Read O‘zbek tilidagi Muqaddas Kitob, 2013 Korinfliklarga 1chi 3 Bible Online

Korinfliklarga 1chi 3 - O‘zbek tilidagi Muqaddas Kitob, 2013 bible

Korinfliklarga 1chi 3

¹Ey birodarlar, sizlarga ruhan yetuk insonlarga gapirganday emas, balki bu dunyoga tegishli odamlarga gapirganday gapirdim. Yana sizlarga endigina Masihga ishongan, imonda go‘dakday bo‘lgan insonlarga so‘zlaganday so‘zladim.

²Sizlarga bergan ta’limotim milkka botadigan yegulikday emas, balki chaqaloqlarga kerak bo‘lgan sutday edi, chunki sizlar kuchliroq ta’limotga tayyor emas edingiz. Hozir ham tayyor emassiz,

³chunki bu dunyo hali ham sizlarga o‘z ta’sirini ko‘rsatyapti. Orangizda janjalkashlik va kelishmovchiliklar bor ekan, bu sizlarning hali ham bashariy tabiatingiz ta’sirida, insoniy fikrlab yashayotganingizni ko‘rsatmaydimi?!

⁴Axir, ba’zilaringiz: “Men Pavlusning shogirdiman”, boshqalaringiz esa: “Men Apollosning shogirdiman”, desangiz, sizlar insoniy fikrlab yashayotgan bo‘lmaysizmi?

⁵Axir, Pavlus kim? Apollos kim? Ular Xudoning xizmatkorlaridir, ular orqali sizlar imonga kelgansizlar. Har birimiz Egamiz bergan vazifani bajaramiz.

⁶Men urug‘ ekdim, Apollos sug‘ordi, lekin Xudo parvarishlab, o‘stirdi.

⁷Kim ekkani yoki sug‘organi muhim emas, eng muhimi o‘stiradigan Xudodir.

⁸Ekuvchining ham, sug‘oruvchining ham maqsadi bir va ularning har biri o‘z mehnatiga yarasha mukofot oladi.

⁹Biz Xudoning xizmatidagi hamkorlarmiz, sizlar esa Xudoning dalasisizlar. Ayni payda sizlar Xudoning imorati hamsizlar.

¹⁰Xudoning marhamati bilan men mohir bir me’morday imoratning poydevorini qo‘ydim. Endi esa boshqalar uning ustiga qurilish qilyaptilar. Har kim qanday qilib qurayotganiga diqqat qilsin.

¹¹Zero, hech kim mavjud bo‘lgan poydevordan boshqa poydevor qo‘ya olmaydi. Bu poydevor Iso Masihdir.

¹²Bu poydevor ustiga kimdir oltindan, kimdir kumush yoki qimmatli toshlardan, yana kimdir esa yog‘ochu xashak yoki poxoldan imorat qurmoqda.

¹³Qiyomat kunida har kimning ishi qanday ekanligi ayon bo‘ladi. O‘sha kuni hammaning ishi olovda sinaladi.

¹⁴Kimning qilgan ishi olovga bardosh bersa, o‘sha kishi mukofot oladi.

¹⁵Kimning ishi yonib ketsa, u talafot ko‘radi. O‘zi omon qoladi–yu, ammo olovdan qutulib chiqqanday bo‘ladi.

¹⁶Nahotki bilmasangiz?! Sizlar Xudoning ma’badisizlar, Xudoning Ruhi orangizda maskan qilgan.

¹⁷Kimki Xudoning ma’badini buzsa, Xudo uni halok qiladi. Zero, Xudoning ma’badi muqaddasdir, bu ma’bad esa sizlarsiz.

¹⁸Hech kim o‘zini o‘zi aldamasin. Orangizda kimdir o‘zini bu dunyoda dono, deb bilsa, o‘zining aqlsiz ekanligini tan olsin, shundagina u haqiqatdan ham dono bo‘ladi.

¹⁹Chunki bu dunyoning donoligi Xudoning nazarida aqlsizlikdir. Muqaddas Bitiklarda quyidagicha yozilgan–ku: “U donolarni o‘zlarining ayyorliklari orqali tutib oladi.”

²⁰Yana shunday yozilgan: “Egamiz donolarning niyatini anglaydi, Niyatlarining behudaligini U biladi.”

²¹Shuning uchun orangizda hech kim boshqa bir insonning ta’limotiga rioya qilayotgani bilan maqtanmasin. Axir, hammasi sizlarga tegishli–ku:

²²Pavlus, Apollos va Butrus, dunyo ham, hayot va o‘lim ham, hozir va kelajak ham — bularning hammasi sizniki.

²³Sizlar esa Masihniki, Masih esa Xudonikidir.