Read O‘zbek tilidagi Muqaddas Kitob, 2013 Korinfliklarga 1chi 15 Bible Online

Korinfliklarga 1chi 15 - O‘zbek tilidagi Muqaddas Kitob, 2013 bible

Korinfliklarga 1chi 15

¹Birodarlarim, men o‘zim sizlarga yetkazgan Xushxabarning mohiyatini yana bir bor eslatib o‘tmoqchiman. Sizlar bu Xushxabarni qabul qilgansiz, u imoningizning asosidir.

²O‘sha Xushxabar orqali qutqarilasiz, ammo sizlar men aytgan o‘sha Xushxabar orqali yetishgan imoningizda mahkam turishingiz kerak, aks holda bekorga ishongan bo‘lasizlar.

³Menga berilgan eng muhim ta’limotni sizlarga yetkazdim. Bu ta’limot quyidagichadir: Muqaddas Bitiklarga muvofiq, Masih gunohlarimiz uchun o‘lgan.

⁴Keyin U dafn qilindi, uchinchi kuni esa tirildi. Bularning hammasi Muqaddas Bitiklarga muvofiq sodir bo‘ldi.

⁵Avval U Butrusga, so‘ngra o‘n ikki shogirdiga ko‘rindi.

⁶Undan keyin bir vaqtning o‘zida besh yuzdan ko‘proq birodarlarga ko‘rindi. Ularning aksariyati hozirga qadar tirik, ba’zilari esa dunyodan ko‘z yumib ketganlar.

⁷Undan so‘ng Masih Yoqubga va qolgan barcha havoriylarga ko‘rindi.

⁸Va nihoyat, menga ham ko‘rindi, men rivojlanmay qolgan bir homiladay edim.

⁹Axir, havoriylarning eng arzimaydiganiman, havoriy deb atalishga ham loyiq emasman, chunki Xudoning jamoatini quvg‘in qilardim.

¹⁰Ammo Xudoning inoyati tufayli endi havoriyman. Uning menga ko‘rsatgan inoyati zoye ketmadi, zero, men havoriylarning hammasidan ham ko‘proq mehnat qildim. Lekin aslida mehnat qilgan men emas, balki Xudoning inoyatidir.

¹¹Nima bo‘lsa ham, Xushxabarni sizlar mendan eshitgansizlarmi yoki boshqalardanmi, farqi yo‘q, chunki biz bir Xushxabarni va’z qilamiz, sizlar esa unga ishonasiz.

¹²Masih o‘likdan tirilgan, deb va’z qilinayotgan ekan, qanday qilib ba’zilaringiz, o‘likdan tirilish, degan narsa yo‘q, deb aytyapsizlar?!

¹³Axir, o‘likdan tirilish bo‘lmasa, Masih ham tirilmagan ekan–da!

¹⁴Masih tirilmagan bo‘lsa, Xushxabarni va’z qilishimiz bekor, sizlarning imoningiz ham bekor.

¹⁵Agar rostdan ham o‘liklar tirilmasa va Masihni Xudo tiriltirmagan bo‘lsa, bunday holda, biz Xudo haqida yolg‘on shohidlik bergan bo‘lamiz, chunki biz: “Xudo Masihni tiriltirdi”, deb shahodat berib yuribmiz.

¹⁶Axir, o‘liklar tirilmas ekan, Masih ham tirilmagan bo‘ladi.

¹⁷Agar Masih tirilmagan bo‘lsa, sizlarning imoningiz behuda, sizlar hali ham gunohga botganingizcha yuribsizlar.

¹⁸Shunday bo‘lsa, Masihga ishongan holda hayotdan ko‘z yumganlar butunlay halok bo‘lib ketibdilar–da!

¹⁹Agar biz yolg‘iz bu hayot uchun Masihga umid bog‘lagan bo‘lsak, biz eng baxtsiz insonlar ekanmiz.

²⁰Vaholanki, Masih rostdan ham tirildi! U birinchi bo‘lib tirildi, shu tariqa o‘likdan tiriladiganlarning orasida hosilning ilk samarasiday bo‘ldi.

