Read O‘zbek tilidagi Muqaddas Kitob, 2013 Korinfliklarga 1chi 7 Bible Online

Korinfliklarga 1chi 7 - O‘zbek tilidagi Muqaddas Kitob, 2013 bible

Korinfliklarga 1chi 7

¹Endi sizlar menga yozganlaringizga kelaylik. Orangizda ba’zilar: “Er xotini bilan qovushmasin”, deb aytayotgan ekan.

²Lekin jinsiy axloqsizlikka yo‘l qo‘ymaslik uchun har bir kishi o‘z xotini bilan, har bir ayol esa o‘z eri bilan qovushishi kerak.

³Er o‘z xotiniga nisbatan va xotin o‘z eriga nisbatan er-xotinlik vazifasini bajo keltirsin.

⁴Xotinning badani ustidan xotin emas, balki eri hokimlik qiladi. Xuddi shu singari, erning badani ustidan er emas, balki xotini hokimlik qiladi.

⁵Bir–biringizdan bosh tortmanglar. Faqatgina o‘zaro kelishgan holda, o‘zingizni ibodatga bag‘ishlash uchungina jinsiy aloqadan o‘zingizni tutib turing. Bundan so‘ng yana qovushinglar, toki o‘zingizni tiya olmaganingizdan foydalanib, shayton sizlarni vasvasaga solmasin.

⁶Men buni buyruq tariqasida emas, nasihat tariqasida aytyapman.

⁷Qaniydi, hamma menga o‘xshab so‘qqabosh bo‘lsa! Ammo har bir odamda Xudodan berilgan in’om bor, biriniki bu bo‘lsa, boshqasiniki udir.

⁸Beva ayollaru xotini o‘lgan erkaklarga shunday deyman: “Men kabi bo‘lsangiz, sizlar uchun yaxshidir.”

⁹Ammo ular o‘zlarini tiya olmasalar, uylansinlar, erga tegsinlar. Chunki shahvoniy ishq bilan yonishdan ko‘ra uylanish, erga tegish yaxshiroqdir.

¹⁰Quyidagi amr esa uylangan va erga tekkanlarga berilgan. U mendan emas, Rabbimiz Isodandir: xotin eri bilan ajrashmasin.

¹¹Ajrashgan bo‘lsa, boshqa erga tegmasin yoki o‘z eri bilan yarashsin. Er ham o‘z xotini bilan ajrashmasin.

¹²Eri yoki xotini imonli bo‘lmaganlarga esa shunday deb aytaman. Bular Rabbimizning emas, mening so‘zlarimdir: “Birorta imonli erkakning xotini imonsiz bo‘lsa–yu, ammo eri bilan yashashga rozi bo‘lsa, er xotini bilan ajrashmasin.

¹³Shuningdek, imonli ayolning eri imonsiz bo‘lsa va u xotini bilan yashashga rozi bo‘lsa, o‘sha ayol eridan ajrashmasin.

¹⁴Axir, imonsiz er imonli xotini tufayli poklanadi. Shuningdek, imonsiz ayol imonli eri tufayli poklanadi. Natijada ularning farzandlari harom emas, pok bo‘ladi.

¹⁵[15-16] Qayerdan bilasan ey, xotin, balki sen orqali ering najot topar?! Ey, er, qayerdan bilasan, balki sen orqali xotining najot topar?! Ammo imonsiz inson o‘zining imonli turmush o‘rtog‘idan ajrashmoqchi bo‘lsa, ajrashaversin. Shundan keyin o‘sha ajrashgan imonli odamning boshi bog‘liq emas. Xudo bizni tinchlikka chorlagan.

¹⁷Har bir inson Xudo uni qanday da’vat qilgan bo‘lsa, Rabbimiz Iso uni qanday sharoitga solgan bo‘lsa, shunday yashashda davom etaversin. Barcha jamoatlarda mana shunday ta’lim berib kelyapman.

¹⁸Birov sunnatli bo‘lganda da’vat etildimi, jarrohlik yordamida sunnatini qayta sunnat qilinmaganday qilib o‘zgartirmasin. Boshqa birov sunnatsiz bo‘lganda da’vat etildimi, sunnat qilinmasin.

¹⁹Axir, sunnat qilingan yoki qilinmaganlikning hech ahamiyati yo‘q. Eng muhimi, Xudoning amrlariga amal qilishdir.

²⁰Har kim qanday holatda da’vat etilgan bo‘lsa, holatini o‘zgartirishga urinmasin.

