Read O‘zbek tilidagi Muqaddas Kitob, 2013 Havoriylar 4 Bible Online

Havoriylar 4 - O‘zbek tilidagi Muqaddas Kitob, 2013 bible

Havoriylar 4

¹Butrus bilan Yuhanno xalqqa gapirib turganlarida, bir necha ruhoniylar, Ma’bad mirshabboshisi va sadduqiy mazhabining ba’zi a’zolari keldilar.

²Ularning qattiq jahli chiqqan edi, chunki bu ikkala havoriy xalqqa ta’lim berib, Iso o‘likdan tirildi, deb va’z qilayotgan edilar.

³Ular ikkala havoriyni ushlab, vaqt kech bo‘lgani uchun ertasi kun ertalabgacha qamoqda saqladilar.

⁴Ammo bu xabarni eshitganlarning ko‘pchiligi imonga keldi, imonlilar soni besh mingtaga ko‘paydi.

⁵Keyingi kun Oliy kengash a’zolari — yo‘lboshchilar, oqsoqollar, Tavrot tafsirchilari Quddusda yig‘ildilar.

⁶Oliy ruhoniy Hanan, Kayafa, Yuhanno, Iskandar va oliy ruhoniy oilasiga mansub bo‘lgan boshqa erkaklar yig‘inda ishitirok etdilar.

⁷Ular ikkala havoriyni o‘rtaga turg‘izib qo‘yib, so‘radilar: — Buni qanday qudrat bilan, kimning nomidan qildingizlar?

⁸Shunda Muqaddas Ruhga to‘lgan Butrus ularga shunday dedi: — Ey xalq yo‘lboshchilari, oqsoqollar!

⁹Agar bir xasta odamga qilingan yaxshilik tufayli bizdan hisob talab qilayotgan bo‘lsangiz va bu odamning qanday qilib sog‘ayganini so‘rayotgan bo‘lsangiz,

¹⁰sizlar, Isroil xalqi — hammalaringiz shuni bilib qo‘yinglarki, mana bu odam Nosiralik Iso Masih nomi bilan tamomila sog‘ayib, oldingizda turibdi. Isoni sizlar xochga mixlagan edingizlar, Xudo esa Uni o‘likdan tiriltirdi.

¹¹Axir, Iso to‘g‘risida Muqaddas Bitiklarda shunday yozilgan: “Siz, binokorlar, rad etgan tosh Binoning tamal toshi bo‘ldi.” Najot boshqa hech kimdan kelmaydi.

¹²Uning nomi — butun olamda najot beradigan yagona nomdir.

¹³Kengash a’zolari Butrus bilan Yuhannoning jasoratini ko‘rdilar va ularning o‘qimagan, oddiy odam ekanliklarini bilib, hayron qoldilar. Butrus bilan Yuhanno Isoning sheriklari ekanini angladilar.

¹⁴Shifo topgan odam ham ikkala havoriy bilan birga turgan edi. Shuning uchun xalq yo‘lboshchilari va oqsoqollar uni ko‘rib, ikkovining gaplariga qarshi biron so‘z ayta olmadilar.

¹⁵Shunday qilib, ular havoriylarga: “Majlisxonadan chiqinglar”, deb buyruq berdilar. So‘ngra o‘zaro muhokama qila boshladilar:

¹⁶— Bu odamlarni nima qilamiz? Bu ajoyib mo‘jizani mana shu odamlar qilganini Quddusdagi har bir odam biladi, biz buni inkor eta olmaymiz.

¹⁷Ammo bu xabar xalq orasida yanada yoyilib ketishining oldini olish uchun, bundan keyin Isoning nomi bilan hech kimga gapirmaysizlar, deb ularni ogohlantirib qo‘yamiz.

¹⁸Shunday qilib, ular ikkovini chaqirdilar va: “Isoning nomi bilan umuman gapirmaysizlar yoki ta’lim bermaysizlar”, deb buyruq berdilar.

