Read O‘zbek tilidagi Muqaddas Kitob, 2013 Korinfliklarga 1chi 13 Bible Online

Korinfliklarga 1chi 13 - O‘zbek tilidagi Muqaddas Kitob, 2013 bible

Korinfliklarga 1chi 13

¹Agar men insonlarning va farishtalarning tillarida gapirsam–u, lekin sevgim bo‘lmasa, jaranglaydigan mis cholg‘u, yangraydigan zang bo‘lib qolaman.

²Agar menda Xudoning so‘zini yetkazish in’omi bo‘lsa, butun sirlardan voqif bo‘lib, har qanday bilimga ega bo‘lsam, agar tog‘larni ko‘chiradigan imonga ega bo‘lsam–u, lekin sevgim bo‘lmasa, men hech narsaga arzimas inson bo‘lib qolaman.

³Bor mulkimni muhtojlarga taqsimlab bersam, menga sharaf keltirsin deb, hatto qiynoqlarga rozi bo‘lsam–da, lekin sevgim bo‘lmasa, bularning menga foydasi yo‘q.

⁴Sevgi sabr–toqatli va mehribondir. Sevgi hasad qilmaydi, maqtanmaydi, kekkaymaydi.

⁵Sevgi odobsizlik qilmaydi, xudbinlik qilmaydi, achchiqlanmaydi, kek saqlamaydi.

⁶Sevgi nohaqlikdan sevinmaydi, aksincha, haqiqat qaror topganda shodlanadi.

⁷Sevgi har narsani ko‘taradi, hech qachon ishonchini yo‘qotmaydi, har sharoitda umid saqlaydi, har narsaga toqat qiladi.

⁸Xudoning so‘zini yetkazish in’omi ham, noma’lum tillarda gapirish in’omi ham yo‘q bo‘ladi, bilim ham bartaraf bo‘ladi. Sevgi esa aslo ado bo‘lmaydi.

⁹Mana, hozir bilimimiz to‘liq emas, Xudoning so‘zini yetkazish qobiliyatimiz ham cheklangan.

¹⁰Kamolot zohir bo‘lganda esa to‘liqsiz narsalar bartaraf bo‘ladi.

¹¹Bolalik paytlarimda men bola kabi gapirardim, bola kabi fikr qilardim, bola kabi mulohaza qilar edim. Voyaga yetgach, bolalikni tashladim.

¹²Shu singari, biz hozir xira oyna orqali ko‘rganday bo‘lyapmiz, ammo vaqti kelganda aniq ko‘ramiz. Hozirgi bilganlarim to‘liq emas. O‘sha paytda esa Xudo meni to‘liq bilgani kabi, men ham hamma narsani to‘liq tushunaman.

¹³Mana bu uch narsa bor: ishonch, umid va sevgi. Sevgi esa eng a’losidir.