Read O‘zbek tilidagi Muqaddas Kitob, 2013 Havoriylar 20 Bible Online

Havoriylar 20 - O‘zbek tilidagi Muqaddas Kitob, 2013 bible

Havoriylar 20

¹Shovqin–suron bosilgach, Pavlus shogirdlarni chaqirib, ularga dalda berdi. Keyin ular bilan xayrlashib, Makedoniyaga yo‘l oldi.

²U bosib o‘tgan hamma shaharlarda imonlilarga ko‘p dalda berdi. So‘ng Yunonistonga borib,

³u yerda uch oy turdi. U Suriyaga suzib ketmoqchi bo‘lgan edi, yahudiylar unga qarshi fitna uyushtirayotganini bilib qoldi. Shuning uchun Makedoniya orqali qaytishga qaror qildi.

⁴Veriyadan Pir o‘g‘li Sosipatr, Salonikadan Aristarx va Sekund, Darviyadan Gay, Timo‘tiy, Asiya viloyatidan Tixik va Trofim Pavlusga hamroh bo‘ldilar.

⁵Ular bizdan oldin ketib, Troasda bizni kutib turgan edilar.

⁶Xamirturushsiz non bayramidan keyin biz Filippidan suzib ketdik. Besh kundan so‘ng esa Troasda ular bilan uchrashib, u yerda yetti kun turdik.

⁷Haftaning birinchi kuni biz Rabbimiz Isoni xotirlab, non sindirish uchun yig‘ildik. Pavlus odamlarga yarim kechasigacha gapirdi. Ertasi kuni u jo‘nab ketishni rejalashtirgan edi.

⁸Biz yig‘ilgan boloxonada ko‘p chiroqlar yonib turardi.

⁹Yevtux degan bir yigit deraza raxida o‘tirgan edi. Pavlus gapini davom ettirar ekan, Yevtuxni qattiq uyqu bosdi. Uyqu g‘olib kelib, Yevtux uchinchi qavatdan yerga yiqildi. Uni ko‘targanlarida, jon bergan edi.

¹⁰Pavlus pastga tushdi, egilib, yigitni quchoqladi–da: “Xavotir olmanglar, u tirik”, dedi.

¹¹So‘ngra Pavlus yana boloxonaga qaytib chiqdi. Rabbimizni xotirlab, non sindirib, ovqatlandi. Ular bilan tong otguncha suhbatlashdi, keyin yo‘lga chiqdi.

¹²Shu orada bu yigitni uyiga tirik olib bordilar, imonlilar bu voqeadan g‘oyat tasalli topdilar.

¹³Pavlus Assa shahriga quruqlik orqali ketishga qaror qildi. Qolganlarimiz esa undan oldin kemada suzib ketdik. Pavlus o‘sha shaharda kemaga chiqib, bizga qo‘shiladi, deb rejalashtirgan edik. Zotan, u bizga shunday qilishini aytgan edi.

¹⁴Pavlus biz bilan Assada uchrashgandan keyin, uni kemaga olib, Mitilina shahriga yo‘l oldik.

¹⁵Biz u yerdan suzib, ertasi kuni Xios oroli yaqiniga yetib bordik. Keyingi kuni Samos oroliga, uning ertasiga Milit shahriga yetib bordik.

¹⁶Pavlus Asiya viloyatida vaqtni yo‘qotmaslik uchun Efesni chetlab o‘tishga qaror qildi. Agar imkonini topsa, Hosil bayramida Quddusda bo‘lishni juda istayotgan edi.

¹⁷Pavlus Militdan Efesga xabar yuborib, imonlilar jamoatining oqsoqollariga: “Mening huzurimga kelsangizlar”, deb iltimos qildi.

¹⁸Oqsoqollar Pavlusning huzuriga kelganlarida, u oqsoqollarga dedi: — Men Asiya viloyatiga kelgan birinchi kunimdan boshlab sizlarning orangizda qanday yashaganimni o‘zlaringiz bilasizlar.