²¹Agar qul bo‘lganingda da’vat etilgan bo‘lsang, tashvishlanma. Ammo ozod bo‘lishga imkon bor bo‘lsa, fursatni g‘animat bil.

²²Rabbimiz Isoga tegishli bo‘lishga da’vat etilgansiz. Kim qul bo‘lgan paytida da’vat etilgan bo‘lsa, endi Rabbimizning nazarida u ozod insondir. Shuningdek, kim ozod bo‘lgan paytida da’vat etilgan bo‘lsa, endi u Masihning qulidir.

²³Sizlar qimmat bahoga sotib olindingiz, shuning uchun o‘zingizni insoniy g‘oyalarga qul qilmanglar.

²⁴Birodarlar, Xudo kimni qanday vaziyatda da’vat qilan bo‘lsa, o‘sha vaziyatda qolib yashayversin.

²⁵Hali oila qurmagan erkagu ayollar masalasiga kelsak, Rabbimiz Iso bu haqda amr bermagan. Ammo men Egamizning mehr–shafqati bilan ishonchli bo‘lgan kishi sifatida maslahat bera olaman.

²⁶Hozirgi tang vaziyat sababli kishi qay holda bo‘lsa, shunday qolgani yaxshidir.

²⁷Uylanganmisan? Xotining bilan ajrashma. Bo‘ydoqmisan? Xotin olmagin.

²⁸Bordi–yu, uylansang, bu gunoh emas. Shuningdek, qiz erga tegsa ham, gunoh bo‘lmaydi. Ammo uylanganlarning tashvish–iztiroblari ko‘p bo‘ladi, men sizlarni shulardan asramoqchiman.

²⁹Ey birodarlar, sizlarga yana shuni aytmoqchimanki, vaqt endi qisqa. Vaqti kelib, uylanganlaru uylanmaganlarning farqi bo‘lmaydi.

³⁰Yig‘layotganlaru sevinayotganlar, buyum xarid qilganlar o‘zlarining qayg‘u–alamlari, xursandchiligi va mol–dunyosi bilan ovora bo‘lib qolmasin.

³¹Bu dunyoning ishlari bilan ovora bo‘lganlar endi buni bas qilsinlar. Axir, bu dunyo o‘tkinchi dunyo–ku!

³²Men sizlarning tashvishsiz bo‘lishingizni istayman. Bo‘ydoqning asosiy tashvishi Rabbimiz Isoni mamnun qilish, Uning ishlari bilan mashg‘ul bo‘lishdir.

³³Uylangan kishi esa xotinini mamnun qilish niyatida dunyoviy ishlar haqida qayg‘uradi.

³⁴Uning fikri ikkiga bo‘lingan. Hozir ersiz bo‘lgan ayollar va erga tegmagan qizlarning ham tashvishi Rabbimizning ishlari bilan mashg‘ul bo‘lishdir, ularning maqsadi ham jismonan, ham ruhan Rabbimizga bag‘ishlanishdir. Erga tekkan ayol esa erini mamnun qilish niyatida dunyoviy ishlar haqida qayg‘uradi.

³⁵Men sizlarni chegaralash niyatida emas, balki sizlarning manfaatingizni ko‘zlab bularni aytyapman. Toki sizlar fikringizni chalg‘itmasdan, sidqidildan Rabbimiz Isoga berilib, adabli hayot kechiringlar.

³⁶Agar unashtirilgan kishi o‘z qaylig‘iga uylanmay, unga nisbatan noto‘g‘ri muomila qilyapman, deb o‘ylasa, hamda unga uylanishni qattiq xohlasa, o‘z bergan so‘zida turib, uylansin. Bu gunoh emas.

³⁷Ammo u uylanishni ehtiyoj deb bilmay, o‘z qaylig‘iga uylanmaslikka qattiq qaror qilib, bu borada irodasini ko‘rsata olsa, bu ham yaxshi.

³⁸Shunday qilib, o‘z qaylig‘iga uylangan kishi yaxshi ish qilgan bo‘ladi, uylanmagan esa undan ham yaxshiroq ish qilgan bo‘ladi.

³⁹Xotin kishining eri tirik ekan, uning boshi bog‘liqdir. Agar eri o‘lsa, u istagan kishiga turmushga chiqishi mumkin, faqat u erkak Rabbimiz Isoga tegishli bo‘lishi kerak.

⁴⁰Ammo menimcha o‘sha ayol tulligicha qolsa, u yana ham baxtli bo‘ladi. Ishonamanki, menda ham Xudoning Ruhi bor.