Read O‘zbek tilidagi Muqaddas Kitob, 2013 Korinfliklarga 2chi 2 Bible Online

Korinfliklarga 2chi 2 - O‘zbek tilidagi Muqaddas Kitob, 2013 bible

Korinfliklarga 2chi 2

¹Yana xafagarchilik keltirib chiqarmaslik uchun sizlarning oldingizga bormaslikka qaror qildim.

²Axir, sizlarni xafa qilsam, menga xursandchilik keltiradiganlarni xafa qilgan bo‘laman–ku! Unday holda, kim meni xursand qiladi?!

³Oldingi maktubni yozganimning sababi ham shudir, toki sizlarning oldingizga borganimda oramizda xafagarchilik bo‘lmasin, axir, menga katta quvonch keltiradiganlar sizlar emasmi?! Ishonchim komilki, mening quvonchim sizlarning quvonchingizdir.

⁴Sizlarni xafa qilish uchun emas, balki sizlarni qanchalik yaxshi ko‘rishimni ko‘rsatish uchun o‘sha maktubni yozgan edim. U maktub chuqur qayg‘u, iztirob va ko‘z yoshlari bilan yozilgandi.

⁵Gapni oshirib aytadigan bo‘lsak, meni xafa qilgan odam faqatgina meni emas, balki qaysidir darajada sizlarning hammangizni xafa qilgan bo‘ladi.

⁶Ammo xafa qilgan odamga ko‘pchilik tomonidan berilgan jazo yetarli.

⁷Endi bo‘lsa, uni kechirib, tasalli beringlar, toki u haddan ortiq qayg‘urib, tushkunlikka tushmasin.

⁸Sizlardan o‘tinaman, unga bo‘lgan mehr–muhabbatingizni ko‘rsating.

⁹Oldingi maktubimni yozishdan yana bir maqsadim shu edi, sizlar har jihatdan itoatkor ekanmisiz yoki yo‘qmi, shuni bilmoqchi edim.

¹⁰Sizlar biror kishini kechirsangiz, men ham uni kechiraman. Birortasi kechirishim kerak bo‘ladigan biror ayb ish qilgan bo‘lsa, sizlarning manfaatingizni ko‘zlab, Masihning huzurida uni kechiraman.

¹¹Shaytonga aldanib qolmaylik, axir, uning fitnalaridan bexabar emasmiz–ku!

¹²Masih haqidagi Xushxabarni e’lon qilish uchun Troas shahriga borganimda, Egamiz menga yo‘l ochib bergan edi.

¹³Ammo ruhim notinch edi, chunki birodarim Titusni u yerda topa olmadim. Shuning uchun u yerdagilar bilan xayrlashib, Makedoniyaga jo‘nadim.

¹⁴Xudoga shukr! Xudo bizga Masihning tantanali yurishida ishtirok etishga nasib etdi. Atirning hidi qanday taralsa, xuddi shu singari, har yerda va har doim Xudo biz orqali O‘zi haqidagi xabarni tarqatmoqda.

¹⁵Masih haqidagi xushxabarni yoyar ekanmiz, biz najot topadiganlar orasida ham, halok bo‘ladiganlar orasida ham Xudoga xush keladigan tutatqi nazrining hidiga o‘xshaymiz.

¹⁶Bu hid halok bo‘ladiganlar uchun o‘lim hididir, najot topadiganlar uchun esa hayotbaxsh xushbo‘y hiddir. Bunday yuksak mas’uliyatga Xudo bizni loyiq topdi.

¹⁷Mana, biz ko‘pchilik kabi, Xudoning kalomini bozorga solmaymiz. Aksincha, Xudo tomonidan yuborilgan va Masih xizmatida bo‘lgan kishilardek, Xudoning ko‘zi oldida sof ko‘ngil bilan voizlik qilmoqdamiz.