Read O‘zbek tilidagi Muqaddas Kitob, 2013 Korinfliklarga 1chi 9 Bible Online

Korinfliklarga 1chi 9 - O‘zbek tilidagi Muqaddas Kitob, 2013 bible

Korinfliklarga 1chi 9

¹Men ozod emasmanmi?! Men havoriy emasmanmi?! Rabbimiz Isoni ko‘rmaganmanmi?! Rabbimiz yo‘lida qilgan mehnatimning mahsuli sizlar emasmi?!

²Agar boshqalar uchun havoriy bo‘lmasam ham, hech bo‘lmasa sizlar uchun havoriydirman. Axir, sizlar Rabbimizga tegishli bo‘lganingiz uchun havoriyligimning muhrisizlar.

³Meni tanqid qilayotganlar oldida quyidagilar bilan o‘zimni oqlayman.

⁴Nahotki Rabbimiz yo‘lida qilgan xizmatimiz uchun tekin yeb–ichishga huquqimiz bo‘lmasa?!

⁵Nima, boshqa havoriylar kabi, Rabbimiz Isoning ukalari va Butrusga o‘xshab, imonli bir ayolga uylanib, uni yonimizda olib yurishga haqqimiz yo‘qmi?!

⁶Yoki faqatgina men bilan Barnabo kun kechirish uchun o‘z qo‘limiz bilan mehnat qilishimiz kerakmi?!

⁷Kim o‘z hisobidan askarlik qiladi?! Kim tok o‘tqazib, uning mevasini yemaydi?! Kim poda boqib, podaning sutini ichmaydi?!

⁸Bularni faqatgina insoniy nuqtayi nazardan aytayotganim yo‘q! Tavrot ham xuddi shunday buyuradi–ku!

⁹Mana, Tavrotda: “G‘alla yanchayotgan ho‘kizning og‘zini to‘smang”, deb yozilgan–ku. Nima, Xudo ho‘kizlar haqida qayg‘uryaptimi?!

¹⁰Yo‘q, Xudo buni bizning manfaatimiz uchun aytgan. Ha, bular biz uchun yozilgan. Shudgor qiluvchi ham, g‘alla yanchuvchi ham o‘z haqini olish umidi bilan ishlaydi–ku.

¹¹Biz ruhiy jihatdan sizlarga xizmat ko‘rsatsak–da, moddiy yordamingizni bizga ko‘p ko‘rasizmi?

¹²Boshqalar sizlarning yordamingizdan bahramand bo‘layotgan ekan, bizning haqimiz ularnikidan ham ko‘proq emasmi?! Lekin biz bu huquqimizdan foydalanmadik. Aksincha, Masihning Xushxabariga to‘siq qo‘ymaylik deb, har narsaga chidab yuribmiz.

¹³Bilmaysizlarmi, ma’badda xizmat qiluvchi ruhoniylar ma’baddan ovqat olib yeydilar. Qurbongohda xizmat qiluvchilar keltiriladigan qurbonliklardan ulush oladilar.

¹⁴Shuningdek, Xushxabarni yoyish vazifasini bo‘yniga olganlar bu ishi orqali kun kechirishlari kerakligini Rabbimiz Isoning O‘zi buyurgan.

¹⁵Ammo men bu huquqlarimdan foydalanmadim va bundan faxrlanaman. Bu xatni o‘sha huquqimdan foydalanay, deb ham yozayotganim yo‘q. Menga faxrlanish huquqini berayotgan sababni yo‘qotishdan ko‘ra o‘lganim yaxshiroqdir.

¹⁶Men Xushxabarni yoyar ekanman, bu bilan maqtanishga haqqim yo‘q, chunki bu zimmamdagi vazifamdir. Ammo Xushxabarni yoymasam, mening holimga voy!

¹⁷Men buni o‘z tashabbusim bilan qilayotgan bo‘lsam, mukofotga loyiq bo‘lardim. Lekin mukofotga loyiq emasman, chunki bor–yo‘g‘i zimmamdagi vazifani bajaryapman, bu ishni qilishdan boshqa ilojim yo‘q.

¹⁸U holda mening mukofotim nima? Mukofotim shundaki, men Xushxabarni yoyganimda, hech kimdan biron narsa so‘ramayman. Shuning uchun Xushxabarni yoyish menga ba’zi bir huquqlarni bersa–da, ulardan foydalanmayman.

¹⁹Men qul emas, erkin inson bo‘lsam–da, hammaga qulday xizmat qildim. Yanada ko‘proq odam Isoning shogirdi bo‘lsin, deb shunday qildim.

²⁰O‘sha maqsadimni ko‘zda tutib, Yahudiylar bilan birga bo‘lganimda Yahudiyday bo‘ldim, o‘zim Musoning qonuniga tobe bo‘lmasam–da, bu qonunga tobe bo‘lganlar orasida bo‘lganimda, xuddi ularday yashadim.

²¹Musoning qonunini bilmaganlar bilan birga bo‘lganimda, ular ham Isoning shogirdlari bo‘lsin, deb xuddi ularday yashadim. To‘g‘ri, men Xudoning qonunidan ozod emasman, Masihning amrlariga tobeman.

²²Zaif insonlar ham Isoni tanisinlar deb, ularning orasida bo‘lganimda zaif insonday bo‘ldim. Hech bo‘lmasa ba’zilarni qay yo‘l bilan bo‘lsa–da qutqaray deb, hammaga hamma narsa bo‘ldim.

²³Men bularning hammasini Xushxabarni yoyish niyatida qilaman, toki Xushxabar keltiradigan qut–barakalardan bahramand bo‘lay.

²⁴Bilasizlar–ku, musobaqada ko‘p yuguruvchilar qatnashadi, ammo faqat bir kishi yutib, mukofot oladi. Sizlar ham shunday yuguringki, mukofotni qo‘lga kiritinglar.

²⁵Axir, musobaqada qatnashadigan odam o‘z nafsini tiyib, tartib–intizom bilan mashq qiladi–ku! Ular so‘lib qoladigan toj olish uchun shunday qiladilar, biz esa boqiy toj olish uchun harakat qilamiz.

²⁶Shuning uchun men maqsadsiz yugurmayman, kurashganimda zarbalarim aniq bo‘ladi.

²⁷Tanamni chiniqtirib, uni o‘z ixtiyorimga bo‘ysundiraman, toki boshqalarga Xushxabarni va’z qilib turib, o‘zim mukofotga noloyiq bo‘lib qolmayin.