Read O‘zbek tilidagi Muqaddas Kitob, 2013 Havoriylar 6 Bible Online

Havoriylar 6 - O‘zbek tilidagi Muqaddas Kitob, 2013 bible

Havoriylar 6

¹Shu vaqt davomida shogirdlarning soni ortib boraverdi. Ammo shu paytda yunonzabon va oromiyzabon imonli yahudiylar orasida ziddiyat paydo bo‘ldi. Yunonzabon yahudiylar: “Kundalik oziq–ovqat taqsimlanganda, bizning bevalarimiz e’tibordan chetda qolyaptilar”, deb e’tiroz bildirdilar.

²O‘n ikki havoriy jamiki shogirdlarni yig‘ib, ularga shunday dedilar: — Biz Xudoning kalomini va’z qilishni bir chetda qoldirib, ozuqa tarqatish bilan ovora bo‘lishimiz to‘g‘ri emas.

³Birodarlar, orangizdan yetti kishini tanlanglar. Ular obro‘–e’tiborga ega, Muqaddas Ruhga va donolikka to‘lib–toshgan bo‘lsin. Ularni bu xizmatga tayin etaylik.

⁴Biz esa o‘zimizni ibodatga va Xudoning kalomi xizmatiga bag‘ishlaylik.

⁵Ularning gapi butun jamoaga ma’qul bo‘ldi. Jamoa imonga va Muqaddas Ruhga to‘la Stefanni, shuningdek Filip, Proxor, Nikanor, Timon, Parmen va yahudiy diniga kirgan Antioxiyalik Nikolayni tanladilar.

⁶Ular bu odamlarni havoriylarning oldiga turg‘izib qo‘ydilar. Havoriylar ularga qo‘llarini qo‘yib, ibodat qildilar.

⁷Shunday qilib, Xudoning so‘zi yoyilib boraverdi. Shogirdlar soni Quddusda ko‘paydi. Ruhoniylarning ko‘pchiligi imonga keldilar.

⁸Stefan Xudoning marhamatiga va ilohiy qudratga to‘lgan edi. U xalq orasida ajoyib mo‘jizalar va alomatlar ko‘rsatdi.

⁹Ammo Ozodlar degan sinagoga a’zolarining ba’zilari — Kirineyaliklar, Aleksandriyaliklar, shuningdek Kilikiya va Asiyaliklar Stefan bilan bahslasha boshladilar.

¹⁰Muqaddas Ruh Stefanga ko‘p donolik berdi, shuning uchun ular Stefanning gaplarini inkor qila olmadilar.

¹¹Shundan keyin sinagoga a’zolari ba’zi odamlarni gijgijlab: “Stefan Musoga va Xudoga qarshi kufr so‘zlar aytganini eshitdik”, — deb aytishga ko‘ndirdilar.

¹²Shu yo‘l bilan ular xalqni, oqsoqollarni, Tavrot tafsirchilarini qayradilar. Ular Stefanni ushlab, Oliy kengashga olib keldilar.

¹³Shunda ular soxta guvohlarni yolladilar. Soxta guvohlar shunday dedilar: “Bu odam mana shu muqaddas Ma’badga va qonunga qarshi gaplar aytishdan to‘xtamayapti.

¹⁴Uning aytishicha, Nosiralik Iso Ma’badni qulatar emish, Muso bizlarga bergan urf–odatlarni o‘zgartirar emish.”

¹⁵Oliy kengashda o‘tirganlar Stefanga tikilib qaradilar, uning yuzi xuddi farishtaning yuziga o‘xshash ekanini ko‘rdilar.