Read O‘zbek tilidagi Muqaddas Kitob, 2013 Havoriylar 26 Bible Online

Havoriylar 26 - O‘zbek tilidagi Muqaddas Kitob, 2013 bible

Havoriylar 26

¹Agrippa Pavlusga: — O‘zingni himoya qilib gapirishing mumkin, — dedi. Shundan keyin Pavlus qo‘lini cho‘zib, o‘zini himoya qilib gapira boshladi:

²— Shoh Agrippa janobi oliylari! Bugun mana bu yahudiylar menga qo‘yayotgan ayblardan o‘zimni sizning huzuringizda himoya qilayotganim uchun baxtiyorman.

³Axir, yahudiylarning odatlari va bahslarini siz juda yaxshi bilasiz. Sizdan iltimos, marhamat qilib mening gapimni eshitsangiz.

⁴Yoshligimdan bosib o‘tgan hayot yo‘limni — dastlab o‘z xalqim orasida, keyin Quddusda kechirgan hayotimni hamma yahudiylar biladilar.

⁵Agar ular guvohlik berishni istasalar, dinimizning eng ashaddiy mazhabi farziylarga mansub bo‘lganimni ular azaldan biladilar.

⁶Endi esa, Xudoning ota–bobolarimizga bergan va’dasiga umid qilganim uchun hukm qilinyapman.

⁷Vaholanki, xalqimizning o‘n ikki qabilasi kechayu kunduz Xudoga chin dildan sajda qilib, shu va’da bajo bo‘lishiga umid qilyaptilar. Janobi oliylari, men ham aynan shunday umid qilganim uchun yahudiylar meni ayblayaptilar.

⁸Ey shu yerda turganlar! Nima uchun Xudo o‘liklarni tiriltirishiga ishonib bo‘lmaydi, deb o‘ylaysizlar?

⁹Men o‘zimcha, Nosiralik Isoning nomiga qarshi har narsani qilishim kerak, deb o‘ylagandim.

¹⁰Men buni Quddusda qildim ham. Bosh ruhoniylardan vakolat olib, azizlardan ko‘pchiligini qamoqqa tashladim. Ular o‘limga hukm qilinganlarida, men buni ma’qullab turardim.

¹¹Men tez–tez bir sinagogadan ikkinchisiga borib, ularni jazolardim, imonlaridan qaytarishga harakat qilardim. Men ularga nisbatan shunchalik shafqatsiz edimki, hatto begona shaharlarda ham ularni quvg‘in qilgani borardim.

¹²Bir kuni shu maqsadda bosh ruhoniylardan vakolat olib, Damashqqa bir topshiriq bilan ketayotgan edim.

¹³Janobi oliylari! Men kuppa–kunduz yo‘lda ketayotganimda, birdan osmonda quyoshdan ham yorug‘ nurni ko‘rdim. Nur sheriklarim bilan mening yon–atrofimni yoritib yubordi.

¹⁴Hammamiz yerga yiqildik. Shunda oromiy tilida menga gapirayotgan bir ovozni eshitdim: “Shoul! Shoul! Nimaga Meni quvg‘in qilyapsan? Ho‘kiz o‘z egasining tayog‘ini tepib, o‘ziga zarar keltirganday, sen ham Menga qarshi chiqib, o‘zingga zarar keltiryapsan.”

¹⁵“Hazratim! Sen kimsan?” — deb so‘radim men. “Sen quvg‘in qilayotgan Isoman”, — deb javob berdi Rabbiy.

¹⁶“Endi o‘rningdan tur, Shoul. Seni O‘zimning xizmatkorim qilib tayinlash maqsadida senga zohir bo‘ldim. Sen Meni ko‘rganing va Men senga ko‘rsatadiganlarim to‘g‘risida guvohlik berasan.

¹⁷Men seni o‘z xalqing qo‘lidan qutqaraman. Seni g‘ayriyahudiylar orasiga yuboraman, Men seni ularning qo‘lidan ham qutqaraman.

¹⁸Sen ularning ko‘zlarini ochasan, ularni zulmatdan yorug‘likka, shaytonning hukmronligidan Xudoning hukmronligiga qaytarasan. Menga imon keltirish orqali ularning gunohlari kechirilib, ular Xudoning tanlangan xalqi orasidan joy oladilar.”

¹⁹Shunday qilib, shoh Agrippa janoblari, osmondan menga kelgan vahiyga itoatsizlik qilmadim.

²⁰Avvalo, Damashqda va Quddusda, keyin butun Yahudiyada, shuningdek, g‘ayriyahudiylar orasida: “Gunohlaringiz uchun tavba qilinglar, Xudoga yuz buringlar, tavba qilganingizni ko‘rsatadigan ishlar qilinglar”, deb va’z qildim.

²¹Shu sababdan yahudiylar meni Ma’badda tutib olib, o‘ldirmoqchi bo‘ldilar.

²²Ammo shu kungacha Xudo menga madad berdi. Men hammaga — kattayu kichikka shu yerda birday guvohlik beryapman. Ammo men ularga faqat payg‘ambarlarning va Musoning aytganlarini gapirgan edim.

²³Masih azob chekishi va birinchi bo‘lib o‘likdan tirilishi, shu maqsadda nurni O‘zining xalqiga va g‘ayriyahudiylarga olib kelishi kerak edi.

²⁴Pavlus shu tariqa o‘zini himoya qilar ekan, Festus unga baqirib dedi: — Sen telba bo‘lib qolibsan, Pavlus! Ko‘p bilganing seni aqldan ozdiryapti!

²⁵Pavlus esa shunday dedi: — Men aqldan ozganim yo‘q, Festus janobi oliylari! Men jiddiy haqiqatni gapiryapman.

²⁶Shoh bu narsalar to‘g‘risida bilgani uchun, men unga bemalol gapirmoqdaman. Bu narsalarning har biri uning e’tiboridan chetda qolmaganiga imonim komil. Chunki bular yashirin qilingan emas.

²⁷Shoh Agrippa janoblari! Siz payg‘ambarlarning bashoratlariga ishonasizmi? Bilaman, ishonasiz.

²⁸Agrippa Pavlusga: — Sen darrov meni masihiy bo‘lishga ko‘ndirmoqchisan–a, — dedi.

²⁹Pavlus shunday javob berdi: — Darrov bo‘ladimi yoki uzoq vaqtdan keyin bo‘ladimi, nafaqat siz, balki mening gaplarimni eshitayotganlarning hammasi men singari bo‘lsin, deb Xudoga ibodat qilaman. Ammo mana bu kishanlarni sizlarga ravo ko‘rmayman.

³⁰Shundan keyin shoh Agrippa, hokim Festus, Vernika va boshqalar o‘rinlaridan turdilar.

³¹Ular ketayotib, bir–birlariga: “Bu odam o‘limga yoki zindonga tashlanishga loyiq biron ish qilmagan”, deb aytdilar.

³²Agrippa Festusga: — Agar bu odam Qaysarning hukmini talab qilmaganda edi, uni ozod qilish mumkin edi, — dedi.