²¹O‘lim bir inson orqali dunyoga kirdi. Shunga o‘xshab, o‘liklarning tirilishi ham bir inson orqali sodir bo‘ladi.

²²Axir, bu dunyoga o‘lim Odam Ato tufayli kirib keldi, endi Iso Masih orqali hamma tiriladi.

²³Hamma narsa o‘z navbati bilan sodir bo‘ladi: mana, Masih birinchi bo‘lib tirildi, Masih kelganda esa Unga tegishli bo‘lganlar tiriladi.

²⁴Shundan so‘ng, Masih har qanday hokimiyatni, hukmronlik va qudratni barbod qilib, saltanatni Samoviy Ota — Xudoga topshirganda oxirat bo‘ladi.

²⁵Masihning hamma dushmanlari Uning oyoqlari ostiga poyandoz qilinmaguncha, U hukmronlik qilishi kerak.

²⁶Shunda oxirgi dushman — o‘lim ham barham topadi.

²⁷Axir, Xudo hamma narsani Masihga tobe qildirib, Uning oyoqlari ostiga tashlagan. Garchi Muqaddas Bitiklarda: “Butun borliq Unga tobe bo‘ldi”, deb yozilgan bo‘lsa–da, borliqni Unga tobe qilgan Xudo bundan istisnodir.

²⁸Hamma narsa Masihga tobe qildirilgandan keyin, O‘g‘il ham O‘ziga hamma narsani tobe qildirgan Xudoga tobe bo‘ladi, toki Xudo borliqning ustidan butunlay hukmron bo‘lsin.

²⁹Ba’zilaringiz o‘lganlar uchun suvga cho‘mdirilayotgan ekansiz. O‘liklar tirilmas ekan, ularning o‘rniga cho‘mdirilishning qanday foydasi bor?

³⁰Xo‘sh, nima uchun bizlar har daqiqa o‘z hayotimizni xavf–xatar ostiga qo‘yyapmiz?

³¹Har kuni o‘limga ro‘baro bo‘layotganim rost! Birodarlarim, Rabbimiz Iso Masih sizlarning hayotingizda qilayotgan ishlaridan faxrlanayotganim chin bo‘lganiday, aytayotgan gaplarimda ham biror yolg‘on yo‘q.

³²Agar faqatgina bu dunyoga umid bog‘lagan bo‘lsam, nima uchun Efes shahrida hayotimni xavf ostiga qo‘ydim?! Agar o‘liklar tirilmas ekan, unda “kelinglar, yeb–ichib qolaylik, erta–indin o‘lib ketamiz–ku” deyish o‘rinli bo‘lmaydimi?!

³³Lekin adashmanglar, axir, “yomon ulfatlar yaxshi axloqni buzadi”, deyishadi–ku!

³⁴Ko‘zlaringizni ochib, o‘zingizga kelinglar! Bas endi, gunoh qilavermanglar. Ko‘rinib turibdiki, ba’zilaringiz Xudoni bilmaysizlar. Sizlarni uyaltiray, deb bularni aytyapman.

³⁵Ehtimol, biror kishi: “O‘liklar qanday qilib tirilarkan? Ularning tanalari qanaqa bo‘larkan?” deb so‘rar.

³⁶Qanday ahmoqona savol–a bu! Axir, ekilgan urug‘ o‘lmasa, o‘simlik o‘sib chiqmaydi–ku!

³⁷Bug‘doy bo‘ladimi yoki boshqa biror narsami, ekin ekkaningda, o‘sib chiqadigan o‘simlikni emas, uning urug‘ini ekasan–ku!

³⁸Xudo uruqqa O‘zi istagan bir jismni bag‘ishlaydi, har bir urug‘dan alohida bir jismni hosil qiladi.

³⁹Ko‘rib turibmizki, jonzotlarning ham tanalari har xil, insonlarniki boshqacha, hayvonlarniki boshqacha, qushlarniki boshqacha, baliqlarniki boshqacha.

