Read O‘zbek tilidagi Muqaddas Kitob, 2013 Havoriylar 8 Bible Online

Havoriylar 8 - O‘zbek tilidagi Muqaddas Kitob, 2013 bible

Havoriylar 8

¹Stefanning o‘limini Shoul ma’qullagan edi. O‘sha kundan Quddusdagi imonlilar jamoati shafqatsiz quvg‘inlardan azob cheka boshladi. Havoriylardan boshqa hamma imonlilar Yahudiya va Samariya viloyatlari bo‘ylab tarqalib ketdilar.

²Taqvodor odamlar Stefanni dafn qilib, unga qattiq aza tutdilar.

³Shoul esa jamoatni yo‘q qilish payiga tushgan edi. U uyma–uy yurib, erkagu ayol imonlilarni sudrab olib chiqar, ularni qamoqxonaga tashlar edi.

⁴Imonlilar tarqalib ketib, Iso haqidagi xabarni har joylarda va’z qilib yurardilar.

⁵Filip Samariyaning bosh shahriga borib, u yerdagi aholiga Masih to‘g‘risida va’z qildi.

⁶Filipni tinglab turgan va qilgan mo‘jizalarini ko‘rgan olomon uning gaplariga diqqat bilan quloq soldi.

⁷Yovuz ruhlar ko‘p odamlarning ichidan chinqirib chiqib ketardi, ko‘plab shol va cho‘loq odamlar shifo topar edilar.

⁸Shunday qilib, o‘sha shaharda katta shodlik hukm surardi.

⁹Shu yerda Shimo‘n degan bir odam yashardi. U anchadan beri sehr–jodular qilib, Samariya aholisini hayratda qoldirib kelardi. Shu tariqa u o‘zini buyuk odam qilib ko‘rsatardi.

¹⁰Shahardagi har bir odam — kattayu kichik uning gaplariga diqqat bilan quloq solar, “Bu odam Xudoning qudratidir, u Buyuk Qudrat deb nom olgan”, deb aytardi.

¹¹Shimo‘n uzoq vaqt odamlarni sehr–jodulari bilan ajablantirib kelgani uchun ham, unga odamlar diqqat bilan quloq solishardi.

¹²Ammo Filip Xudo Shohligi va Iso Masih to‘g‘risidagi Xushxabarni va’z qilgandan keyin, odamlar Filipga ishondilar. Erkagu ayol suvga cho‘mdirildi.

¹³Hatto Shimo‘n ham imonga keldi. U suvga cho‘mdirilgandan keyin, yuz berayotgan alomatlaru buyuk mo‘jizalarni ko‘rib, hayratda qoldi va Filipdan ajralmaydigan bo‘ldi.

¹⁴Quddusdagi havoriylar, Samariya aholisi Xudoning kalomini qabul qilibdi, deb eshitganlari uchun, Butrus bilan Yuhannoni ularning oldiga yubordilar.

¹⁵Butrus bilan Yuhanno borib, Muqaddas Ruhni qabul qilib olinglar, deb Samariyaliklar uchun ibodat qildilar.

¹⁶Chunki hali Muqaddas Ruh ularning birontasini ham qamrab olmagan edi. Ular faqat Rabbimiz Iso nomi bilan suvga cho‘mdirilgan edilar, xolos.

¹⁷Shundan keyin Butrus bilan Yuhanno ularning ustiga qo‘llarini qo‘ydilar. Shu tariqa Samariyaliklar Muqaddas Ruhni qabul qildilar.

¹⁸Shimo‘n ko‘rdiki, odamlarning boshlariga havoriylar qo‘llarini qo‘yganlarida, Muqaddas Ruh ularga berilardi. Shimo‘n Butrus bilan Yuhannoga pul taklif qilib, dedi:

¹⁹— Shu qudratdan menga ham beringlar, toki birontasining boshiga qo‘llarimni qo‘yganimda, o‘sha odam Muqaddas Ruhni qabul qilsin.

