Read O‘zbek tilidagi Muqaddas Kitob, 2013 Korinfliklarga 1chi 2 Bible Online

Korinfliklarga 1chi 2 - O‘zbek tilidagi Muqaddas Kitob, 2013 bible

Korinfliklarga 1chi 2

¹Ey birodarlar, men sizlarga Xudoning sirli rejasini e’lon qilishga borganimda, so‘zamollik va insoniy donolik bilan gapirmadim.

²Orangizda bo‘lganimda, Iso Masih va Uning xochga mixlanganidan boshqa hech narsa haqida gapirmaslikka qaror qildim.

³Oldingizga zaifligu qo‘rquv hissi bilan titrab bordim.

⁴Men sizlarga Xushxabar aytib, va’z qilganimda, donolik qilib ishontirishga urinmadim, balki Xudoning Ruhi va qudratiga asoslandim.

⁵Toki sizlarning imoningiz inson donoligiga emas, balki Xudoning qudratiga asoslansin.

⁶Biz yetkazgan xabarni ruhan yetuk insonlar hikmatu donolik, deb tan oladilar. Ammo bizning donoligimiz bu dunyoga yoki bu dunyoning o‘tib ketadigan hukmronlariga munosib bo‘lgan donolik emas.

⁷Biz Xudoning pinhon tutilgan sirli donoligi haqida gapiramiz. Bu donoligi bilan Xudo dunyo bino bo‘lishidan avvalroq biz uchun najot rejasini tayyorlab qo‘yilgan edi, toki biz Xudoning ulug‘vorligidan bahramand bo‘laylik.

⁸Bu dunyoning hukmronlari Xudoning donoligini tushunmadilar. Tushunganlarida edi, ulug‘vor Rabbimiz Isoni xochga mixlamagan bo‘lardilar.

⁹Biz Muqaddas Bitiklarda yozilgan sirli reja haqida gapiryapmiz: “Xudoni yaxshi ko‘rganlar uchun Xudoning O‘zi qanday ajoyibotlarni tayyorlab qo‘yganini hech bir ko‘z ko‘rmagan, hech bir quloq eshitmagan, ular hech kimning xayoliga kelmagan.”

¹⁰Bizlarga esa Xudo bularni O‘zining Ruhi orqali oshkor qildi. Chunki Muqaddas Ruh hamma narsadan, hatto Xudoning chuqur o‘y–fikrlaridan ham ogohdir.

¹¹Insonning o‘y–fikrlarini uning ichidagi o‘z ruhidan boshqa yana kim biladi?! Xuddi shu singari, Xudoning o‘y–fikrlarini Xudoning Ruhidan boshqa hech kim bilmaydi.

¹²Biz Xudoning Ruhini qabul qildik, endi dunyoviy odamlar kabi o‘y–fikr qilmaymiz. Shuning uchun Xudo bizga nima ato qilganini aniq tushuna olamiz.

¹³Biz bular haqida gapirganimizda insoniy donolik bilan gapirmaymiz, balki Muqaddas Ruh o‘rgatayotgan so‘zlar bilan ruhiy haqiqatni talqin qilamiz.

¹⁴Qalbida Xudoning Ruhi bo‘lmagan insonlar Xudoning Ruhi o‘rgatganlarni rad qiladilar. Ular uchun bu haqiqatlar tentaklikday ko‘rinadi, bu haqiqatlarni ular tushuna olmaydilar. Zero, bu haqiqatlarni faqatgina Xudoning Ruhi yordami bilan tushunsa bo‘ladi.

¹⁵Qalbida Xudoning Ruhi bo‘lgan inson hamma narsaga baho bera oladi, ammo boshqalar u odamga baho berishga ojiz.

¹⁶“Axir, kim Rabbimizning fikr–zikrini anglab yetibdiki, Unga yo‘l–yo‘riq ko‘rsatsa?!” Biz esa Masihday fikr–zikr qila olamiz.