¹⁹Butrus bilan Yuhanno esa ularga shunday javob qaytardilar: — Xudodan ko‘ra sizlarga itoat etsak, Xudoning nazarida to‘g‘ri bo‘ladimi? O‘zlaringiz xulosa chiqaraveringlar.

²⁰Biz esa ko‘rganlarimiz va eshitganlarimiz to‘g‘risida gapirmasdan tura olmaymiz.

²¹Shunday qilib, Kengash a’zolari ularni oxirgi marta ogohlantirib, qo‘yib yubordilar. Ularni jazolash uchun hech qanday sabab topa olmagandilar, chunki butun xalq yuz bergan voqeani bilib, Xudoga hamdu sano aytardi.

²²Axir, mo‘jizali alomat tufayli shifo topgan odam qirq yildan oshiq vaqt davomida shol bo‘lgan edi.

²³Butrus bilan Yuhanno ozod bo‘lishlari bilanoq, do‘stlarining oldiga qaytib keldilar va bosh ruhoniylar bilan oqsoqollarning ularga aytgan gaplarini so‘zlab berdilar.

²⁴Do‘stlari bu gaplarni eshitganlaridan keyin, hammalari birgalikda baland ovozda Xudoga shunday deb ibodat qildilar: — Ey Egamiz! Sen yeru osmonni, dengizu ulardagi hamma narsalarni yaratgansan!

²⁵Quling — bobomiz Dovud orqali Muqaddas Ruhing bilan shunday degansan: Nega quturadi xalqlar?! Nega behuda fitna qilar elatlar?!

²⁶Egamizga va Uning Masihiga qarshi Zamin shohlari saf tortdilar, Hukmdorlar Unga qarshi birlashdilar.

²⁷Haqiqatan, Hirod bilan Pontiy Pilat g‘ayriyahudiylar va Isroil xalqi bilan birga bu shaharda Sening muqaddas quling, O‘zing Masih qilib tanlagan Isoga qarshi to‘plandilar.

²⁸Qudrating va xohish–irodang bilan O‘zing ilgaridan qaror qilgan hamma narsani ular ijro etdilar.

²⁹Endi, ey Egamiz, ularning tahdidlariga qara! Bu qullaring jasorat bilan Sening so‘zingni aytishlari uchun bizga imkon ber.

³⁰Qudratingni ko‘rsat, toki Muqaddas quling Iso nomi bilan xastalarga shifo beraylik, alomatlar va mo‘jizalar ko‘rsataylik.

³¹Hammalari ibodat qilib bo‘lganlaridan keyin, ular yig‘ilib turgan joy silkindi. Hammalari Muqaddas Ruhga to‘lib, Xudoning so‘zini jasorat bilan gapiradigan bo‘ldilar.

³²Imonga kelganlar yakdil va hamjihat edilar. Ulardan birontasi o‘ziga qarashli biron narsani “Bu meniki”, deb aytmas, bor mol–mulklarini umumiy deb bilishardi.

³³Havoriylar buyuk qudrat bilan Rabbimiz Isoning tirilganiga guvohlik berardilar. Xudo ularning hammalariga mo‘l–ko‘l muruvvat ko‘rsatardi.

³⁴Imonlilarning orasida bironta muhtoj odam yo‘q edi. Dala yoki uy–joy egalari bor narsalarini sotardilar, sotuvdan tushgan mablag‘ni olib kelib,

³⁵havoriylarning ixtiyoriga berardilar. Pullar odamlarning ehtiyojiga qarab taqsimlanardi.

³⁶Imonlilar orasida levilardan bo‘lgan Yusuf ismli bir odam bor edi. U asli Kiprdan edi. Havoriylar unga Barnabo, ya’ni “dalda beruvchi” degan nom bergan edilar.

³⁷Yusuf ham dalasini sotib, pulini havoriylarga in’om qildi.