Read O‘zbek tilidagi Muqaddas Kitob, 2013 Havoriylar 24 Bible Online

Havoriylar 24 - O‘zbek tilidagi Muqaddas Kitob, 2013 bible

Havoriylar 24

¹Besh kun o‘tgach, oliy ruhoniy Hananiya bir necha oqsoqollar va Tertull degan bir huquqshunos bilan birga Qaysariyaga keldi. Ular Pavlusga qarshi arzlarini hokimga bayon qilmoqchi bo‘ldilar.

²Pavlusni chaqirib keltirganlaridan keyin, Tertull uni ayblay boshladi:

³— Janobi oliylari! Sizning dono rahbarligingiz ostida biz anchadan buyon tinch–xotirjam yashayapmiz, uzoqni ko‘ra bilishingiz sharofati bilan xalqimiz uchun islohotlar amalga oshirildi. Biz buni hamma joyda va har doim e’tirof etamiz, sizdan chuqur minnatdormiz.

⁴Men sizning vaqtingizni ko‘p olmoqchi emasman, marhamatingizni darig‘ tutmay, bizning qisqa axborotimizga quloq solishingizni iltimos qilaman.

⁵Biz aslida bu odamni vabo singari xavfli deb bilamiz. U dunyodagi hamma yahudiylar orasida isyon boshladi. U nasroniylar mazhabining rahnamosidir.

⁶[6-7] U hatto Ma’badni bulg‘ashga harakat qildi. Shuning uchun biz uni hibsga oldik [1].

⁸Bu odamni o‘zingiz so‘roq qilsangiz, biz uni nimada ayblayotganimizni uning o‘zidan bilib olasiz.

⁹Yahudiylar bu ayblovlarga qo‘shilib, bularning hammasi haqiqat, deb aytdilar.

¹⁰Hokim Pavlusga, gapir, deb ishora qilgandan keyin, u shunday javob berdi: — Bilaman, siz ancha yillardan beri bu xalq ustidan hukmron bo‘lib kelasiz. Shuning uchun o‘zimni sizning huzuringizda himoya qilayotganimdan xursandman.

¹¹O‘zingiz bilib olishingiz mumkin: Xudoga sajda qilgani Quddusga borganimga o‘n ikki kundan oshgani yo‘q.

¹²Men Ma’badda biron odam bilan tortishib qolganimni yoki sinagogalarda, yo bo‘lmasa shaharda olomon orasiga g‘ulg‘ula solganimni ular ko‘rganlari yo‘q.

¹³Qolaversa, hozir menga qarshi aytayotgan ayblovlarini ular isbotlab bera olmaydilar.

¹⁴Ammo shuni tan olishim kerakki, ular Isoning yo‘lini soxta e’tiqod deb aytishadi. Men esa Isoning yo‘li orqali ota–bobolarimizning Xudosiga sajda qilaman. Tavrotga mos kelgan va payg‘ambarlar bitiklarida yozilgan har bir so‘zga men ishonaman.

¹⁵Men mana shu odamlar singari Xudoga umid bog‘laganman. Men ham ularday Xudo solihlarni va fosiqlarni tiriltirishiga ishonaman.

¹⁶Ayni shu sababdan Xudo va xalq oldida men doim vijdonimni sof saqlashga tirishaman.

¹⁷Mana, Quddusda bo‘lmaganimga bir necha yil bo‘ldi, endi xalqimga sadaqa berish va nazr qilish uchun Quddusga borgandim.

¹⁸Men shularni bajarayotganimda, ular meni Ma’badda ko‘rib qoldilar. Men poklanish marosimini ado etayotgan edim, yonimda olomon yo‘q edi, shovqin–suron ham ko‘tarmagan edim.

¹⁹Asiya viloyatidan bo‘lgan bir necha yahudiylar o‘sha yerda edilar. Agar ularning menga qarshi biron da’volari bo‘lsa, ular o‘zlari sizning huzuringizga kelib, o‘z ayblovlarini bildirishlari kerak.

²⁰Yoki bu yerdagilar aytishsin, men Oliy kengash a’zolari oldida turganimda menda qanday jinoyat topdilar ekan?

²¹Men ularning oldida turganimda, baland ovozda: “Men o‘liklar tiriladi, deb aytganim uchun bugun oldingizda hukm qilinyapman”, deb aytgan edim. Bundan boshqa nima aybim bor?

²²Isoning yo‘li to‘g‘risida batafsil xabardor bo‘lgan Feliks yig‘ilishni to‘xtatib: “Mingboshi Lisiy kelgandan keyin, sening ishing to‘g‘risida qaror qabul qilaman”, dedi.

²³Feliks yuzboshiga: “Uni qamab qo‘y, ammo unga ozgina erkinlik ber, uning ehtiyojlari uchun xizmat qilmoqchi bo‘lgan do‘stlariga ijozat ber”, deb buyruq berdi.

²⁴Bir necha kundan keyin Feliks xotini Drusilla bilan keldi. Drusilla yahudiy edi. Feliks Pavlusni chaqirtirib keldi va Iso Masihga ishonch to‘g‘risidagi gaplarini tingladi.

²⁵Pavlus solihlik, nafsni tiyish, qiyomat kunining kelishi to‘g‘risida gapirar ekan, Feliks qo‘rqib, dedi: — Sen endi boraver. Imkon topilgan zahoti, seni chaqiraman.

²⁶Feliks: “Pavlus menga pora beradi”, deb umid qilardi, shuning uchun Pavlusni tez–tez chaqirib, u bilan suhbatlashardi.

²⁷Oradan ikki yil o‘tgach, Feliksning o‘rniga Porsiy Festus hokim bo‘ldi. Feliks yahudiylarning ko‘nglini olmoqchi bo‘lib, Pavlusni qamoqda qoldirdi.