¹⁹Men ko‘p ko‘z yosh to‘kib, kamtarlik bilan Rabbimiz Isoga xizmat qildim. Yahudiylarning fitnalari dastidan kelgan sinovlarni boshdan kechirdim.

²⁰O‘zlaringiz bilasizlar, men sizlarga biron foyda keltirishdan o‘zimni olib qochmadim. Balki uyma–uy yurib, ta’lim berdim, xalq oldida va’z qildim.

²¹Men yahudiylarni ham, yunonlarni ham, tavbaga chaqirdim. Xudoga yuz buringlar, Rabbimiz Isoga imon keltiringlar, deb ularga jiddiy nasihat qildim.

²²Endi esa Muqaddas Ruhning asiri bo‘lib, Quddusga otlanyapman. U yerda menga nima bo‘lishini bilmayman.

²³Ammo meni qamoq va quvg‘inlar kutayotgani to‘g‘risida Muqaddas Ruh har bir shaharda ogohlantirib kelmoqda.

²⁴Lekin hayotim o‘zim uchun hech narsaga arzimaydi, deb hisoblayman. Men faqat vazifamni oxiriga yetkazishni va Rabbimiz Iso menga yuklagan ishni tugatishni istayman. Bu ish Xudoning inoyati to‘g‘risidagi Xushxabarni e’lon qilishdir.

²⁵Men oralaringizda bo‘lib, Xudoning Shohligini va’z qildim. Endi shuni bilamanki, birontangiz ham mening yuzimni boshqa ko‘rmaysizlar.

²⁶Shuning uchun bugun sizlarga shuni e’lon qilaman: men birovning halokati uchun mas’ul emasman.

²⁷Axir, men Xudoning hamma maqsadini sizlarga bayon qilishdan bo‘yin tovlamadim.

²⁸O‘zlaringizni ehtiyot qilinglar, suruvni ham ehtiyot qilinglar. Chunki Muqaddas Ruh ularni sizning qaramog‘ingizga bergan. Xudoning jamoatiga cho‘pon bo‘linglar. U bu jamoatni O‘zining O‘g‘li qoni evaziga sotib olgan.

²⁹Bilaman, men ketganimdan keyin sizlarning orangizga yirtqich bo‘rilar keladi, ular suruvga shafqat qilmaydi.

³⁰Hatto o‘z oralaringizdan ba’zi odamlar chiqib, shogirdlarni ortidan ergashtirib, haqiqatni buzib gapiradilar.

³¹Hushyor bo‘linglar! Mana shu uch yil davomida kechayu kunduz ko‘z yosh to‘kib, har biringizga qilgan pand–nasihatlarimni yodingizda tutinglar.

³²Endi men sizlarni Xudoga va Uning marhamati haqidagi xabar panohiga topshirdim. Bu xabar sizlarga kuch–qudrat berib, jamiki muqaddas qilinganlar orasida meros berishga qodirdir.

³³Men hech kimning kumushi yoki oltini, yo kiyimiga ko‘z olaytirmadim.

³⁴O‘zlaringiz bilasizlarki, o‘zimni va sheriklarimni ta’minlash uchun qo‘llarim bilan mehnat qildim.

³⁵Men sizlarga bu borada namuna bo‘lib, zaiflarni qanday qo‘llab–quvvatlashimiz kerakligini ko‘rsatdim. Rabbimiz Iso aytgan shu so‘zlarini eslaylik: “Olmoqdan ko‘ra bermoq ko‘proq marhamatlanadi.”

³⁶Pavlus gapini tugatgandan keyin, hamma bilan birga tiz cho‘kib, ibodat qildi.

³⁷Hammalari yig‘lab, Pavlusni bag‘rilariga bosdilar, u bilan o‘pishib xayrlashdilar.

³⁸Pavlus: “Endi meni hech qachon ko‘rmaysizlar”, deb aytgani uchun ular nihoyatda g‘amgin bo‘lib qoldilar. Ular Pavlusni kemagacha kuzatib bordilar.