²⁰Ammo Butrus Shimo‘nga shunday javob berdi: — Puling o‘zing bilan birga do‘zaxga ravona bo‘lsin, chunki sen, Xudoning in’omini pulga sotib olsam bo‘ladi, deb o‘ylaysan.

²¹Bu ishda sening na ulushing, na haqing bor! Sening yuraging Xudo nazarida to‘g‘ri emas.

²²Endi tavba qilib, bu fosiq niyatingdan qayt, “Meni kechirgin”, deb Egamizga ibodat qil, balki yuragingdagi niyatingni U kechirar.

²³Ko‘rib turibman: yuraging achchiq zardaga to‘la, o‘zing fosiqlik zanjiriga bog‘langansan.

²⁴Shimo‘n shunday javob berdi: — Men uchun Egamizga ibodat qilinglar, tag‘in aytganlaringizdan biri boshimga tushmasin.

²⁵Butrus bilan Yuhanno u yerda guvohlik berib, Rabbimiz Iso haqidagi xabarni va’z qildilar. Shundan keyin Samariyaning ko‘p qishloqlarida Xushxabarni e’lon qilib, Quddusga qaytib keldilar.

²⁶Shu orada Egamizning bir farishtasi Filipga dedi: “Qani, bo‘l, janubga bor, Quddusdan G‘azoga olib boradigan sahro yo‘lidan ket.”

²⁷Filip yo‘lga chiqdi, ketayotib Habashistonlik bir amaldorni uchratib qoldi. U Habashiston malikasi Kandakining bosh xazinaboni lavozimidagi katta amaldor edi. U Quddusga sajda qilgani kelib,

²⁸endi uyiga qaytayotgan edi. Amaldor aravada o‘tirganicha, Ishayo payg‘ambar kitobini o‘qib ketayotgan edi.

²⁹Muqaddas Ruh Filipga: “Aravaga yaqinroq bor, uning yonida yur”, dedi.

³⁰Filip yugurib, aravaga yetib oldi, amaldorning Ishayo payg‘ambar kitobini o‘qiyotganini eshitdi. Filip: — O‘qiyotganingizni tushunyapsizmi? — deb so‘radi.

³¹— Birontasi yordam bermasa, tushunarmidim?! — deb javob berdi amaldor. U Filipga: “Chiq, yonimga o‘tir”, deb taklif qildi.

³²Amaldor o‘qiyotgan Muqaddas Bitiklar parchasi quyidagilar edi: So‘yishga olib borilgan qo‘yday, Jun qirquvchi oldida jim turgan qo‘ziday U miq etib og‘zini ochmadi.

³³U xo‘rlandi. Adolatdan mahrum qilindi. Uning nasli haqida kim o‘ylaydi? Yer yuzida uning hayotiga chek qo‘yildi.

³⁴Amaldor Filipdan so‘radi: — Ayt–chi, payg‘ambar bu gaplarni kim to‘g‘risida aytdi — o‘zi to‘g‘risidami yoki boshqa birontasi to‘g‘risidami?

³⁵Shundan keyin Filip tushuntira boshladi, Muqaddas Bitiklarning shu qismidan boshlab Iso haqidagi Xushxabarni amaldorga so‘zlab berdi.

³⁶[36-37] Ular yo‘lda ketayotganlarida, suv bor joyga kelib qoldilar. Shunda amaldor dedi: — Mana bu yerda suv bor ekan. Suvga cho‘mdirilishimga nima xalaqit beradi?! [1]

³⁸Amaldor aravani to‘xtatishga buyurdi. Ular ikkalasi — Filip bilan amaldor suvga tushdilar, Filip uni suvga cho‘mdirdi.

³⁹Ular suvdan chiqqanlaridan keyin, Egamizning Ruhi to‘satdan Filipni olib ketdi. Amaldor uni qaytib ko‘rmadi, ammo xursand bo‘lganicha, yo‘lida davom etdi.

⁴⁰Filip esa Ashdodda paydo bo‘lib qoldi. U Qaysariyaga kelguncha, butun o‘lka bo‘ylab o‘tar ekan, hamma shaharlarda Xushxabarni e’lon qilib boraverdi.