⁴⁰Samoviy va dunyoviy jismlar ham bor. Lekin samoviy jismlarning ko‘rki boshqa, dunyoviylarniki boshqa.

⁴¹Quyoshning ko‘rki boshqa, oyning ko‘rki boshqa hamda yulduzlarning ko‘rki boshqa. Axir, yulduzlar ham o‘z ko‘rkiga yarasha bir–biridan farq qiladi.

⁴²O‘liklarning tirilish jarayoni ham quyidagiga o‘xshaydi: ekilgan urug‘dan o‘simlik o‘sib chiqqanday, o‘ladigan tanamiz o‘lmaydigan bo‘lib tiriladi.

⁴³Hozirgi ojiz va xor bo‘lgan tanamiz, qudratu ulug‘vorlikka to‘la ravishda tiriladi.

⁴⁴Hozirgi tanamiz moddiy bir jism bo‘lsa, tiriladigan tanamiz ruhiy bir tana bo‘ladi. Axir, moddiy tana bor ekan, ruhiy tana ham bor–da!

⁴⁵Muqaddas Bitiklarda yozilgani bo‘yicha: “Birinchi odam — Odam Ato tirik jon bo‘ldi”. Oxirgi Odam Ato, ya’ni Iso Masih esa hayotbaxsh ruh bo‘ldi.

⁴⁶Mana shundan ko‘rinib turibdiki, ruhiy tana emas, moddiy tana birinchi kelgan. Moddiy tana o‘tib ketgandan keyingina, ruhiy tana keladi.

⁴⁷Birinchi odamning tanasi moddiy jismdir, u tuproqdan yaratilgan, ikkinchi Odam, ya’ni Masih esa samoviydir.

⁴⁸Tuproqdan yaratilgan ilk odam qanday bo‘lsa, qolgan hamma odamlar ham shundaydir. Samoviy Odam, ya’ni Masih qanday bo‘lsa, samodagilar ham xuddi Unga o‘xshaydilar.

⁴⁹Biz tuproqdan yaratilgan odamga o‘xshar ekanmiz, bir kun kelib samoviy Odamga ham o‘xshagan bo‘lamiz.

⁵⁰Ey, birodarlar! Sizlarga quyidagilarni aytmoqchiman. Qon va etdan iborat bo‘lgan tanalarimiz Xudoning Shohligidan bahramand bo‘la olmaydi. Bu foniy tana mangu hayotga ega bo‘la olmaydi.

⁵¹Mana, men sizlarga bir sirni bildirmoqchiman: biz hammamiz ham o‘lmaymiz, ammo hammamiz o‘zgaramiz.

⁵²To‘satdan, ko‘z ochib yumguncha, oxirzamon karnayi chalinganda o‘zgaramiz. Ha, karnay chalinadi va shu onda marhumlar hech o‘lmaydigan bo‘lib tiriladilar. Shunda biz ham o‘zgaramiz.

⁵³Chunki bizning o‘ladigan tanamiz o‘lmaydigan tanaga, foniy tanamiz mangu tanaga aylanishi kerak.

⁵⁴O‘ladigan tanamiz o‘lmaydigan tanaga, bu foniy tanamiz mangu tanaga aylanganda, Muqaddas Bitiklarda yozilgan quyidagi oyatlar amalga oshadi: “O‘lim yengilib, yo‘q bo‘ldi.

⁵⁵Ey, o‘lim, sening nishing qayerda?! Ey, o‘lim, sening zafaring qayerda?!”

⁵⁶O‘limning nishi gunohdir. Gunohning quvvati esa qonundan kelib chiqdi.

⁵⁷Xudoga shukrlar bo‘lsin! U Rabbimiz Iso Masih orqali bizga g‘alaba ato qilgan.

⁵⁸Shuning uchun, ey, aziz birodarlarim, hech ikkilanmay, imoningizda mahkam turinglar. Hamisha Rabbimiz Isoga xizmat qilishga bag‘ishlanib, yanada g‘ayratli bo‘linglar. Axir, Rabbimiz yo‘lida qilgan mehnatingiz samarasiz qolmasligini bilasizlar–ku!