Read O‘zbek tilidagi Muqaddas Kitob, 2013 Rimliklarga 11 Bible Online

Rimliklarga 11 - O‘zbek tilidagi Muqaddas Kitob, 2013 bible

Rimliklarga 11

¹Shunday qilib, yana bir savolim bor. Nahotki Xudo O‘z xalqini rad qilgan bo‘lsa? Yo‘q, aslo! Men o‘zim Isroil xalqidan bo‘lib, Ibrohimning avlodidanman, Benyamin qabilasiga tegishliman–ku!

²Xudo azaldan tanlab olgan xalqini rad qilgani yo‘q. Muqaddas Bitiklarda Ilyos payg‘ambar haqida nima yozilgani esingizda yo‘qmi?! U Isroil xalqidan shikoyat qilib, Xudoga shunday degan edi:

³“Ey, Egam, Isroil xalqi qurbongohlaringni buzdi, payg‘ambarlaringni qilichdan o‘tkazdi. Yolg‘iz men qoldim, xolos. Endi jonimni olish uchun meni ham qidirib yuribdilar.”

⁴Xudo unga nima deb javob berdi? “Men Isroil xalqidan O‘zim uchun yetti ming odamni qoldirdim, ular Baal oldida tiz cho‘kmagan.”

⁵Xuddi shunga o‘xshab, hozir ham Xudoga sodiq qolganlar bor, chunki ular Xudoning inoyati bo‘yicha tanlanganlar.

⁶Tanlash insonlarning ishlariga emas, Xudoning inoyatiga bog‘liq. Agar shunday bo‘lmaganda edi, inoyat haqiqiy inoyat bo‘lmas edi.

⁷Xullas, bu nimani bildiradi? Isroil xalqi solihlik payida bo‘lsa ham, solihlikka erishmadi. Faqatgina tanlanganlar bu maqsadga erishdi, qolganlarning esa yuraklari tosh bo‘ldi.

⁸Muqaddas Bitiklarda yozilganday: “Xudo shu paytgacha ularni qattiq uxlatib qo‘ydi, Ularga ko‘radigan ko‘z, eshitadigan quloq bermadi.”

⁹Dovud ham shunday degan: “Dasturxonlari o‘zlariga to‘ru tuzoq bo‘lsin, Shunda ular qoqilib, Jazolarini oladilar.

¹⁰Ko‘z nurlari so‘nsin, ko‘rmayin qolsin, Bellari to abad bukchayib qolsin.”

¹¹Bundan yana bir savol kelib chiqadi. Yahudiylar qoqilganda, butunlay halok bo‘ldilarmi? Yo‘q, aslo! Aksincha, ular Masihni rad qilganlari uchun g‘ayriyahudiylar najotga ega bo‘ldilar, toki Isroil xalqining rashki qo‘zg‘alsin.

¹²Yahudiylar Masihni rad etib, butun dunyoni yanada boyitdilar. O‘zlari yo‘qotgan boylik bilan g‘ayriyahudiylarga foyda keltirdilar. Agar ularning bu gunohi shunday samara keltirgan bo‘lsa, ularning najot topishi qanchalik foyda keltirishini bir tasavvur qilib ko‘ringlar–a!

¹³Endi sizlarga — g‘ayriyahudiylarga aytyapman. To‘g‘ri, men sizlarga Xushxabar keltirish uchun yuborilganman. Bu xizmatimni jon–jahdim bilan bajaraman,

¹⁴balki bu xizmatim bilan o‘z qondoshlarim, yahudiylarning rashkini qo‘zg‘atarman, ularning ba’zilarini qutqarib qolarman.

¹⁵Yahudiylarning rad etilishi dunyoni Xudo bilan yarashtirgan bo‘lsa, ularning Xudo tomonidan qabul qilinishi o‘limdan hayotga olib bormaydimi?

¹⁶Birinchi yopilgan non Xudoga bag‘ishlanib muqaddas bo‘lsa, xamirning qolgani ham muqaddasdir. Agar tomirlar muqaddas bo‘lsa, novdalar ham muqaddasdir.

¹⁷Ba’zi yahudiylar daraxtning sindirib tashlangan novdalariga o‘xshaydilar. Sizlar — g‘ayriyahudiylar esa tabiiy novdalar orasiga payvand qilingan yovvoyi zaytun novdalariga o‘xshaysizlar. Endi ular bilan birga bir tomirdan oziqlanyapsizlar.

