Read O‘zbek tilidagi Muqaddas Kitob, 2013 Rimliklarga 16 Bible Online

Rimliklarga 16 - O‘zbek tilidagi Muqaddas Kitob, 2013 bible

Rimliklarga 16

¹Men Kenxreya shahridagi jamoatda xizmat qilayotgan opamiz Fivani sizlarga tanishtiray.

²Sizlar Xudoning azizlarisiz, shuning uchun Rabbimiz Iso haqi Fivani mehmondo‘stlik bilan qabul qilinglar. U nimaga muhtoj bo‘lsa, yordam beringlar. Zero, u ko‘plarga, ayniqsa menga ko‘p yordam ko‘rsatgan.

³Priskilla va Akilga salom ayting, ular men qatori Iso Masihning xizmatidalar.

⁴Ular mening jonimni asrab qolish uchun o‘zlarini o‘lim xavfi ostiga qo‘ydilar. Nafaqat men, balki g‘ayriyahudiylardan iborat bo‘lgan jamoatlar ham ulardan minnatdorlar.

⁵Ularning uyida yig‘iladigan jamoatga ham salom aytib qo‘yinglar. Asiya o‘lkasidagilar orasida birinchi bo‘lib Masihga imon keltirgan aziz do‘stim Yepenetga salom ayting.

⁶Sizlar uchun ko‘p mehnat qilgan Maryamga salom aytinglar.

⁷Birodarimiz Andronik va opamiz Yuniyaga salom aytinglar. Ular men bilan birga hibsda bo‘lgan qondoshlarim. Bu obro‘li havoriylar mendan oldin Masihga imon keltirgan edilar.

⁸Rabbimiz Iso tufayli mening aziz do‘stim bo‘lib qolgan Ampliatga salom ayting.

⁹Masih xizmatida hamkorimiz bo‘lgan Urban va aziz do‘stim Staxisga salom ayting.

¹⁰Masihga sodiqligini isbotlagan Apellisga salom ayting. Aristovul xonadoniga ham salom aytib qo‘ying.

¹¹Qondoshim Hirodionga salom ayting. Narkis xonadonidagi Rabbimiz Isoga tegishli bo‘lganlarga ham salom aytib qo‘ying.

¹²Rabbimizga jonu dillari bilan xizmat qilayotgan opalarimiz Trifena bilan Trifosaga salom aytinglar. Rabbimizga astoydil xizmat qilayotgan aziz opamiz Persisaga ham salom ayting.

¹³Rabbimizning tanlangan xizmatkori Rufusga va menga onaday bo‘lib qolgan uning onasiga ham salom ayting.

¹⁴Asinkrit, Flegon, Hermes, Patrovas, Harmaslarga va ular bilan birga bo‘lgan birodarlarga salom aytinglar.

¹⁵Filalogus bilan Yuliyaga, Nirey va uning singlisiga, Olimpas hamda ular bilan birga bo‘lgan barcha aziz birodarlarga salom aytinglar.

¹⁶Bir–biringiz bilan o‘pishib ko‘rishinglar. Barcha Masih jamoatlari sizlarga salom yo‘llayaptilar.

¹⁷Sizlarga yolvoraman, olgan ta’limotingizdan aynitib, orangizga nizo va g‘ulg‘ula soladigan odamlardan ehtiyot bo‘linglar. Ulardan o‘zingizni olib qochinglar.

¹⁸Axir bunday odamlar Rabbimiz Iso Masihning emas, balki o‘z nafslarining qulidirlar. Ular shirin so‘zlaru xushomadgo‘ylik bilan sofdil insonlarni yo‘ldan ozdiradilar.

¹⁹Sizlarning Xudoga bo‘lgan itoatkorligingiz hammaga ma’lum. Men sizlardan juda xursandman, ammo yaxshilikka kelganda dono, yomonlikka kelganda esa norasida bo‘lishingizni istayman.

²⁰Tinchlik manbayi bo‘lgan Xudoning O‘zi tez orada shaytonni oyoqlaringiz ostida ezib tashlaydi. Rabbimiz Isoning inoyati sizlarga yor bo‘lsin.

²¹Mening hamkorim Timo‘tiy hamda qondoshlarim Lutsiy, Yason va Sosipatrlar sizlarga salom yo‘llayaptilar.

²²Bu maktubni qog‘ozga tushirayotgan, Rabbimizning quli men — Tertiydan ham sizlarga salom.

²³Butun jamoatga mehmondo‘stlik ko‘rsatadigan va hozirda mening mezbonim bo‘lgan Gayus sizlarga salom aytyapti. Shaharning xazinadori Yerast va birodarimiz Kvart ham salom yo‘llayaptilar.

²⁴[1] [25] Men bayon qilayotgan Xushxabarga, ya’ni Iso Masihning Xushxabariga binoan sizlarni imonda sobitqadam qilishga qodir bo‘lgan Xudoga hamdu sanolar bo‘lsin! Bu Xushxabar qadimdan sir tutilgan edi, endi esa u ochildi. [26] Ha, bu sir oshkor qilindi va payg‘ambarlarning bitiklari orqali, Xudoning amri bo‘yicha barcha xalqlarga ayon bo‘ldi, toki ular ham imon orqali Xudoga itoatkor bo‘lsinlar. [27] Donolik sohibi bo‘lgan yagona Xudoga Iso Masih orqali to abad shon–sharaflar bo‘lsin! Omin! [2]