⁴¹Shunday qilib, Butrusning aytgan xabariga ishonganlar suvga cho‘mdirildi. O‘sha kuni imonlilar soni uch mingtaga ko‘paydi.

⁴²Ular havoriylarning ta’limotini o‘rganishga, birodarlikka, Rabbimiz Isoni xotirlab, non sindirishga va ibodatga o‘zlarini bag‘ishladilar.

⁴³Havoriylar orqali Xudo ko‘plab mo‘jizalar va alomatlar ko‘rsatardi, bundan esa hamma hayratga tushgan edi.

⁴⁴Barcha imonlilar tez–tez yig‘ilishib turar edilar. Ular hamma narsada hamjihat edilar.

⁴⁵Mol–mulklarini sotib, pulini har kimning ehtiyojiga qarab taqsimlab berardilar.

⁴⁶Imonlilar har kuni Ma’badda yig‘ilardilar. Bir–birlarinikiga mehmonga borganda esa Rabbimiz Isoni xotirlash uchun non sindirardilar, yurakdan sevinib, soddadillik bilan ovqatlanishardi.

⁴⁷Xudoga hamdu sanolar aytardilar, xalqning hurmatu e’tiboridan bahramand edilar. Har kuni Egamiz najot topayotganlarni imonlilarning qatoriga qo‘shardi.