Read O‘zbek tilidagi Muqaddas Kitob, 2013 Korinfliklarga 1chi 12 Bible Online

Korinfliklarga 1chi 12 - O‘zbek tilidagi Muqaddas Kitob, 2013 bible

Korinfliklarga 1chi 12

¹Ey birodarlarim, endi Muqaddas Ruh beradigan in’omlar masalasiga kelsak, bu haqida to‘liq tushunchaga ega bo‘lishingizni xohlayman.

²Esingizdami, sizlar Xudosiz bo‘lgan paytlaringizda yo‘ldan ozib, gung butlarga sajda qilar edingiz.

³Shuning uchun quyidagilarni bilishingizni xohlayman. Xudoning Ruhidan ilhom olayotgan hech kim Isoni la’natlamaydi, shuningdek, hech kim Muqaddas Ruhning ilhomisiz Isoni Rabbim, deb ayta olmaydi.

⁴Ruh beradigan in’omlar har xildir, ammo Ruh birdir.

⁵Xizmat qilish yo‘llari har xildir, Rabbimiz Iso esa birdir.

⁶To‘g‘ri, xizmatlar har xildir, lekin odamlarning hayotida ularni yuzaga keltirayotgan Xudo birdir.

⁷Umumiy manfaat uchun Muqaddas Ruh har kimda o‘ziga xos ravishda namoyon bo‘ladi.

⁸Bir odamga Ruh orqali donolik bilan gapirish qobiliyati beriladi, boshqa birovga esa xuddi shu Ruh orqali ilm–ma’rifatga to‘la so‘zlarni gapirish qobiliyati beriladi.

⁹O‘sha Ruh orqali kimgadir kuchli bir imon beriladi, boshqa birovga esa shifo berish in’omi beriladi.

¹⁰Ba’zilarga mo‘jizalar ko‘rsatish qobiliyati, boshqalarga Xudoning so‘zini yetkazish in’omi berilgan. Yana boshqalarga esa ruhlarning farqiga borish in’omi berilgan. Kimgadir noma’lum tillarda gapirish in’omi berilgan bo‘lsa, boshqalarga bu tillarni ta’bir qilish in’omi berilgan.

¹¹Bularning hammasini Muqaddas Ruh bajo qiladi. Har bir insonga Ruhning O‘zi loyiq ko‘rgan in’omni ato qiladi.

¹²Tana bir bo‘lsa–da, uning a’zolari esa ko‘p. Xuddi shuningdek, tana a’zolari ko‘p bo‘lsa–da, ularning hammasi bir tanani tashkil qiladi. Masihning tanasi, ya’ni jamoat ham shundaydir.

¹³Axir, biz hammamiz — yahudiylaru yunonlar, qullaru ozod bo‘lganlar, bir tana bo‘lishimiz uchun bir Muqaddas Ruhga cho‘mdirildik. Hammamiz o‘sha bir Ruhga to‘lib–toshganmiz.

¹⁴Zotan badan bir a’zodan emas, balki ko‘p a’zolardan iborat.

¹⁵Oyoq: “Men qo‘l emasman, shuning uchun tanaga tegishli emasman”, degani bilan tanaga tegishli bo‘lmay qoladimi?!

¹⁶Quloq ham: “Men ko‘z emasman, shuning uchun tanaga tegishli emasman”, degani bilan tanaga tegishli bo‘lmay qoladimi?!

¹⁷Axir, butun tana ko‘z bo‘lsa, qanaqa qilib eshitadi? Agar butun tana quloq bo‘lsa, qanaqa qilib hidlay oladi?

¹⁸Axir, Xudo tana a’zolarining har birini O‘zi xohlagan joyiga qo‘ygan.

¹⁹Agar ularning hammasi birgina a’zo bo‘lganda, tana bo‘larmidi?!

²⁰Shunday qilib, tana a’zolari ko‘p, lekin tana birdir.

²¹Ko‘z qo‘lga: “Sen menga kerak emassan”, deb ayta olmaydi, bosh ham oyoqlarga: “Sizlar menga kerak emassizlar”, deya olmaydi–ku!

²²Aksincha, ojiz tuyulgan tana a’zolari eng kerakli a’zolardir.

²³Biz tanamizning uyatli hisoblangan a’zolariga e’tibor berib, ularni yopib yuramiz. Ko‘rimsiz tuyulgan tana a’zolarimizga diqqat–e’tibor qilamiz.

²⁴Uyatli bo‘lmagan tana a’zolarimizga bunday e’tibor berishimizning hojati yo‘q. Xudo tanamizni shunday yaratganki, hurmat–e’tiborsiz a’zolarga ko‘proq izzat–e’tibor beriladi.

²⁵Shunday qilib, tana a’zolarida orasida kelishmovchilik bo‘lmaydi, balki barcha a’zolar bir–biriga g‘amxo‘rlik qiladi.

²⁶Agar bir a’zo azob cheksa, qolgan barcha tana a’zolari u bilan birga azob chekadi. Agar bir a’zo yuksalsa, qolgan barcha a’zolar u bilan birga sevinadi.

²⁷Endi sizlar Masihning tanasisizlar, har biringiz tananing alohida bir a’zosisiz.

²⁸Shu tariqa, Xudo imonlilar jamoatiga birinchidan havoriylarni, ikkinchidan payg‘ambarlarni, uchinchidan muallimlarni tayinlab berdi. Keyin ba’zilarga mo‘jiza ko‘rsatish qobiliyatini, boshqalarga esa shifo berish in’omini, yana boshqalarga yordam berish, boshqarish, noma’lum tillarda gapirish qobiliyatlarini ato qildi.

²⁹Hamma havoriymi?! Hamma ham Xudoning so‘zlarini yetkaza oladimi?! Hamma ham muallimmi?! Hamma mo‘jiza ko‘rsatadimi?!

³⁰Hammada shifo berish in’omi bormi?! Hamma ham noma’lum tillarda gapirish qobiliyatiga egami?! Hamma ham noma’lum tillarda aytilganlarni talqin qila oladimi?!

³¹Sizlar ulug‘roq in’omlarga ega bo‘lishga intilinglar. Endi sizlarga eng oliy yo‘lni ko‘rsataman.