¹⁸Shunday ekan, boshqa novdalarga qarab maqtanmanglar. Agar juda kekkayib ketsangizlar, yodga olinglar, sizlar tomirni emas, balki tomir sizlarni oziqlantiryapti.

¹⁹Ehtimol sizlar: “Biz payvand qilinishimiz uchun novdalar sindirildi”, — dersizlar.

²⁰To‘g‘ri, lekin esingizda bo‘lsin: ular ishonmaganlari uchun sindirib tashlandilar, ammo sizlar imoningiz orqali payvand qilingansiz. Shuning uchun kekkayib ketmanglar, balki Xudodan qo‘rqinglar.

²¹Yo‘qsa, Xudo tabiiy novdalarni ayamagani kabi, sizlarni ham ayamaydi.

²²Shunday qilib, Xudoning mehribonligi va qattiqqo‘lligi haqida o‘ylab ko‘ring: Xudoning najotini rad qilganlarga U qattiqqo‘llik qildi, sizlarga — payvand qilinganlarga esa U mehribonlik ko‘rsatdi. Agar Xudoga sodiq qolsangiz, Uning mehribonligidan bahramand bo‘laverasiz. Bo‘lmasa, Xudo sizlarni ham kesib tashlaydi.

²³Najotni rad qilganlar o‘z imonsizliklarini bas qilsalar, payvand qilinadilar. Xudo ularni qayta payvand qilib qo‘yishga qodir.

²⁴Axir, sizlar yovvoyi zaytun daraxtidan kesib olinib, parvarishlangan zaytun daraxtiga, tabiatga xilof ravishda payvand qilindingiz. Shunday ekan, ular — tabiiy novdalar, o‘zlarining daraxtlariga qanday osonlik bilan qayta payvand qilinadilar–a!

²⁵Birodarlarim, sizlar tag‘in o‘zbilarmon bo‘lib ketmanglar, deb bu sirni sizlarga bildirmoqchiman: g‘ayriyahudiylar orasidan belgilangan sondagilar najot topmaguncha, Isroil xalqining ba’zilari o‘jar bo‘lib qolaveradilar.

²⁶Shundan keyin, butun Isroil qutqariladi. Muqaddas Bitiklarda Xudo shunday degan–ku: “Qutqaruvchi Quddusdan keladi, Yoqub naslidan betavfiqlikni yo‘q qiladi.

²⁷Ular bilan qilgan ahdim mana shudir: Men ularni gunohlaridan forig‘ qilaman.”

²⁸Xushxabarni rad qilib, yahudiylar Xudoning dushmanlari bo‘lib qoldilar, bu sizlar — g‘ayriyahudiylarga foyda keltirdi. Ammo Xudo yahudiylarni tanlagani uchun, ularning ota–bobolari haqi hali ham ularni yaxshi ko‘radi.

²⁹Chunki Xudo bergan in’omlarini qaytarib olmaydi va O‘zi da’vat qilgan xalqidan voz kechmaydi.

³⁰Siz — g‘ayriyahudiylar ham bir vaqtlar itoatsiz edingiz, ammo endi Xudo sizlarga mehr–shafqat ko‘rsatdi. Bu yahudiylarning itoatsizligi natijasida sodir bo‘ldi.

³¹Endi esa yahudiylar itoatsiz bo‘lib qoldilar, ammo sizlarga ko‘rsatilgan mehr–shafqat tufayli ular ham mehr–shafqat topadilar.

³²Hammaga mehr ko‘rsatay, deb Xudo hammani itoatsizlikka tutqun qildi.

³³Xudoning donoligiyu bilimi naqadar boy va chuqurdir! Uning hukmlarini kim tushunib yetar?! Uning yo‘llarini kim sinchiklab tekshira olar?!

³⁴Kim Egamizning fikr–zikrini bila olar?! Kim Unga maslahat bera olar?!

³⁵Kim Xudoga shunday hadya berganki, Xudo undan qarzdor bo‘lsa?!

³⁶Hech kim! Chunki butun borliq Xudodan kelib chiqqan, Xudo orqali va Xudo uchun mavjuddir! Unga to abad shon–sharaflar bo‘lsin! Omin.