Read O‘zbek tilidagi Muqaddas Kitob, 2013 Korinfliklarga 1chi 16 Bible Online

Korinfliklarga 1chi 16 - O‘zbek tilidagi Muqaddas Kitob, 2013 bible

Korinfliklarga 1chi 16

¹Endi Xudoimizning Quddusdagi azizlariga moddiy mablag‘ to‘plash masalasiga kelsak, sizlar ham Galatiya hududidagi jamoatlarga bergan yo‘l–yo‘riqlarimga amal qilinglar.

²Har haftaning boshida har bir odam qo‘lidan kelganicha bir miqdor pulni olib qo‘ysin, toki oldingizga borganimda pul yig‘ishga hojat bo‘lmasin.

³Borganimdan keyin, ehsonlaringizni imonlilarga topshirsin, deb o‘zingiz munosib ko‘rgan kishilarni Quddusga jo‘nataman. Ularning har birini tanishtirib, maktub yozib beraman.

⁴Agar borishga imkon bo‘lsa, o‘zim ham ular bilan birga boraman.

⁵Makedoniyadan o‘tish niyatim bor. Shundan keyin sizlarning oldingizga boraman.

⁶Sizlar bilan birmuncha vaqt bo‘laman, deb o‘ylayman, balki hatto qishni ham sizlar bilan o‘tkazarman. Undan keyin qayerga bormoqchi bo‘lsam ham, sizlarning yordamingiz bilan safarimni yana davom ettiraman.

⁷Axir, sizlarni faqatgina yo‘l–yo‘lakay ko‘rishni istamayman, Rabbimiz Iso xohlasa, sizlar bilan ko‘proq vaqt o‘tkazaman, deb umid qilaman.

⁸Lekin Hosil bayramiga qadar Efes shahrida qolaman.

⁹Chunki bu yerda menga qarshi chiqqanlar ko‘p bo‘lishiga qaramay, ta’sirchan faoliyat ko‘rsatishim uchun yo‘l ochildi.

¹⁰Timo‘tiy oldingizga borganda unga g‘amxo‘rlik qilinglar, u orangizda xotirjam yursin, chunki u ham menga o‘xshab Rabbimiz Iso xizmati bilan mashg‘ul.

¹¹Hech kim unga past nazar bilan qaramasin. U mening oldimga qaytib kelayotganda, uni eson–omon kuzatib yuboringlar. Uning birodarlar bilan birga kelishini kutib turibman.

¹²Birodarimiz Apollosga kelsak, uni birodarlarga qo‘shilib sizlarning oldingizga borishga ko‘p undadim, lekin uning hozir hech borgisi yo‘q. Imkoni bo‘lsa keyinroq borar ekan.

¹³Hushyor bo‘linglar, imonda mahkam turib, jasoratli va kuchli bo‘linglar.

¹⁴Hamma narsani mehr–muhabbat bilan qilinglar.

¹⁵Birodarlar, Stefanning xonadonini bilasizlar. Ular Axaya hududida birinchi bo‘lib Masihga imon keltirganlar va o‘zlarini Xudoning aziz xalqiga xizmat qilishga bag‘ishlaganlar. Sizlardan bir iltimosim bor:

¹⁶Bunday insonlarni va ular bilan birga berilib xizmat qilayotganlarni hurmat qilib, ularning aytganlarini qilinglar.

¹⁷Stefan, Fortunat va Axaikning kelganidan xursand bo‘ldim, ular sizlarning yo‘qligingizni bildirmadi.

¹⁸Ular sizlarning ruhingizni ko‘targandek, mening ham ruhimni ko‘tardilar. Bunday insonlarni qadrlanglar.

¹⁹Asiya hududidagi jamoatlar sizlarga salom yo‘llayaptilar. Akil bilan Priskilla va ularning uyida yig‘iladigan jamoat ham sizlarga — Rabbimiz Isoning yo‘lidagi hamkorlariga otashin salom aytyapti.

²⁰Hamma birodarlarimiz salom aytyaptilar. Bir–biringiz bilan o‘pishib ko‘rishinglar.

²¹Men, Pavlus mana shu salomni o‘z qo‘lim bilan yozyapman.

²²Kimki Rabbimiz Isoni yaxshi ko‘rmasa, u la’nati bo‘lsin! Ey, Rabbimiz, kelgin!

²³Rabbimiz Isoning inoyati sizlarga yor bo‘lsin.

²⁴Sizlarni yaxshi ko‘raman, chunki hammamiz Iso Masihga tegishlimiz.