Read O‘zbek tilidagi Muqaddas Kitob, 2013 Havoriylar 22 Bible Online

Havoriylar 22 - O‘zbek tilidagi Muqaddas Kitob, 2013 bible

Havoriylar 22

¹“Birodarlarim, otalar! Gapimga quloq solinglar, sizlarning oldingizda o‘zimni oqlay.”

²Odamlar uning oromiycha gapirayotganini eshitib, suv quyganday jim bo‘lib qoldilar. Pavlus gapida davom etdi:

³“Men yahudiyman, Kilikiyadagi Tarshishda tug‘ilganman, ammo Quddusda ulg‘aydim. Bu shaharda Gamalielning shogirdi bo‘lib, ota–bobolarimizning qonuniga jiddiy e’tibor berib ta’lim oldim. Xuddi bugungiday sizlarga o‘xshab, Xudoga o‘zimni bag‘ishladim.

⁴Isoning yo‘liga kirgan odamlarni o‘lguday quvg‘in qilardim, erkagu ayolni bog‘lab, zindonga tashlardim.

⁵Aytayotganlarim haqiqat ekanini oliy ruhoniy bilan butun Kengash tasdiqlay oladi. Ular Damashqdagi yahudiy birodarlarimizga xat yozib berdilar. Shunday qilib, men bu odamlarni kishanlab, Quddusga olib kelib jazolash uchun Damashqqa jo‘nadim.

⁶Men yo‘limda davom etib, Damashqqa yaqinlashib qolganimda, tush payti birdan osmondan yop–yorug‘ nur mening yon–atrofimni yoritib yubordi.

⁷Men yerga yiqildim. Shu payt: ‘Shoul! Shoul! Nega sen Meni quvg‘in qilyapsan?’ deb menga gapirayotgan bir ovozni eshitdim.

⁸‘Yo Hazratim! Sen kimsan?’deb so‘radim. Shunda U menga: ‘Sen quvg‘in qilayotgan Nosiralik Isoman’, deb javob berdi.

⁹Mening yonimdagilar nurni ko‘rardilaru ammo men bilan gaplashayotganning ovozini eshitmasdilar.

¹⁰Shunda men: ‘Yo Rabbim Iso, nima qilay?’ deb so‘radim. Rabbiy menga shunday dedi: ‘O‘rningdan tur, Damashqqa bor. Nima qilishing kerakligini Xudo belgilab qo‘ygan. Hamma narsa o‘sha yerda senga aytiladi.’

¹¹O‘sha nurning yarqirashidan ko‘zlarim ko‘rmay qolgan edi. Shuning uchun hamrohlarim qo‘llarimdan ushlab, meni Damashqqa olib ketdilar.

¹²O‘sha shaharda Hananiya degan bir taqvodor, qonunga itoat etadigan odam bor edi. U o‘sha shahardagi hamma yahudiylar orasida katta obro‘ga ega edi.

¹³Hananiya oldimga kelib, yonimda turdi–da: ‘Birodarim Shoul! Ko‘zlaring yana ochilsin!’ dedi. O‘sha zahoti ko‘zlarim ochilib, Hananiyani ko‘rdim.

¹⁴Shunda u dedi: ‘Ota–bobolarimizning Xudosi seni tanladi. Toki sen Uning xohishini bilgin, Solih Zotni ko‘rib, Uning ovozini eshitgin.

¹⁵Sen ko‘rib–eshitganlaring to‘g‘risida butun olamga Uning guvohi bo‘lasan.

¹⁶Endi nimani kutyapsan? O‘rningdan tur, suvga cho‘mgin. Rabbimizga iltijo qilib, gunohlaringni yuvgin.’

¹⁷Men Quddusga qaytib kelganimdan keyin, Ma’badda ibodat qilayotganimda, menga bir vahiy keldi.

¹⁸Men Rabbim Isoni ko‘rdim, U shunday dedi: ‘Tez bo‘l, Quddusdan zudlik bilan ket! Bu yerdagi odamlar Men to‘g‘rimda bergan guvohligingni qabul qilmaydilar.’

¹⁹Men esa: ‘Yo Rabbiy! — dedim. — Men sinagogalarga borib, Senga ishongan odamlarni qamab, kaltaklaganimni ular yaxshi biladilar.

²⁰Shohiding Stefan o‘ldirilganda, men o‘sha yerda edim, uning o‘ldirilishini ma’qullab, uni o‘ldirayotganlarning kiyimlariga poyloqchilik qilib turgan edim.’

²¹Rabbim Iso menga: ‘Ketaver’, — dedi. — Seni uzoqdagi g‘ayriyahudiylarning oldiga yuboraman.’”

²²Xalq Pavlusga quloq solib turdi. Ammo u shu gapini aytishi bilanoq, ular ovozi boricha, shovqin soldi: — Yo‘qotinglar uni! O‘ldiringlar! U yashashga loyiq emas!

²³Ular baqir–chaqir qilib, kiyimlarini otib, havoni chang–to‘zon qilib yubordilar.

²⁴Rim mingboshisi odamlariga: — Pavlusni qal’aga olib kiringlar! — deb buyruq berdi. So‘ngra u yana odamlariga: — Uni qamchilanglar! Nima uchun odamlar unga qarshi baqir–chaqir qilganini bilinglar! — dedi.

²⁵Pavlusni qamchilash uchun bog‘layotganlarida, Pavlus o‘sha yerda turgan yuzboshiga dedi: — Rim fuqarosining biron aybi topilmagan bo‘lsa ham, uni qamchilash sizlarning qonuningizda bormi?

²⁶Yuzboshi bu gapni eshitib, mingboshining oldiga bordi–da: — Nima qilmoqchisiz? Axir, bu odam Rim fuqarosi ekan–ku! — dedi.

²⁷Mingboshi Pavlusning oldiga kelib, undan: — Menga ayt–chi, sen Rim fuqarosimisan? — dedi. — Ha, — deb javob berdi Pavlus.

²⁸Mingboshi: — Men katta miqdorda pul to‘lab, fuqarolikni olgan edim, — dedi. — Men esa Rim fuqarosi bo‘lib tug‘ilganman, — dedi Pavlus.

²⁹Pavlusni so‘roq qilmoqchi bo‘lib turganlar o‘sha zahoti undan qo‘llarini tortdilar. Mingboshi Pavlusning Rim fuqarosi ekanini eshitib, uni kishanlagani uchun qo‘rqib ketdi.

³⁰Yahudiylar Pavlusni nima uchun ayblayotganlarini mingboshi bilmoqchi bo‘ldi. Ertasi kuni u Pavlusni ozod qildi va “bosh ruhoniylar bilan Oliy kengash a’zolari yig‘ilsin”, deb buyurdi. Mingboshi Pavlusni ularning qoshiga olib keldi.