Read O‘zbek tilidagi Muqaddas Kitob, 2013 Korinfliklarga 1chi 8 Bible Online

Korinfliklarga 1chi 8 - O‘zbek tilidagi Muqaddas Kitob, 2013 bible

Korinfliklarga 1chi 8

¹Butga qurbonlik qilingan go‘sht masalasiga kelsak. O‘zingiz aytgandek, hammamiz bu haqdagi haqiqatni bilamiz. Ammo bilim odamni shishintiradi, mehr–muhabbatli inson esa atrofidagilarning manfaatini ko‘zda tutadi.

²Agar bir kishi bilimliman deb o‘ylasa, u hali zarur bo‘lgan bilimga erishmagan.

³Kimki Xudoni yaxshi ko‘rsa, Xudo uni tanib–biladi.

⁴Endi butga qurbon qilingan go‘shtni yeyish masalasiga kelsak, biz shuni bilamizki, but dunyoda hech narsa emas, birgina Xudodan boshqa xudo yo‘q.

⁵Garchi yeru ko‘kda xudo deb atalgan narsalar ko‘p bo‘lsa–da (haqiqatan, bunaqa “xudolar” va “rabbiylar” juda ko‘p),

⁶biz uchun birgina Otamiz Xudo bor. U butun mavjudotning Yaratuvchisidir va biz U uchun yashaymiz. Shuningdek, birgina Rabbimiz Iso Masih bor. Butun mavjudot Masih orqali vujudga kelgan va biz U orqali yashaymiz.

⁷Ammo hamma ham bularni bilmaydi. Orangizda ba’zilar “butlar bor” degan fikrga shunchalik o‘rganib qolganki, butlarga bag‘ishlangan go‘shtni yeganda ularning vijdoni qiynaladi, chunki ular bunday go‘sht yeyishni hali ham butlarga sajda qilish, deb biladi.

⁸Oziq–ovqat bizni Xudoga yaqinlashtira olmaydi. Yemasak, biror narsa yo‘qotmaymiz, yesak ham biror narsa orttirib olmaymiz.

⁹Faqat ehtiyot bo‘ling, sizlarning bu erkinligingiz zaiflarning vasvasaga tushishiga sabab bo‘lmasin.

¹⁰Agar sen, bilimli odam bo‘la turib, butxonada taom yeb o‘tirsang, bu masala haqida ikkilanib turgan birodaring seni ko‘rib, butga bag‘ishlangan go‘shtdan yeyishga moyil bo‘lmaydimi?

¹¹O‘sha zaif birodaring uchun Masih o‘lgan, sen esa uni o‘z biliming tufayli halokatga yo‘liqtirasan.

¹²Shunday qilib, ikkilanib turgan birodaringni vasvasaga solib, unga qarshi gunoh qilsang, Masihga qarshi gunoh qilgan bo‘lasan.

¹³Agar biror ovqatni yeyishim birodarimning gunoh qilishiga sabab bo‘lsa, uni vasvasaga solmaslik uchun endi men umrbod o‘sha ovqatni yemayman.