Read O‘zbek tilidagi Muqaddas Kitob, 2013 Korinfliklarga 1chi 11 Bible Online

Korinfliklarga 1chi 11 - O‘zbek tilidagi Muqaddas Kitob, 2013 bible

Korinfliklarga 1chi 11

¹Men Masihdan o‘rnak olganimday, sizlar ham mendan o‘rnak olinglar.

²Doim meni eslab turganlaringiz va men sizlarga o‘rgatgan urf–odatlarga amal qilayotganlaringiz uchun sizlarni maqtasam arziydi.

³Lekin bilinglarki, ayol erkakdan yaratilgan, har bir erkakning hayot manbayi Masihdir, Masihning hayot manbayi esa Xudodir.

⁴Boshini yopib ibodat qilgan yoki boshini yopgan holda boshqalarga Xudoning so‘zini yetkazgan har bir erkak Masihni sharmanda qilgan bo‘ladi–ku!

⁵Ayol kishi boshiga hech narsa o‘ramay ibodat qilsa yoki Xudoning so‘zini gapirsa, erkaklarga isnod keltiradi, axir, boshini yopmaslik sochini qirib tashlash bilan barobar–ku!

⁶Agar ayol kishi boshiga biror narsa o‘rashni xohlamasa, mayli, sochini kesib tashlayversin. Agar kalta soch va qirilgan bosh ayol kishining sharmanda ekanligini ko‘rsatsa, ayollar boshlariga ro‘mol o‘rasinlar.

⁷Erkak kishi boshini yopmasligi kerak, chunki u Xudoning suratida yaratilgan va Uning ulug‘vorligini aks ettiradi. Ayol kishi esa erkak kishining ulug‘vorligini aks ettiradi.

⁸Axir, erkak ayoldan emas, balki ayol erkakdan yaratilgan.

⁹Erkak ayol kishi uchun emas, balki ayol erkak uchun yaratilgan.

¹⁰Sizlarga shuni aytmoqchiman: ayol kishi boshiga biror narsa o‘raydimi yoki yo‘qmi, bu haqda o‘zi qaror qilishga haqqi bor. Farishtalar sababli ham bu gap to‘g‘ri.

¹¹Holbuki, Rabbimiz Isoga tegishli bo‘lganlar orasida ayol kishi erkakdan mustaqil emas, erkak kishi esa ayoldan mustaqil emas.

¹²Ayol kishi erkakdan yaratilgani to‘g‘ri, lekin o‘sha paytdan beri har bir erkak ayol kishidan tug‘ilgan. Aslida esa butun borliqning manbayi Xudodir.

¹³O‘zingiz o‘ylab ko‘ringchi, ayol kishi boshini yopmay Xudoga ibodat qilishi to‘g‘rimi?

¹⁴Erkak kishining sochlari uzun bo‘lsa, bu erkak uchun sharmandalik ekanligini tabiatning o‘zi o‘rgatadi–ku!

¹⁵Xuddi shunga o‘xshab, ayol kishining sochi uzun bo‘lsa, bu ayol kishi uchun sharaf emasmi?! Axir, uzun soch boshiga ro‘mol o‘rash kerakligini ko‘rsatadi.

¹⁶Agar birortasi bu masaladagi yo‘l–yo‘riqlarim haqida bahslashmoqchi bo‘lsa, bilsinki, Xudoning jamoatlarida biz aytib o‘tganlardan boshqa urf–odatlar yo‘q.

¹⁷Quyidagi masalalarga kelganda esa sizlarni maqtay olmayman. Yig‘ilishlaringiz foydadan ko‘ra ko‘proq zarar keltirayotgan ekan.

¹⁸Avvalo, siz — imonlilar birga yig‘ilganingizda har xil guruhlarga bo‘linar ekansiz, bunga qisman bo‘lsa ham ishonaman.

¹⁹To‘g‘ri, kelishmovchiliklarning oldini olib bo‘lmaydi. Axir, kelishmovchilik bo‘lgandagina orangizda kim to‘g‘ri fikr qilayotgani bilinadi.

²⁰Sizlar birga yig‘ilganingizda hech ham Rabbimiz Isoni xotirlayotganga o‘xshamaysiz.

²¹Chunki hamma o‘zi olib kelgan ovqatini o‘zi tanovul qilayotgan ekan. Shunday qilib, ba’zilar och qolayotgan ekan, ba’zilar esa mast bo‘lib qolayotgan ekan.

²²Nahotki yeyish va ichish uchun uylaringiz bo‘lmasa?! Yoki Xudoning jamoatini pisand qilmay, yo‘qsillarni hijolatda qoldirmoqchimisizlar? Sizlarga yana nima aytayin? Sizlarni maqtaymi? Yo‘q, sizlarni bu xususda maqtamayman.

²³Men sizlarga bergan yo‘l–yo‘riqlarni Rabbimiz Isodan o‘rganganman. Rabbimiz Iso xoinona tarzda tutib berilgan kechada qo‘liga non olgandi–da,

²⁴shukrona duosini aytib, sindirgan va shunday degan edi: “Bu non Mening tanamni bildiradi. Tanam sizlar uchun fido bo‘ladi. Birgalikda non sindirib yeganingizda Meni xotirlanglar.”

²⁵Ovqatlanib bo‘lganlaridan keyin, Iso yana shukrona aytib, sharob quyilgan kosani oldi–da, shunday dedi: “Bu kosa Xudoning yangi ahdini bildiradi. Bu ahd sizlar uchun to‘kiladigan qonim evaziga kuchga kiradi. Birgalikda kosadan sharob ichganingizda Meni xotirlanglar.”

²⁶Har safar birgalikda shu tarzda non yeb, sharob ichar ekansiz, Rabbimiz kelguniga qadar Uning o‘limini e’lon qilayotgan bo‘lasizlar.

²⁷Shunday qilib, kimda–kim adabsiz ravishda bu nondan yesa yoki Rabbimizning kosasidan ichsa, Rabbimizning tanasi va qoniga qarshi gunoh qilgan bo‘ladi.

²⁸Shuning uchun har bir kishi o‘z–o‘zini tekshirib ko‘rsin, shundan so‘nggina nondan yesin va sharobdan ichsin.

²⁹Rabbimizning tanasini pisand qilmasdan yeb–ichgan odam o‘zini o‘zi mahkum qilgan bo‘ladi.

³⁰Mana shu sababdan ko‘plaringiz zaif va xastasizlar, hatto ba’zilar o‘lib ketgan.

³¹Agar o‘zimizni o‘zimiz yaxshilab tekshirganimizda edi, mahkum bo‘lmas edik.

³²Dunyo bilan birga mahkum bo‘lmasligimiz uchun Rabbimiz Iso bizni hukm qilib, adabimizni beryapti.

³³Shuning uchun, birodarlarim, Rabbimizni xotirlash niyatida birgalikda yeb–ichish uchun yig‘ilganingizda, bir–biringizni kutib turinglar.

³⁴Agar biror kishi och bo‘lsa, o‘z uyida ovqat yeb kelsin. Shunda yig‘ilishga kelganingizda mahkum bo‘lishingizga sabab bo‘lmaydi. Qolgan masalalar haqida oldingizga borganimdan keyin yo‘l–yo‘riq ko‘rsataman.